ກອງຊຸມສາກົນດ້ານຊັບພະຍາກອນນ້ຳ-ພະລັງງານໄຟຟ້າ​ໄຂ​ຂຶ້ນ​ທີ່​ນະຄອນຫລວງ​ວຽງ​ຈັນ

           ກະຊວງພະລັງງານ ແລະ ບໍ່ແຮ່ ຮ່ວມກັບອົງການສາກົນດ້ານເຂື່ອນໄຟຟ້ານ້ຳຕົກ (the lnternationalJournal on Hydropower Dams),​ໄດ້ຈັດກອງປະຊຸມສາກົນຄັ້ງທີ VI ກ່ຽວກັບຊັບພະຍາກອນນ້ຳ ແລະ ການພັດທະນາໄຟຟ້າພະລັງງານນໍ້າໃນອາຊີຂຶ້ນຢ່າງເປັນທາງການໃນວັນທີ 1 ມີນານີ້ທີ່ຫໍປະຊຸມແຫ່ງຊາດນະຄອນຫລວງວຽງຈັນ, ໂດຍເປັນປະທານຂອງທ່ານ ດຣ. ຄໍາມະນີ ອິນທິລາດ ລັດຖະມົນຕີວ່າການກະຊວງພະລັງງານ ແລະ ບໍ່ແຮ່,ມີຄະນະຜູ້ແທນ, ນັກຄົ້ນຄວ້າ, ຜູ້ຊ່ຽວຊານ, ນັກທຸລະກິດທັງພາຍໃນ ແລະ ຕ່າງປະເທດ​ເຂົ້າ​ຮ່ວມຫລາຍກວ່າ 700 ທ່ານຈາກ 45 ປະເທດ.

             ກອງປະຊຸມດັ່ງກ່າວ,​ ເປັນ​ຄັ້ງ​ທໍາ​ອິດ​ທີ່ ສປປ ລາວ ໄດ້ຮັບກຽດເປັນເຈົ້າພາບຈັດ ​ແລະ ຈະດຳເນີນໄປເປັນເວລາ 3 ວັນ, ຊຶ່ງຈະມີການວາງສະແດງຮູບພາບ, ຜະລິດຕະພັນຕ່າງໆເພື່ອຮັບໃຊ້ໃຫ້ແກ່ການພັດທະນາ, ການກໍ່ສ້າງ ແລະ ດຳເນີນງານເຂື່ອນໄຟຟ້ານ້ຳຕົກຈາກຫລາຍ​ກວ່າ 90 ພາກ ສ່ວນ. ເພື່ອເຜີຍແຜ່ຜົນການຄົ້ນຄວ້າ-ວິໄຈ, ການພັດທະນາ, ການເຄື່ອນໄຫວທຸລະກິດກ່ຽວກັບໄຟຟ້ານ້ຳຕົກເນັ້ນໃສ່ໃນເຂດອາຊີ. ພ້ອມນີ້, ກໍຈະມີກອງປະຊຸມປິ່ນອ້ອມຫລາຍກ່ວາ 20 ກອງປະຊຸມ ແລະ ມີການນຳສະເໜີຫົວຂໍ້ຈາກຊ່ຽວຊານພາຍໃນ ແລະ ຕ່າງປະເທດ ກວ່າ 100 ບົດກ່ຽວກັບຜົນການຄົ້ນຄ້ວາ,ການພັດທະນາ, ການເຄື່ອນໄຫວທຸລະກິດ ແລະ ຄຸ້ມຄອງບໍລິຫານຂອງພາກລັດ ແລະ ເອກະຊົນ ​ໃນຂະແໜງພະລັງງານໄຟຟ້າ. ນອກ​ນັ້ນ, ຄະນະຜູ້ແທນຈະຢ້ຽມຢາມໂຄງການກໍ່ສ້າງເຂື່ອນໄຟຟ້າໄຊຍະບູລີ ທີ່ແຂວງໄຊຍະບູລີ, ໂຄງການກໍ່ສ້າງເຂື່ອນໄຟຟ້ານ້ຳງຽບ 1 ທີ່ ແຂວງບໍລິຄຳໄຊ ແລະ ໂຄງການເຂື່ອນໄຟຟ້ານ້ຳງື່ມ. ຄະນະຜູ້ແທນຈະ​ໄດ້​ປຶກສາ​ຫາ​ລື​ແລ​ກປ່ຽນ​ຄວາມ​ຄິດ​ຄວາມ​​ເຫັນ ​ແລະ ບົດຮຽນຮ່ວມ​ກັນກ່ຽວ​ກັບການ​ພັດທະນາ​ດ້ານ​ວິທະຍາສາດ, ການ​ຄົ້ນ​ຄວ້າ, ການ​ພັດທະນາພະລັງງານ​ໄຟຟ້າ, ຊັບພະ​ຍາກ​ອນນໍ້າ, ວຽກ​ງານ​ປິ່ນ​ອ້ອມອື່ນໆ ​ເພື່ອ​ຖອດ​ຖອນບົດຮຽນທີ່​ເປັນ​ປະ​ໂຫຍ​ດ​ ເຊິ່ງຈະ​​ເປັນ​ການ​ປະກອບສ່ວນສຳຄັນ ​ເຂົ້າ​ໃນ​ການ​ພັດທະນາ​ເສດຖະກິດ​-ສັງຄົມ ພາຍໃນ ​ແລະ ຕ່າງປະ​ເທດຢ່າງ​ກວ້າງຂວາງ.

