ເສົາຄ້ຳປະຊາຄົມການເມືອງ-ຄວາມໝັ້ນຄົງອາຊຽນຫາລືການປະຕິບັດແຜນແມ່ບົດ 2025

          ໃນຕອນເຊົ້າຂອງວັນທີ 6 ກັນຍານີ້, ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ ທ່ານສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ເປັນປະທານກອງປະຊຸມສະພາປະຊາຄົມການເມືອງ-ຄວາມໝັ້ນຄົງອາຊຽນ ຄັ້ງທີ 14 ໂດຍມີ່ລັດຖະມົນຕີຕ່າງ ປະເທດຂອງປະເທດສະມາຊິກອາຊຽນ, ເລຂາທິການໃຫຍ່ອາຊຽນ ແລະ ບັນດາຄະນະຜູ້ແທນເຂົ້າຮ່ວມ.

          ກອງປະຊຸມໄດ້ປຶກສາຫາລືກ່ຽວກັບການປະຕິບັດວຽກງານຂອງຂະແໜງການທີ່ຢູ່ພາຍໃຕ້ເສົາຄ້ຳປະຊາຄົມການເມືອງ-ຄວາມໝັ້ນຄົງອາຊຽນ ໃນໄລຍະຜ່ານມາ. ພ້ອມນັ້ນ ຍັງໄດ້ປຶກສາຫາລືກ່ຽວກັບການຈັດຕັ້ງປະຕິບັດແຜນແມ່ບົດ ສຳລັບເສົາຄ້ຳປະຊາຄົມການເມືອງ-ຄວາມໝັ້ນຄົງອາຊຽນ 2025 ທີ່ບັນດາຜູ້ນຳອາຊຽນ ໄດ້ຮັບຮອງເອົາໃນກອງປະຊຸມສຸດຍອດອາຊຽນ ຄັ້ງທີ 27 ໃນເດືອນພະຈິກ 

2015ຜ່ານມາ, ໃຫ້ມີປະສິດທິພາບ ແລະ ກອງປະຊຸມໄດ້ສະແດງຄວາມພໍໃຈຕໍ່ຄວາມພະຍາ ຍາມ ແລະ ຂໍ້ລິເລີ່ມຂອງບັນດາປະເທດສະມາຊິກອາຊຽນ ກໍຄືຂະແໜງການພາຍໃນເສົາຄ້ຳປະຊາຄົມການເມືອງ-ຄວາມໝັ້ນຄົງ ໃນການຈັດຕັ້ງປະຕິບັດແຜນແມ່ບົດສຳລັບເສົາຄ້ຳປະຊາຄົມການເມືອງ-ຄວາມໝັ້ນຄົງອາຊຽນ 2025, ພ້ອມທັງຊຸກຍູ້ໃຫ້ບັນດາຂະແໜງການເພີ່ມທະວີໃນການຈັດຕັ້ງປະຕິ ບັດກິດຈະກຳ ທີ່ຢູ່ພາຍໃຕ້ຄວາມຮັບຜິດຊອບຂອງຕົນ ແລະ ມີການປະສານງານຢ່າງເປັນລະບົບທັງພາຍໃນເສົາຄ້ຳປະຊາຄົມການເມືອງ-ຄວາມໝັ້ນຄົງອາຊຽນ ແລະ ເສົາຄ້ຳອື່ນໆທີ່ກ່ຽວຂ້ອງ.

          ໃນໂອກາດນີ້ ທ່ານ ສະເຫລີມໄຊ ກົມມະສິດ ລັດຖະມົນກະຊວງການຕ່າງປະເທດ ແຫ່ງ ສປປ ລາວ ໄດ້ແຈ້ງວ່າ: ສປປ ລາວ ໄດ້ໃຫ້ສັດຕະຍາບັນແກ່ອະນຸສັນຍາເພີ່ມເຕີມກົດບັດອາຊຍນກ່ຽວກັບກົນໄກແກ້ໄຂຂໍ້ຂັດແຍ່ງອາຊຍນ ແລະ ໄດ້ມອບສານໃຫ້ສັດຕະຍາບັນໃຫ້ແກ່ທ່ານເລຂາທິການໃຫຍ່ອາຊຽນເພື່ອເກັບຮັກສາໄວ້ທີ່ກອງເລຂາອາຊຽນ.