laophatthananewspaper: ການປູກໄມ້ຍັງບໍ່ໄດ້ຄຳນຶງເຖິງຄວາມສຳຄັນຂອງບັນຫາການຄຸ້ມຄອງຮັກສາ

ຄືດັ່ງທີ່ຮູ້ກັນແລ້ວ ໃນສຸມປີຜ່ານມາ, ລັດຖະບານໄດ້ກຳນົດຕົວເລກການປູກໄມ້ຢູ່ໃນທົ່ວປະເທດ ໃຫ້ບັນລຸໄດ້ 30.000 ເຮັກ ຕາ/ປີ, ໂດຍມອບໃຫ້ກະຊວງກະ ສິກຳ ແລະ ປ່າໄມ້ ເປັນຜູ້ຮັບຜິດ ຊອບໂດຍກົງ ໃນການແບ່ງປັນຕົວເລກໃຫ້ແຕ່ລະແຂວງ ແລະ ນະຄອນຫລວງວຽງຈັນ ເພື່ອ ພ້ອມພາກັນຈັດຕັ້ງປະຕິບັດໃຫ້ໄດ້ຮັບຜົນດີ ແລະ ສ້າງທ່າແຮງເຮັດໃຫ້ເນື້ອທີ່ປ່າໄມ້ເພີ່ມການປົກຫຸ້ມ ຕາມແຜນທີ່ໄດ້ກຳນົດໄວ້ 65% ໃນປີ 2015 ແລະ 70% ໃນປີ 2020, ເຊິ່ງມາຮອດດຽວນີ້ ອີງຕາມການສຳຫລວດຜ່ານດາວທຽມທົ່ວປະເທດ ມີເນື້ອທີ່ປ່າໄມ້ປົກຫຸ້ມຍັງເຫລືອພຽງ 50% ຂອງທົ່ວປະເທດ. ເຖິງຢ່າງໃດກໍຕາມ ເພື່ອບັນລຸຕົວເລກແຜນ ການດັ່ງກ່າວ, ລັດຖະມົນຕີກະ ຊວງກະສິກຳ ແລະ ປ່າໄມ້ ທ່ານ ວິໄລວັນ ພົມເຂ, ຍອມຮັບ ວ່າ: ການປູກໄມ້ໃນຜ່ານມາເຖິງວ່າເປັນຂະບວນການແທ້, ແຕ່ຍັງ ຂາດການຄຸ້ມຄອງປົກປັກຮັກສາ ຢ່າງເອົາຈິງເອົາຈັງແທ້ ແລະ ສິ່ງທີ່ທ້າທາຍຕາມມາກໍຄືພາໃຫ້ຕົ້ນໄມ້ທີ່ປູກໃໝ່ມີອັດຕາສ່ວນຫ່ຽວແຫ້ງ ແລະ ຕາຍໄປ ໃນແຕ່ລະປີບໍ່ຕ່ຳກວ່າ 40%.

