ຫົວໜ້າພະແນກສົ່ງເສີມປູກໄມ້ ແລະ
ການລົງທືນປ່າໄມ້, ກະຊວງກະສິກຳ
ແລະ ປ່າໄມ້ໃຫ້ສຳພາດຕໍ່ນັກຂ່າວລາວພັດທະນາຂອງພວກ ເຮົາເນື່ອງໃນໂອກາດກະກຽມໃຫ້ແກ່ວັນປູກໄມ້ແຫ່ງຊາດວ່າ: ກ່ອນປີ 1940 ປະເຮົາມີເນື້ອທີ່ປົກຫຸ້ມຂອງປ່າໄມ້ 70 % ຫຼື ປະມານ 16 ລ້ານເຮັກຕາ ແລະ ພາຍຫຼັງປະເທດຊາດໄດ້ຮັບການປົດປ່ອຍພັກ-ລັດຖະບານເຮົາຢາມໃດກໍໄດ້ຖືເອົາວຽກງານປ່າໄມ້ເປັນວຽກສຳຄັນໃນໂຄງປະກອບເສດຖະກິດແຫ່ງຊາດ, ຕິດພັນກັບການຜະລິດອຸດສາຫະກຳເພື່ອການສ້າງສາພັດທະນາປະເທດ, ຂະຫຍາຍພື້ນຖານໂຄງລ່າງ - ຖະໜົນຫົນທາງ, ຂະຫຍາຍເນື້ອທີ່ການຜະລິດ, ຂະຫຍາຍທີ່ຢູ່ອາໄສຂອງປະຊາຊົນ ແລະ ອື່ນໆທີ່ນັບມື້ຫຼາຍຂຶ້ນ, ອັນໄດ້ສົ່ງຜົນກະທົບເຮັດໃຫ້ເນື້ອທີ່ປ່າໄມ້ຫຼຸດໜ້ອຍຖອຍລົງເຖິງ 11 ລ້ານເຮັກຕາ ຫຼື ປະມານ
47% ຂອງເນື້ອທີ່ປ່າໄມ້ທົ່ວປະເທດນັບແຕ່ປີ 2000 ຄືນຫຼັງ
ແລະ ຍ້ອນເຫັນໄດ້ຄວາມສຳຄັນຂອງປ່າໄມ້ຕໍ່ກັບການດຳລົງຊີວິດ
ຂອງປະຊາຊົນໃນປີ
2005 ລັດຖະບານໄດ້ວາງຍຸດທະສາດປ່າໄມ້ຮອດປີ
2020 ໂດຍໄດ້ກຳນົດໄວ້ວ່າ: ຕ້ອງປູກໄມ້ໃຫ້ໄດ້ 5 ແສນເຮັກຕາ ແລະ ພື້ນຟູປ່າທຳມະຊາດໃນ 3 ປະເພດປ່າຄື:
ປ່າຜະລິດ, ປ່າສະຫງວນ ແລະ ປ່າປ້ອງກັນ ໃຫ້ໄດ້ 6 ລ້ານເຮັກຕາ ແລະ ແຕ່ລະປີຜ່ານມາລັດຖະບານກໍໄດ້ມີແຜນການປູກໄມ້ໂດຍແມ່ນກະຊວງກະສິກ ເເລະ ປ່າໄມ້ຳເປັນຜູ້ນຳພາບັນດາແຂວງ, ເມືອງ, ບ້ານຈັດຕັ້ງປະຕິບັດວຽກງານດັ່ງກ່າວ, ເພື່ອຍົກລະດັບການປົກຫຸ້ມຂອງປ່າໄມ້ໃນທົ່ວປະເທດໃຫ້ໄດ້ 65% ໃນປີ
2015 ແລະ 70% ໃນປີ
