ນາຍົກລັດຖະມົນຕີເປັນປະທານກອງປະຊຸມສຸດຍອດອາຊຽນກັບຄູ່ເຈລະຈາແລະກອງປະຊຸມສຸດຍອດອາຊຽນ+3

   ໃນວັນທີ 7 ກັນຍາ 2016, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ສືບຕໍ່ ເປັນປະທານກອງປະຊຸມສຸດຍອດ ລະຫວ່າງອາຊຽນ ກັບບັນດາຄູ່ຮ່ວມເຈລະຈາຄື: ສປ ຈີນ, ຍີ່ປຸ່ນ, ສ.ເກົາຫລີ, ອົດສະຕຣາລີ, ກອງປະຊຸມສຸດຍອດອາຊຽນ-ສະຫະປະຊາຊາດ ແລະ ກອງປະຊຸມສຸດຍອດອາຊຽນ+3 ເຊິ່ງໄດ້ຈັດ ຂຶ້ນທີ່ຫໍປະຊຸມແຫ່ງຊາດ.

   ສຳລັບກອງປະຊຸມສຸດຍອດ ອາຊຽນ-ຈີນ ຄັ້ງທີ 19 ແມ່ນເພື່ອສະເຫລີມສະຫລອງການພົວພັນ ອາຊຽນ-ຈີນ ຄົບຮອບ 25 ປີ (1991-2016) ໂດຍໄດ້ຮ່ວມກັນຮັບຊົມວິດີໂອ ແລະ ເປີດປຶ້ມ 25 ປີ ການຮ່ວມມືອາຊຽນ-ຈີນ. ສອງຝ່າຍໄດ້ຕີລາຄາສູງຕໍ່ໝາກຜົນຂອງການຮ່ວມມື ນັບຕັ້ງແຕ່ໄດ້ສ້າງຕັ້ງສາຍພົວພັນນຳກັນແຕ່ປີ 1991 ເຊິ່ງສາມາດຍາດໄດ້ຜົນສຳເລັດຫລາຍດ້ານ. ອັນສຳຄັນ ສປ ຈີນ ເປັນປະເທດຄູ່

ເຈລະຈາທຳອິດທີ່ເຂົ້າເປັນພາຄີຂອງສົນທິສັນຍາໄມຕີຈິດ ແລະ ການຮ່ວມມືອາຊີຕາເວັນອອກສ່ຽງໃຕ້ ແລະ ເປັນປະເທດຄູ່ຮ່ວມຍຸດທະສາດທຳອິດຂອງ ອາຊຽນ. ບັນດາຜູ້ນຳສອງຝ່າຍໄດ້ເຫັນດີເພີ່ມທະວີການຮ່ວມມື ເພື່ອບັນລຸມູນຄ່າການຄ້າໃຫ້ໄດ້ 1.000 ຕື້ໂດລາສະຫະລັດ ໃນປີ 2020 ແລະ ໄດ້ຮັບຮອງເອົາ 4 ເອກະສານສຳຄັນດັ່ງນີ້:  ຖະແຫລງການຮ່ວມ ຂອງກອງປະຊຸມສຸດຍອດສະເຫລີມສະຫລອງການພົວພັນຮ່ວມມືອາຊຽນ-ຈີນ ຄົບຮອບ 25 ປີ, ຖະແຫລງການຮ່ວມລະຫວ່າງ ອາຊຽນ ແລະ ຈີນ ວ່າດ້ວຍການຮ່ວມມືສົ່ງເສີມການຮ່ວມມື ເພື່ອສ້າງຂີດຄວາມສາມາດດ້ານການຜະລິດ, ຖະແຫລງຮ່ວມວ່າດ້ວຍການຈັດຕັ້ງປະຕິບັດລະບຽບການປະພຶດໃນກໍລະນີມີ ການປະເຊີນໜ້າທາງອາກາດ ແລະ ທະເລຢູ່ທະເລຈີນໃຕ້ ແລະ ລະບຽບການສຳລັບສາຍດ່ວນລະຫວ່າງຫົວໜ້າເຈົ້າໜ້າທີ່ອາວຸໂສ ກະຊວງການຕ່າງ ປະເທດຂອງບັນດາປະເທດສະມາຊິກອາຊຽນ ແລະ ຈີນ ສຳລັບກໍລະນີສຸກເສີນທາງທະເລໃນການຈັດຕັ້ງປະຕິບັດຖະແຫລງການວ່າດ້ວຍການປະພຶດຂອງບັນດາຝ່າຍທະເລຈີນໃຕ້. ນອກຈາກນັ້ນ ກໍໄດ້ເຫັນດີສືບຕໍ່ຈັດຕັ້ງປະຕິບັດບັນດາ ກິດຈະກຳສະເຫລີມສະຫລອງການຮ່ວມມື ອາຊຽນ-ຈີນ ແລະ ກຳນົດເອົາປີ 2017 ເປັນປີແຫ່ງການຮ່ວມມືດ້ານທ່ອງທ່ຽວອາຊຽນ-ຈີນ.

