ຊາຍໜຸ່ມຊິ້ງຟໍຈູນເນີ້ແຫກໂຄ້ງບ້ານນາງ່າ ເສຍຊີວິດຄາທີ່

          ເວລາປະມານ 6:40 ໂມງຂອງວັນທີ 31 ມີນານີ້, ໄດ້ມີລົດຟໍຈູນເນີ້ ໝາຍເລກທະ ບຽນ ມຕ 8899 ກຳແພງນະຄອນ ແລ່ນມຸ້ງໜ້າມາແຕ່ທາງບ້ານນ້ຳຊ່ວງ, ເມືອງນາຊາຍທອງ ນະຄອນຫລວງວຽງຈັນ ດ້ວຍຄວາມໄວສູງ ພໍມາຮອດໂຄ້ງອັນຕະລາຍ ເຂດບ້ານນາງ່າ ເຮັດໃຫ້ລົດຄັນດັ່ງກ່າວເສຍຫລັກຂ້າມເລນ ໄປຕຳເອົາເສົາໄຟຟ້າແຄມທາງຢ່າງແຮງ ຈົນລົດປິ້ນລົງຂ້າງທາງ, ສົ່ງຜົນໃຫ້ຜູ້ຂັບຂີ່ເສຍຊີວິດຄາທີ່.

          ເຈົ້າໜ້າທີ່ ຈະລາຈອນ ນະຄອນຫລວງວຽງຈັນ ໃຫ້ຮູ້ວ່າ: ອຸປະຕິເຫດດັ່ງກ່າວມີສາ ເຫດມາຈາກຂັບຂີ່ລົດໄວເກີນກຳນົດ, ພ້ອມເປັນທາງໂຄ້ງ, ເຮັດໃຫ້ຄວບຄຸມ ລົດບໍ່ໄດ້ ຈຶ່ງເກີດເສຍຫລັກໄປຕຳເອົາເສົາ

ໄຟຟ້າ ແລະ ເກີດໄຟຟ້າຊ໋ອດ ຈຶ່ງເຮັດໃຫ້ຜູ້ຂັບຂີ່ເສຍຊີວິດໄດ້ງ່າຍ. ດັ່ງນັ້ນ ເຈົ້າໜ້າທີ່ ຈຶ່ງເຕືອນມາວ່າ: ຍັງອີກບໍ່ພໍ ເທົ່າໃດມື້ບຸນປີໃໝ່ລາວກໍຈະກ້າວມາເຖິງແລ້ວ, ເຊິ່ງປີນີ້ມີວັນພັກຍາວຫລາຍວັນ. ດັ່ງນັ້ນ ຈຶ່ງຮຽກຮ້ອງໃຫ້ຜູ້ໃຊ້ລົດໃຊ້ຖະໜົນທຸກຄົນ ຈົ່ງມາສະຕິ, ບໍ່ປະໝາດ ແລະ ປະຕິບັດລະບຽບຈະລາຈອນໃຫ້ເຂັ້ມງວດເພື່ອບໍ່ໃຫ້ມີອຸປະຕິເຫດຕາມມາ.