2020 ແລະ ຈາກການປູກໄມ້ ໃນໄລຍະຜ່ານມາເຫັນວ່າສາມາດບັນລຸໄດ້ຕາມຄາດ ໝາຍແຜນການຄືຮອດປີ 2015 ການປູກໄມ້ສາມາດບັນລຸໄດ້ແລ້ວຫຼາຍກວ່າ 4 ແສນເຮັກຕາ ແລະ ເຮັດໃຫ້ທົ່ວປະເທດມີເນື້ອທີ່ປົກຫຸ້ມປ່າໄມ້ແລ້ວ 68%, ແຕ່ເຖິງຢ່າງໃດກໍດີຜ່ານມານັ້ນກໍຍອມຮັບວ່າການປູກໄມ້ໃນປະເທດເຮົາແມ່ນມີຄວາມຫຍຸ້ງຍາກຫຼາຍຢ່າງເປັນຕົ້ນແມ່ນການຕອບສະໜອງງົບປະມານບໍ່ພຽງພໍຈຶ່ງເຮັດໃຫ້ຕົ້ນໄມ້ທີ່ປູກໄປແລ້ວນັ້ນບໍ່ໄດ້ຮັບການບົວລະບັດ ແລະ ປົກປັກຮັກສາໄດ້ຢ່າງທົ່ວເຖິງ, ອັນໄດ້ເຮັດໃຫ້ຕົ້ນໄມ້ປູກໃໝ່ຈຳນວນໜຶ່ງຖືກເສຍຫາຍລົ້ມຕາຍ, ໂດຍສະເລ່ຍແລ້ວ 80% ຂອງຕົນໄມ້ທີ່ປູກໄປແລ້ວນັ້ນແມ່ນມີການເຕີບໃຫຍ່ຂະຫຍາຍໂຕຕາມຄາດໝາຍ, ພົ້ນເດັ່ນແມ່ນຢູ່ບັນດາແຂວງພາກເໜືອເຊັ່ນ: ຫຼວງນ້ຳທາ, ບໍ່ແກ້ວ, ອຸດົມໄຊ, ຮອງລົງມາແມ່ນພາກກາງ ແລະ ພາກໃຕ້,
ແຕ່ກໍຍອມຮັບວ່າໃນ
2 ປີຜ່ານມາວຽກງານປູກໄມ້ມີປະສິດທີພາບດີຂຶ້ນ, ເມື່ອລັດຖະບານໄດ້ມີງົບປະມານຈຳນວນໜຶ່ງມອບໃຫ້ແຕ່ລະແຂວງເພື່ອນຳໃຊ້ເຂົ້າໃນການປູກໄມ້ໃຫ້ເປັນພິທີທາງການ ແລະ ເຮັດໃຫ້ຕົ້ນໄມ້ທີ່ປູກໄປແລ້ວນັ້ນໄດ້ຮັບການບົວລະບັດຮັກສາຫຼາຍຂຶ້ນ ແລະ ມີອັດຕາການເຕີບໃຫຍ່ຫຼາຍຂຶ້ນ.
ທ່ານ
ທົວໜ້າພະແນກດັ່ງກ່າວໃຫ້ຮູ້ວ່າ:
ການປູກໄມ້ໃນປີ 2016 ນີ້, ກະຊວງກະສິກຳ ແລະ ປ່າໄມ້ໄດ້ວາງຄາດໝາຍໄວ້ທີ 24 ພັນເຮັກຕາ ແລະ ເພື່ອໃຫ້ບັນລຸຄາດໝາຍດັ່ງກ່າວຂະ ແໜງການກ່ຽວຂ້ອງຈະຕ້ອງໄດ້ອອກແຮງໂຄສະນາປຸກລະດົມໃຫ້ສັງຄົມໄດ້ຮັບຮູ້ ແລະ ເຂົ້າໃຈເຖິງຄວາມໝາຍຄວາມສຳຄັນຂອງປ່າໄມ້ຫຼາຍຂຶ້ນ, ພ້ອມນັ້ນກໍຈະເນັ້ນໃສ່ການປົກສາຮັກສາສິ່ງແວດລ້ອມ, ແຫຼ່ງນ້ຳ ແລະ
