ເຜີຍແຜ່ຂໍ້ຕົກລົງກ່ຽວກັບການຈັດຕັ້ງປະຕິບັດ ກົດໝາຍວ່າດ້ວຍການຄວບຄຸມຢາສູບໃຫ້ບັນດາແຂວງພາກກາງ.

ໃນວັນທີ 8 ສິງຫາ 2016 ນີ້ ທີ່​ສະ​ຖາ​ບັນ​ສາທາລະນະ​ສຸກ ກົມອະນາໄມສົ່ງເສີມສຸຂະພາບ ກະຊວງສາທາລະນະສຸກ ໃນນາມກອງເລຂາຄະນະກຳມະການແຫ່ງຊາດ ເພື່ອການຄວບຄຸມຢາສູບ ຮ່ວມກັບ ອົງການອະນາໄມໂລກ ແລະ ສະມາພັນຄວບຄຸມຢາສູບອາຊຽນ ໄດ້ຈັດກອງປະຊຸມເຜີຍແຜ່ຂໍ້ຕົກລົງ ກ່ຽວກັບການຈັດຕັ້ງປະຕິບັດ ກົດໝາຍຄວບຄຸມຢາສູບ ໂດຍມີ ທ່ານ ພູທອນ ​ເມືອງ​ປາກ ຮອງ​ລັດຖະມົນຕີ​ກະຊວງ​ສາທາລະນະ​ສຸກ. ມີ​ບັນດາຫົວໜ້າ​ພະ​ແນ​ກສາທາລະນະສຸກ, ອຸດສາຫະກຳ-ການຄ້າ ແລະ ຖະແຫລງຂ່າວ ວັດທະນະທຳ ແລະ ທ່ອງທ່ຽວ ຈາກ 5 ​ແຂວງ​ພາກ​ກາງ ຄື: ແຂວງບໍລິຄຳໄຊ, ຄຳມ່ວນ, ວຽງຈັນ, ໄຊສົມບູນ ແລະ ນະຄອນຫລວງວຽງຈັນ​ເຂົ້າ​ຮ່ວມເປັນຈຳນວນຫລາຍ.

ທ່ານຮອງລັດຖະມົນຕີກ່າວ​ວ່າ: ການ​ເຜີຍ​ແຜ່​ຂໍ້ຕົກລົງດັ່ງກ່າວ ໃຫ້ຜູ້​ເຂົ້າ​ຮ່ວມ​ໄດ້​ຮັບ​ຮູ້​ ກ່ຽວ​ກັບ​ຄວາມ​ຄືບ​ໜ້າການ​ປະຕິບັດ​ກົດໝາຍ ​ແລະ ພັນທະ​ສົນທິສັນຍາ​ສາກົນ ​ວ່າ​ດ້ວຍ​ການ​ຄວບ​ຄຸມ​ຢາສູບ, ຂໍ້​ຕົກລົງ​ຂອງ​ລັດຖະມົນຕີ​ກະຊວງ​ສາ​ທາ ​ກ່ຽວ​ກັບການຈັດ​ຕັ້ງ​ປະຕິບັດ​ກົດໝາຍ​ວ່າ​ດ້ວຍ​ການ​ຄວບ​ຄຸມ​ຢາສູບ, ຄູ່​ມື​ແນະ​ນໍາ​ຂອງ​ສົນທິສັນຍາ​ສາກົນ​ ວ່າ​ດ້ວຍ​ການ​ຄວບ​ຄຸມ​ຢາ​ສູບ​ກ່ຽວ​ກັບ​ການ​ປົກ​ປ້ອງ​ນະ​ໂຍບາຍ​ສາທາລະນະ​ສຸກ​ ຈາກ​ການ​ແຊກ​ແຊງ​ອຸດສາຫະກໍາ​ຢາສູບ ພ້​ອ​ມນີ້​ ບັນດາ​ຜູ້​ເຂົ້າ​ຮ່ວມ​ຍັງ​ໄດ້​ປະກອບ​ຄໍາ​ຄິດ​ຄໍາ​ເຫັນ​ ກ່ຽວ​ກັບ​ການຈັດ​ຕັ້ງ​ປະຕິບັດ​ການ​ພິມ​ຄໍາ​ເຕືອນສຸຂະພາບ​ເປັນ​ຮູບ​ໃສ່​ຊ່ອງ ​ແລະ ຕຸ​ດຢາສູບ, ການຈັດ​ເຂດ​ປອດ​ຄວັນ​ຢາສູບ ​ແລະ ການ​ຫ້າມ​ໂຄສະນາ​ຢາສູບ .

ສຳລັບ ສປປ ລາວ, ຂໍ້ຕົກລົງກ່ຽວກັບ ການຈັດຕັ້ງປະຕິບັດກົດໝາຍວ່າດ້ວຍ ການຄວບຄຸມ ຢາສູບ ໄດ້ກຳນົດໃຫ້ຜູ້ດຳເນີນທຸລະກິດຜະລິດ ແລະ ນໍາເຂົ້າຢາສູບ ຕ້ອງພິມ ຄຳເຕືອນ ສຸຂະພາບ ເປັນຮູບພາບຂະໜາດ 75% ໃສ່ດ້ານໜ້າ ແລະ ຫລັງ ຂອງຊອງຢາສູບ ນັບແຕ່ວັນທີ 1 ຕຸລາ 2016 ນີ້ ເປັນຕົ້ນໄປ ເພື່ອຜູ້ຊົມໃຊ້​ເຫັນ​ໄດ້ຜົນຮ້າຍທີ່ເກີດຈາກ ການສູບຢາ ແລະ ການໄດ້ຮັບຄວັນຢາສູບ ຜ່ານຮູບພາບ ແລະ ຄໍາເຕືອນດັ່ງກ່າວ ເຮັດໃຫ້ ເດັກ ແລະ ໄວໜຸ່ມ ບໍ່ລິ​ເລີ່​ມສູບຢາ ໃຫ້ຜູ້ສູບຢາ ຫລຸດຜ່ອນລົງເທື່ອລະກ້າວ ນໍາໄປສູ່ການອອກຢາສູບໃນທີ່ສຸດ, ເຮັດໃຫ້ຄົນລາວ ມີສຸຂະພາບແຂງແຮງ ແລະ ອາຍຸຍືນຍາວ.