   ກອງປະຊຸມສຸດຍອດອາຊຽນ-ຍີ່ປຸ່ນ ຄັ້ງທີ 19 ໄດ້ຕີລາຄາສູງຕໍ່ການຮ່ວມມືສອງຝ່າຍ ເຊິ່ງໄດ້ຮັບຜົນສຳເລັດຫລາຍດ້ານ ໂດຍຜ່ານການຈັດຕັ້ງປະຕິບັດຖະແຫລງການວິໄສທັດອາຊຽນ-ຍີ່ປຸ່ນ ວ່າດ້ວຍມິດຕະພາບ ແລະ ການ ຮ່ວມມື ແລະ ກິດຈະກຳຮ່ວມມືຕ່າງ. ຜູ້ນຳອາຊຽນໄດ້ສະແດງຄວາມຂອບໃຈຕໍ່ການປະກອບສ່ວນເຂົ້າໃນການສ້າງຕັ້ງປະຊາຄົມອາຊຽນ-ຍີ່ປຸ່ນ ໂດຍສະເພາະ ແມ່ນການຊ່ວຍເຫລືອໃນດ້ານການພັດທະນາຊັບພະຍາກອນມະນຸດ, ການສ້າງຂີດຄວາມອາດສາມາດໃຫ້ວິສາຫະກິດຂະໜາດນ້ອຍ ແລະ ກາງ, ການຈັດຕັ້ງປະຕິບັດແຜນແມ່ບົດອາຊຽນ ແລະ ຂໍ້ລິເລີ່ມ ເພື່ອການເຊື່ອມຈອດອາຊຽນ. ຍີ່ປຸ່ນຈະສືບຕໍ່ໃຫ້ການຊ່ວຍເຫລືອ ແລະ ສະໜັບສະໜູນການເຊື່ອມຈອດອາ

ຊຽນ ແລະ ຮັດແຄບຄວາມແຕກໂຕນພາຍໃນອາຊຽນ ໂດຍຜ່ານການຈັດຕັ້ງປະ ຕິບັດແຜນແມ່ບົດ ເພື່ອການເຊື່ອມຈອດອາຊຽນ 2025 ແລະ ແຜນວຽກຂໍ້ລິເລີ່ມເພື່ອການເຊື່ອມໂຍງອາຊຽນໄລຍະສາມ (2016-2020) ລວມທັງຂໍ້ລິເລີ່ມໃໝ່ຂອງຍີ່ປຸ່ນໃນການເປັນຄູ່ຮ່ວມເພື່ອພື້ນຖານໂຄງລ່າງທີ່ໄດ້ມາດຕະຖານເພື່ອສະໜອງທຶນໃຫ້ແກ່ການພັດທະນາພື້ນຖານໂຄງລ່າງໃນພາກພື້ນ. ນອກນັ້ນ, ຍີ່ປຸ່ນຍັງຈະໃຫ້ການຊ່ວຍເຫລືອໃນດ້ານການພັດທະນາຊັບພະຍາກອນມະນຸດ, ສາທາລະນະສຸກ, ການພັດທະນາແມ່ຍິງ ແລະ ເດັກນ້ອຍ, ການສຶກສາ, ນະວັດຕະກຳ ແລະ ອື່ນໆ.

   ກອງປະຊຸມສຸດຍອດອາຊຽນ-ສ.ເກົາຫລີຄັ້ງທີ 18 ໄດ້ສະແດງຄວາມເພິ່ງພໍໃຈຕໍ່ຄວາມຄືບໜ້າໃນການຈັດຕັ້ງຜັນຂະຫຍາຍບັນດາຂໍ້ຕົກລົງ ແລະ ກິດຈະກຳຮ່ວມມືພາຍໃຕ້ປະຕິບັດແຜນປະຕິບັດງານອາຊຽນ-ສ.ເກົາຫລີ ໄລຍະປີ 2016-2020. ຜູ້ນຳອາຊຽນ-ສ.ເກົາຫລີ ໄດ້ເຫັນດີເພີ່ມທະວີການຮ່ວມມືດ້ານການພັດທະນາວິສາຫະກິດຂະໜາດນ້ອຍ ແລະ ກາງ, ການຮ່ວມມືລະຫວ່າງ ພາກທຸລະກິດ, ການເຊື່ອມຈອດ, ການທ່ອງທ່ຽວ ແລະ ຂົງເຂດອື່ນໆທີ່ທັງສອງຝ່າຍມີທ່າແຮງ ເພື່ອບັນລຸຄາດໝາຍມູນຄ່າການຄ້າ 200 ຕື້ໂດລາສະຫະລັດ ໃນປີ 2020. ກອງປະຊຸມຍັງໄດ້ເນັ້ນໜັກເຖິງຄວາມສຳຄັນໃນການເສີມຂະຫຍາຍການຮ່ວມມືໃນຂົງເຂດວັດທະນະທຳ ແລະ ເຫັນດີວຽກງານກັນຢ່າງໃກ້

ຊິດ ເພື່ອຈັດຕັ້ງປະຕິບັດປີແລກປ່ຽນວັດທະນະທຳ ອາຊຽນ-ສ.ເກົາຫລີ ແລະ ເປີດ ສູນວັດທນະທຳອາຊຽນຢູ່ແຂວງປູຊານ, ສ.ເກົາຫລີ ຢ່າງເປັນທາງການໃນປີ 2017.