ປູກປະດັບຕາມສຳນັກງານຫ້ອງການ, ລຽບຕາມຖະໜົນຫົນທາງເພື່ອເປັນຮົມ ແລະ ພັນໄມ້ທີ່ຈະນຳມາປູກສ່ວນໃຫຍ່ຈະເປັນພັນໄມ້ພື້ນເມືອງເປັນຫຼັກເຊັ່ນ: ໄມ້ດູ່, ໄມ້ແຄນ, ໄມ້ຍາງ, ໄມ້ແຕ້ຂ່າ. ຕົ້ນຄູນ, ຜ່າງແດງ , ຕົ້ນໄມ້ໃຫ້ໝາກ ແລະ ໄມ້ປະດັບອື່ນໆທີ່ເກີດຢູ່ຕາມທ້ອງຖິ່ນ, ນອກຈາກການປູກໄມ້ດັ່ງກ່າວແລ້ວຍັງຈະໄດ້ປູກເສີມໃສ່ເຂດກ້ອງປ່າ,
ປ່າທີ່ຊຸດໂຊມ, ໂດຍສະເພາະແມ່ນບ່ອນທີ່ເປົ່າຫວ່າງປອກໂລ້ນຕາມທຳມະຊາດ, ສຳລັບການປູກຂອງປະຊາຊົນ ແລະ
ຫົວໜ່ວຍທຸລະກິດແມ່ນຈະປູກຕາມທີ່ລັດກຳນົດ ແລະ ຈັດສັນໃຫ້ເທົ່ານັ້ນ ແລະ ສ່ວນການກະກຽມເບ້ຍໄມ້ ແລະ ເນື້ອທີ່ປູກມາຮອດປັດຈຸບັນຖືວ່າມີຄວາມພ້ອມແລ້ວໂດຍພື້ນຖານ ແລະ ເພື່ອເຮັດໃຫ້ການປູກໄມ້ປີ້ນີ້ມີປະສິດທິພາບດີຂຶ້ນທາງພາກສ່ວນກ່ຽວຂ້ອງກໍຄືກະຊວງກະສິກຳກໍໄດ້ອອກແຈ້ງການແນະນຳເປັນປະຈຳແຕ່ລະໄລຍະ ແລະ ໄດ້ປະສານສົມທົບກັບພະແນກກະສິກຳ ແລະ ປ່າໄມ້ແຂວງ, ໜ່ວຍງານທີ່ດິນເພື່ອກຳນົດເຂດທີ່ຈະປູກໃຫ້ຈະແຈ້ງ ແລະ ຮັບປະກັນໃຫ້ເນື່ອທີ່ປູກໄມ້ບໍ່ຖືກລຸກລ້ຳ, ພ້ອມໄດ້ແນະນຳໃຫ້ຄວາມຮູ້ດ້ານວິຊາການ, ເຕັກນິກການປູກຕ່າງໆໃຫ້ຖືກຕ້ອງຕາມຂັ້ນຕອນ, ນັບແຕ່ຂັ້ນຕ້ອນກະກຽມເບ້ຍໄມ້, ກະກຽມດິນ, ການປູກ,ຈົນເຖິງການບົວລະບັນຮັກສາຈົນກ່ວາໄມ້ຈະເຕີບໃຫຍ່ຕາມທຳມະຊາດໄດ້ ເລະ ເນື່ອງໃນໂອກາດວັນປູກມັນແຫ່ງຊາດ ວັນທີ 1 ມິຖຸນາ 2016 ນີ້, ຮຽກຮ້ອງໃຫ້ທົ່ວສັງຄົມຈົ່ງຮ່ວມແຮງຮ່ວມໃຈກັນປູກຕົ້ນໄມ້ຢ່າງໜ້ອຍ ຄົນລະ 1 ຕົ້ນເພື່ອປົກປັກຮັກສາສິ່ງແວດລ້ອມ, ແຫຼ່ງນ້ຳ,ຕ້ານກັບການປ່ຽນແປງຂອງດິນຟ້າອາກາດທີ່ພວມເປັນຢູ່ໃນປັດຈຸບັນ.
No comments:
Post a Comment