           ທ່ານ ດຣ. ຄໍາມະນີ ອິນທິລາດ ກ່າວວ່າ: ປະເທດລາວແມ່ນປະເທດດ້ອຍພັດທະນາ,​ ແຕ່​ມີຄວາມອຸດົມສົມບູນດ້ານຊັບພະຍາກອນທໍາມະຊາດໂດຍແຫລ່ງນໍ້າ ມີຄວາມບົ່ມຊ້ອນຢ່າງຫລວງ ຫລາຍເພື່ອນໍາເອົາມາໃຊ້ໃຫ້ເກີດປະໂຫຍດສູງ ແລະ ຍືນຍົງ. ສະນັ້ນ, ລັດຖະບານ​ລາວ​ ເຫັນວ່າ​ຂະ​ແໜງ​ພະລັງງານ​​ເປັນບູລິ​ມະ​ສິດໜຶ່ງໃນ​ການພັດທະນາເສດຖະກິດ-ສັງຄົມ, ແນ່​ໃສ່​ສ້າງ​ແຫ​ລ່ງລາຍ​ຮັບ​ເພີ່ມ​ຂຶ້ນ​ໃຫ້​ແກ່​ງົບປະມານ​ແຫ່ງ​ຊາດ​ ເພື່ອ​ປະກອບສ່ວນ​ເຂົ້າ​ໃນ​ການ​ພັດທະນາ​ປະ​ເທດ​ຊາດ​ໃຫ້​ຫລຸດ​ພົ້ນ​ອອກ​ຈາກ​ປະ​ເທດ​ດ້ອຍ​ພັດທະນາ ​ແລະ ມີ​ພື້ນຖານ​ເຕັກນິກ​ເພື່ອ​ຫັນ​ເປັນ​ອຸດສາຫະກໍາທັນ​ສະ​ໄໝ​ໃນ​ຕໍ່​ໜ້າ ​ແລະ ຍາວ​ນານ, ໂດຍສະເພາະພະລັງງານໄຟຟ້ານໍ້າຕົກທີ່ມີທ່າແຮງໃນການກໍ່ສ້າງເຂື່ອນໄຟຟ້າທີ່ມີກຳລັງຕິດຕັ້ງໄດ້ຫລາຍກວ່າ 26 ພັນເມກາວັດ. ນອກ​ນັ້ນ ​ຍັງ​ມີໂຄງການໄຟຟ້າພະລັງງານຄວາມຮ້ອນຫົງ​ສາລິກ​​ໄນ 1 ແຫ່ງ ແລະ ພະລັງນ້ຳ 38 ແຫ່ງມີກຳລັງຕິດຕັ້ງ 6.264 ເມກາວັດ, ມີກຳລັງການຜະລິດ 33.300 ລ້ານກິໂລວັດໂມງຕໍ່ປີ, ສາມາດສະໜອງໄຟຟ້າໃຫ້ປະຊາຊົນໄດ້ຊົມໃຊ້ເກືອບ 90% ຂອງຄອບຄົວໃນທົ່ວປະເທດ.ດ້ວຍຄວາມພະຍາຍາມດັ່ງກ່າວ, ພວກເຮົາໄດ້ປະສົບຜົນສຳເລັດ​ໃນການພັດທະນາຂະແໜງໄຟຟ້ານ້ຳຕົກແບບຍືນຍົງໃນປີ 2015 ແລະ ຈະສືບຕໍ່ຜັນຂະຫຍາຍວິໃສທັດຮອດປີ 2020,ແຜນຍຸດທະສາດຮອດປີ 2025 ແລະ ແຜນພັດທະນາຮອດປີ 2030 ຂອງຂະແໜງພະລັງງານໄຟຟ້າພະລັງງານນໍ້າ ແບບຍືນຍົງ ແລະ ເປັນມິດຕໍ່ສິ່ງແວດລ້ອມ.