ຖະແຫລງການລັດຖະມົນຕີຕ່າງປະເທດອາຊຽນຕໍ່ເຫດການໂຈມຕີດ້ວຍລະເບີດຢູ່ລາຮໍ

          ໃນວັນທີ 31 ມີນານີ້, ບັນດາປະເທດສະມາຊິກອາຊຽນ ກ່າວປະນາມຢ່າງແຂງແຮງ ຕໍ່ເຫດການໂຈມຕີດ້ວຍລະເບີດ ຢູ່ລາຮໍ, ສາທາລະນະລັດ ອິດສະລາມ ປາກິດສະຖານ ໃນວັນທີ 27 ມີນາ 2016 ອັນໄດ້ເຮັດໃຫ້ມີຜູ້ເສຍຊີວິດຫລາຍກວ່າ 65 ຄົນ ແລະ ບາດເຈັບເປັນຈຳເປັນຫລາຍ,

          ອາຊຽນ ສະແດງຄວາມເຫັນອົກເຫັນໃຈ ແລະ ເສົ້າສະລົດໃຈຢ່າງສຸດຊຶ້ງ ມາຍັງລັດຖະບານ ແລະ ປະຊາຊົນ ສາທາລະນະລັດ ອິດສະລາມ ປາກິດສະຖານ, ໂດຍສະເພາະ ຄອບຄົວຂອງຜູ້ທີ່ໄດ້ຮັບເຄາະຮ້າຍ ຈາກເຫດການທີ່ໂຫດຮ້າຍປ່າເຖື່ອນໃນຄັ້ງນີ້.

          ອາຊຽນເນັ້ນວ່າ: ການກໍ່ການຮ້າຍ ບໍ່ວ່າໃນກໍລະນີໃດກໍຕາມ ບໍ່ມີການກ່ຽວພັນກັບຄວາມເຊື່ອຖື ຫລື ສາສະໜາ ແລະ ຢ້ຳວ່າ ການກໍ່ການຮ້າຍ ແລະ ຄວາມຮຸນແຮງໃນທຸກຮູບແບບ ແລະ ຮູບການ ທີ່ກະທຳຂຶ້ນບໍ່ວ່າດ້ວຍເຫດຈູງໃຈໃດ, ຢູ່ແຫ່ງຫົນໃດ, ເວລາໃດ ແລະ ດ້ວຍໃຜກໍຕາມ ເປັນການກະທຳທີ່ໄຮ້ມະນຸດສະທຳ ແລະ ບໍ່ສາມາດຮັບໄດ້.

          ອາຊຽນ ອີກເທື່ອໜຶ່ງ ຢ້ຳເຖິງຄວາມຮີບດ່ວນ ໃນການຮັດແໜ້ນການຮ່ວມມືພາກພື້ນ ແລະ ສາກົນ ໃນການຕໍ່ສູ້ກັບການກໍ່ການຮ້າຍ, ລັດທິຫົວຮຸນແຮງ ແລະ ຄວາມຮຸນແຮງດັ່ງກ່າວ.