ເມື່ອບໍ່ດົນມານີ້, ສຳນັກງານຄະນະກຳມະການຄຸ້ມຄອງຫລັກຊັບ, ຕະຫລາດຫລັກຊັບລາວ ແລະ ບໍລິສັດຫລັກຊັບ ເອພີເອັມລາວ ຈຳກັດ,
ໄດ້ນຳເອົາທາງເລືອກໃໝ່ຂອງການລະດົມທຶນ ແລະ ລົງທຶນມາເຜີຍແຜ່ໃຫ້ແກ່ບັນດານັກທຸລະກິດ, ຜູ້ປະກອບການ ແລະ ຫົວໜ່ວຍທຸລະກິດທະນາຄານທັງພາກລັດ ແລະ ເອກະຊົນພາຍໃນແຂວງຊຽງຂວາງ ເພື່ອໃຫ້ຮັບຮູ້ ແລະ ເຂົ້າໃຈກ່ຽວກັບການເຂົ້າເຖິງຕະຫລາດທຶນທີ່ປາສະຈາກການຊຳລະຄືນຕົ້ນທຶນ ແລະ ດອກເບ້ຍ ເພື່ອນຳເອົາເງິນທຶນດັ່ງກ່າວໄປໝູນວຽນ ຫລື ຂະຫຍາຍທຸລະກິດ.
ທ່ານ ວັນຄຳ ວໍລະວົງ ຜູ້ອຳນວຍການໃຫຍ່ຕະຫລາດຫລັກຊັບລາວ ກ່າວວ່າ: ນັບວ່າເປັນໂອກາດດີສຳລັບນັກທຸລະກິດ ແລະ
ນັກລົງທຶນໃນການຮຽນຮູ້ວິທີການ ແລະ ການກຽມຄວາມພ້ອມກ່ອນການນຳເອົາບໍລິສັດເຂົ້າໄປຈົດທະບຽນໃນຕະຫລາດຫລັກຊັບ
ລວມທັງການຫລີກລ້ຽງຄວາມສ່ຽງທີ່ອາດເກີດຂຶ້ນຕໍ່ການດຳເນີນທຸລະກິດຂອງຕົນໃນອະນາຄົດ. ເນື່ອງຈາກຖ້າຕ້ອງການລະດົມທຶນໃນຈຳນວນຫລາຍ, ໄລຍະຍາວ ແລະ ບໍ່ມີດອກເບ້ຍ ຕະຫລາດຫລັກຊັບແມ່ນໜຶ່ງທາງເລືອກທີ່ດີ. ນອກຈາກນີ້ລັດຖະບານກໍຍັງໄດ້ຊຸກຍູ້ ແລະ ຊ່ວຍເຫລືອບັນດາບໍລິສັດທີ່ມີທ່າແຮງລວມໄປເຖິງພາກລັດ ແລະ ເອກະຊົນ ເພື່ອໃຫ້ເຂົາເຈົ້າມີຄວາມເຂັ້ມແຂງ ແລະ ສາມາດນຳເອົາບໍລິສັດຂອງຕົນເຂົ້າຈົດທະບຽນໃນຕະຫລາດຫລັກຊັບ.
ໃນໂອກາດດັ່ງກ່າວ, ຜູ້ເຂົ້າຮ່ວມໄດ້ຮັບຟັງເງື່ອນໄຂໃນການນຳບໍລິສັດເຂົ້າຈົດທະ
ບຽນໃນຕະຫລາດຫລັກຊັບ, ຂໍ້ກຳນົດ ແລະ ຫລັກການຮັບຫລັກຊັບເຂົ້າຈົດທະບຽນ ແລະ ຂັ້ນຕອນໃນການກະກຽມອື່ນໆ ລວມທັງຜົນປະໂຫຍດທີ່ຈະໄດ້ຮັບເຊິ່ງລວມມີ: ຜົນປະໂຫຍດດ້ານພາສີຕ່າງໆ,ການສ້າງຊື່ສຽງ
ແລະ ພາບພົດທີ່ດີໃຫ້ແກ່ບໍລິສັດ, ການເພີ່ມຊ່ອງທາງລະດົມທຶນຈາກແຫລ່ງເງິນທຶນໄລຍະຍາວ, ການສ້າງຄວາມຮັບຜິດຊອບ ແລະ ການບໍລິຫານງານແບບມືອາຊີບ ແລະ ການສ້າງຄວາມພັກດີ ແລະ ຜົນຕອບແທນທີ່ດີໃຫ້ແກ່ພະນັກງານ.
ທ່ານອຳນວຍການໃຫຍ່ຕະຫລາດຫລັກຊັບລາວ ກ່າວວ່າ: ປັດຈຸບັນມີບໍລິສັດທີ່ຈົດທະບຽນໃນຕະຫລາດຫລັກຊັບລາວແລ້ວ 5 ບໍລິສັດຄື: ບໍລິສັດຜະລິດໄຟຟ້າລາວມະ
ຫາຊົນ, ທະນາຄານການຄ້າຕ່າງປະເທດລາວມະຫາຊົນ, ບໍລິສັດ ລາວເວີນ ມະຫາຊົນ, ບໍລິສັດປີໂຕຣລ້ຽມເທຣດດີ້ງລາວມະຫາຊົນ
ແລະ ບໍລິສັດ ສຸວັນນີໂຮມເຊັນເຕີ ມະຫາຊົນ ແລະ ໃນ 5 ປີຕໍ່ໜ້າຕະຫລາດຫລັກຊັບຈະສູ້ຊົນໃຫ້ໄດ້ຢ່າງໜ້ອຍ
25
ບໍລິສັດເຂົ້າຈົດທະບຽນໃນຕະຫລາດຊັບລາວ.
No comments:
Post a Comment