ອາຊຽນຮັບເອົາຊີເລ, ເອຢິບ ແລະ ມາຣົກ ເຂົ້າເປັນພາຄີສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້

          ໂດຍສືບຕໍ່ການຕົກລົງຂອງກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49 ໃນເດືອນກໍລະກົດ 2016, ພິທີລົງນາມຮັບຮອງເອົາປະເທດຊີເລ, ເອຢິບ ແລະ ມາຣົກ ເຂົ້າເປັນພາຄີສົນທິ ສັນ ຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້ (TAC), ໄດ້ມີຂຶ້ນໃນຕອນເຊົ້າວັນທີ 6 ກັນຍານີ້, ທີ່ນະຄອນຫລວງວຽງຈັນ ລະຫວ່າງລັດຖະມົນຕີຕ່າງປະເທດອາຊຽນ ແລະ ລັດຖະມົນຕີຕ່າງປະເທດຂອງ 3 ປະເທດດັ່ງກ່າວ, ຊຶ່ງສົນທິສັນຍາສະບັບນີ້ ມີຜົນບັງຄັບໃຊ້ນັບແຕ່ປີ 1976 ການເຂົ້າເປັນພາຄີສົນທິສັນຍາດັ່ງກ່າວຂອງ ຊີເລ, ເອຢິບ ແລະ ມາຣົກ ໄດ້ເຮັດໃຫ້ຈຳນວນປະເທດພາຄີຂອງສົນທິສັນຍານີ້ ເພີ່ມຂຶ້ນຈາກ 32 ປະເທດມາເປັນ 35 ປະເທດ ຊຶ່ງເປັນການຢັ້ງຢືນເຖິງຄວາມສຳຄັນຂອງສົນທິສັນຍາດັ່ງ

ກ່າວຕະຫລອດ 40 ປີທີ່ຜ່ານມາ ແລະ ໃນຕໍ່ໜ້າ ທີ່ເປັນກົດແຫ່ງການປະ ພຶດໃນການພົວພັນລະຫວ່າງລັດຕໍ່ລັດ ຂອງບັນດາປະເທດໃນພາກພື້ນ ກໍຄືການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ການຮ່ວມມືໃນພາກພື້ນ ແລະ ໃນໂລກ.

          ອາຊຽນ ຈະສືບຕໍ່ພິຈາລະນາການສະໝັກເຂົ້າເປັນພາຄີສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້ ໂດຍສອດຄ່ອງກັບລະບຽບການກ່ຽວກັບການເຂົ້າເປັນພາຄີຂອງສົນ ທິສັນຍາດັ່ງກ່າວ.