60 ບໍລິສັດ ໄດ້ຮັບລາງວັນທຸລະກິດດີເດັ່ນອາຊຽນປີ 2016

          60 ບໍລິສັດ ຈາກ 10 ປະເທດສະມາຊິກອາຊຽນ ໄດ້ຮັບລາງວັນທຸລະກິດດີເດັ່ນອາຊຽນປະຈຳປີ 2016 ໃນຮູບແບບກ່ຽວກັບການເຕີບໂຕ, ການຈ້າງງານຢ່າງມີຫົວຄິດປະດິດສ້າງ ແລະ ການມີຄວາມຮັບຜິດຊອບຕໍ່ສັງຄົມໃນປະຊາຄົມອາຊຽນ ລວມທັງປະເທດເພື່ອມິດຂອງອາຊຽນ. ພິທີມອບລາງວັນດັ່ງກ່າວໄດ້ຈັດຂຶ້ນຕອນຄ່ຳຂອງວັນທີ 5 ກັນຍານີ້, ຢູ່ໂຮງແຮມ ເມືອງແທງ ນະຄອນຫລວງວຽງຈັນ, ໂດຍມີທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ມີບັນດາລັດຖະມົນຕີຈາກອາຊຽນ ແລະ ພາກສ່ວນທຸລະກິດຈາກອາຊຽນເຂົ້າຮ່ວມເປັນຈຳນວນຫລວງຫລາຍ.

          ລາງວັນດີເດັ່ນອາຊຽນ ປະຈຳປີ ທີ່ໄດ້ຮັບການຄັດເລືອກໃນປີ 2016ນີ້, ປະກອບມີ: ລາງວັນທີ່ກ່ຽວຂ້ອງກັບການເຊື່ອມໂຍງບູລິມະສິດດີເດັ່ນຂອງການສ້າງຕັ້ງປະຊາຄົມເສດຖະກິດອາຊຍນ ແລະ

ລາງວັນຂອງຂະແໜງການເຊື່ອມໂຍງບູລິມະສິດດີເດັ່ນຂອງລາວ, ລາງວັນວິສາຫະກິດຂະໜາດນ້ອຍ ແລະ ກາງ ລວມທັງລາງວັນປະເທດສະມາຊິກອາຊຽນໃໝ່ຄື: ລາວ, ກຳປູເຈຍ, ຫວຽດນາມ ແລະ ມຽນມາດີເດັ່ນ. ນອກນີ້ ຍັງມີລາງວັນກ່ຽວກັບນັກທຸລະກິດໜຸ່ມ, ລາງວັນນັກທຸລະກິດຍິງ, ລາງວັນຜູ້ນຳໜ້າເປັນເພດຍິງດີເດັ່ນໃນພາກທຸລະກິດ ລວມທັງລາງວັນທຶນການສຶກສາໃຫ້ແກ່ນັກທຸລະກິດໜຸ່ມ, ນັກທຸລະກິດຍິງ ແລະ ລາງວັນຊະນະເລີດວິສາຫະກິດຂະໜາດນ້ອຍ ແລະ ກາງທີ່ມີຫົວຄິດປະດິດສ້າງດີທີ່ສຸດ. ສະພາທີ່ປຶກສາທຸລະກິດອາຊຽນ ແລະ ສະພາອຸດສາຫະກຳ ແລະ ກາຄ້າແຫ່ງຊາດລາວ ຍັງໄດ້ເປັນເຈົ້າພາບຈັດກອງປະຊຸມປຶກສາຫາລື ກ່ຽວກັບການຈັດຕັ້ງປະຕິບັດການສ້າງຕັ້ງປະຊາຄົມເສດຖະກິດອາຊຍນຮ່ວມກັບກອງເລຂາອາຊຽນ. ພ້ອມນີ້ ຍັງຮັບການສະໜັບສະໜູນຈາກລັດຖະບານອົດສະຕາລີ ໂດຍຜ່ານໂຄງການຮ່ວມມືເພື່ອການພັດທະນາອາຊຽນ-ອົດສະຕາລີ.

          ທ່ານ ທະນົງສິນ ກັນລະຍາ ປະທານນັກທຸລະກິດ ອາຊຍນ ປະຈຳປີ 2016 ກ່າວວ່າ: ລາງວັນທຸລະກິດດີເດັ່ນອາຊຽນ ປະຈຳປີ 2016 ນີ້ ມີຄວາມສຳຄັນຫລາຍເພາະຈະເຮັດໃຫ້ປະເທດສະມາຊິກອາຊຽນມີຄວາມເຂົ້າໃຈເຊິ່ງກັນ ແລະ ກັນ ໃນການດຳເນີນທຸລະກິດ ແລະ ສ້າງຄວາມຮັບຮູ້ກ່ຽວກັບອາຊຽນໃນການສ້າງປະຊາຄົມທາງເສດຖະກິດຮ່ວມກັນ ກໍຄືການເຊື່ອມໂຍງເຂົ້າຫາສາກົນໃຫ້ນັບມື້ຫລາຍຂຶ້ນ, ພ້ອມນີ້ຍັງເຮັດໃຫ້ຜູ້ເຂົ້າຮ່ວມໃນງານທຸລະກິດຄັ້ງນີ້ ໄດ້ເຂົ້າໃຈກ່ຽວກັບການຕະຫລາດ ກໍຄືຮູບແບບ ແລະ ວິທີການຕ່າງໆໃນການເຂົ້າຫາວິສາຫະກິດຂະໜາດນ້ອຍ ແລະ ກາງໃນບັນດາປະເທດ ສະມາຊິກອາຊຽນດ້ວຍກັນ.