ທ່ານລັດຖະມົນຕີກະຊວງກະສິກຳ ແລະ ປ່າໄມ້ ຍັງໄດ້ເນັ້ນວ່າ: ເພື່ອເຮັດໃຫ້ບັນຫາການປົກຫຸ້ມຂອງປ່າໄມ້ໃນທົ່ວ ປະເທດເພີ່ມຂຶ້ນໄດ້ໃນແຕ່ລະປີ ຕ້ອງໄດ້ເພີ່ມທະວີຄວາມເອົາໃຈໃສ່ໃນມາດຕະການກຳຈັດການຖາງປ່າເຮັດໄຮ່ໃຫ້ເຂັ້ມງວດກ່ວາເກົ່າ, ພ້ອມທັງໃຊ້ມາດຕະການໃນການປ້ອງກັນ ແລະ ກຳຈັດໄຟໃໝ້ລາມປ່າ, ເຊິ່ງທີ່ຜ່ານມາຢູ່ບັນດາແຂວງຕ່າງໆໄດ້ເກີດມີສະ ພາບເຊັ່ນນີ້ມາແລ້ວຢ່າງຫລວງຫລາຍ. ທ່ານລັດຖະມົນຕີ ຢືນຢັນຕື່ມວ່າ: ຕໍ່ບັນຫານີ້ແມ່ນຂໍຮຽກ ຮ້ອງໃຫ້ອຳນາດການປົກຄອງດທ້ອງຖິ່ນ ແລະ ຂະແໜງການກ່ຽວຂ້ອງຕ່າງໆຕ້ອງໄດ້ເອົາໃຈໃສ່ຕິດຕາມບົວລະບັດຮັກສາຕົ້ນໄມ້ປູກຜ່ານມາ ເພື່ອຄືນປ່າໃຫ້ກັບທຳມະຊາດທັງເປັນການຮັກສາສະພາບແວດລ້ອມທີ່ດີ ແລະ ສິ່ງນີ້ມາຮອດປັດຈຸບັນໄດ້ມີຫລາຍປັດໄຈທີ່ເອື້ອອຳນວຍໃຫ້ແກ່ການພັດທະນາປ່າໄມ້ມີຄວາມສະດວກກວ່າເກົ່າ, ກະຊວງກະສິກຳ ແລະ ປ່າໄດ້ເຫັນດີເປັນເອກະພາບຮ່ວມກັບກະຊວງຊັບພະຍາກອນທຳມະຊາດ ແລະ ສິ່ງແວດລ້ອມເຮັດພາລະບົດບາດຂອງຕົນໃນການລົງຕິດຕາມກວດກາ, ເຂົ້າຮ່ວມຂະບວນ ການຕ່າງໆຢູ່ໃນຂະແໜງປ່າໄມ້, ເປັນຕົ້ນການຟື້ນຟູປ່າສະຫງວນ ທີ່ຖືກບຸກລຸກເມື່ອກ່ອນ, ບັນຫາ ການກຳຈັດການລັກລອບຕັດໄມ້ທຳລາຍປ່າໃຫ້ໝົດໄປ ແລະ ໃນຂະນະດຽວກັນເບື້ອງກະຊວງກະ ສິກຳ ແລະ ປ່າໄມ້ ຍັງໄດ້ເອົາໃຈໃສ່ເຮັດ ວຽກງານຄຸ້ມຄອງປ່າຜະລິດ, ການຟື້ນຟູປ່າຊຸດໂຊມ ແລະ ການປູກໄມ້ໃຫ້ເປັນປ່າ, ແຕ່ເຖິງຢ່າງໃດ ໃນປັດຈຸບັນນີ້ກໍຍັງເປັນຫ່ວງເຖິງບັນຫາຄຸ້ມຄອງການຂຸດໄມ້, ໂດຍສະເພາະການລັກລອບການຕັດໄມ້ທຳລາຍປ່າ, ຊຶ່ງໄລຍະຜ່ານມາພັກ-ລັດຖະບານ ກໍໄດ້ເອົາໃຈໃສ່ຊີ້ນຳໃຫ້ມີມາດຕະການຄຸ້ມຄອງບັນຫານີ້ຢ່າງຈິງຈັງ, ເຊິ່ງທາງກະຊວງກະສິກຳ ແລະ ປ່າໄມ້ ແລະ ກະຊວງຊັບ ພະຍາກອນທຳມະຊາດ ແລະ ສິ່ງແວດລ້ອມ ກໍໄດ້ຮ່ວມກັນດຳເນີນການສຶກສາອົບຮົມໃຫ້ທຸກຄົນໃນສັງຄົມເຄົາລົບນັບຖືຮັບຮູ້ກໍຄືກົດໝາຍປ່າໄມ້, ພ້ອມຄຸ້ມຄອງຜູ້ດຳເນີນທຸລະກິດໄມ້ໃຫ້ໄປຕາມແຜນ ແລະ ລະບຽບການວາງໄວ້.