  ກອງປະຊຸມສຸດຍອດອາຊຽນ-ອົດສະຕຣາລີ ແບບປົກກະຕິທຸກໆສອງປີ ໄດ້ຈັດຂຶ້ນເປັນຄັ້ງທຳອິດຫລັງຈາກທີ່ສອງຝ່າຍໄດ້ຍົກລະດັບການພົວພັນຂຶ້ນເປັນຄູ່ຮ່ວມຍຸດທະສາດໃນປີ 2014 ແລະ ເຫັນດີຈັດກອງປະຊຸມລະດັບສຸດຍອດໃນປີ 2015 ທີ່ປະເທດມາເລເຊຍ. ກອງປະຊຸມໄດ້ສະແດງຄວາມເພິ່ງພໍໃຈຕໍ່ການພົວພັນຮ່ວມມືອາຊຽນ-ອົດສະຕຣາລີ ຕະຫລອດໄລຍະ 4 ທົດສະວັດຜ່ານມາ, ເຊິ່ງອົດສະຕຣາລີໄດ້ໃຫ້ການຊ່ວຍເຫລືອ ແລະ ສະໜັບສະໜູນ ໃນຂົງເຂດຕ່າງໆ ເຊັ່ນ: ການສຶກສາ, ການສ້າງຂີດຄວາມອາດສາມາດດ້ານສະຖາບັນໃຫ້ແກ່ກອງເລຂາ ອາຊຽນ, ການເຊື່ອມໂຍງພາກພື້ນ, ການເຊື່ອມຈອດ, ການຮັດແຄບຄວາມແຕກໂຕນດ້ານການພັດທະນາ ແລະ ອື່ນໆ. ກອງປະຊຸມໄດ້ໃຫ້ຄຳໝາຍໝັ້ນ ທີ່ຈະຮັດແໜ້ນການເປັນຄູ່ຮ່ວມຍຸດທະສາດ ອາຊຽນ-ອົດສະຕຣາລີ ໃນຕໍ່ໜ້າ ເພື່ອຜົນປະໂຫຍດຮ່ວມກັນ, ພ້ອມນັ້ນບັນດາຜູ້ນຳອາຊຽນ ແລະ ອົດສະຕຣາລີ ຍັງໄດ້ຮັບຮອງເອົາຖະແຫລງ ການຮ່ວມອາຊຽນ-ອົດສະຕຣາລີ ວ່າດ້ວຍການຮ່ວມມືເພື່ອຕ້ານການກໍ່ການຮ້າຍສາກົນ.

   ກອງປະຊຸມສຸດຍອດອາຊຽນ-ສະຫະປະຊາຊາດ ຄັ້ງທີ 8 ໄດ້ສະແດງຄວາມເພິ່ງພໍໃຈຕໍ່ໝາກຜົນຂອງການຮ່ວມມືອາຊຽນ-ສປຊ ໃນໄລຍະຜ່ານມາ ໂດຍສະເພາະແມ່ນການຮ່ວມມືລະຫວ່າງກອງເລຂາອາຊຽນກັບກອງເລຂາອົງການສະຫະປະຊາຊາດ ແລະ ແຜນວຽກອື່ນໆ ໂດຍຜ່ານການຈັດຕັ້ງຜັນຂະຫຍາຍຖະແຫລງການຮ່ວມວ່າດ້ວຍການເປັນຄູ່ຮ່ວມມືຮອບດ້ານລະຫວ່າງ ອາຊຽນ ແລະ ສປຊ. ກອງປະຊຸມໄດ້ເຫັນດີ ໃຫ້ມີການປະສານງານລະຫວ່າງສອງກອງເລຂາຢ່າງໃກ້ຊິດ ແລະ ເປັນລະບົບຂຶ້ນຕື່ມ ເພື່ອເຮັດໃຫ້ກິດຈະກຳຮ່ວມມືຕ່າງໆ ໄດ້ຮັບການຈັດຕັ້ງຜັນຂະຫຍາຍຢ່າງມີປະສິດທິຜົນ ພ້ອມທັງສືບຕໍ່ເພີ່ມທະວີການຮ່ວມມື ເພື່ອຮັບປະກັນການຈັດຕັ້ງຜັນຂະຫຍາຍວິໄສທັດ ປະຊາຄົມອາຊຽນ 2025 ແລະ ວາລະ 2030 ເພື່ອການພັດທະນາແບບຍືຍຍົງ ໃຫ້ມີຄວາມ ກົມກຽວກັນ. ກອງປະຊຸມໄດ້ຮັບຊາບແຜນປະຕິບັດງານ ເພື່ອຈັດຕັ້ງປະຕິບັດຖະແຫລງການຮ່ວມວ່າດ້ວຍການເປັນຄູ່ຮ່ວມຮອບດ້ານລະຫວ່າງ ອາຊຽນ-ສປຊ (2016-2020) .

   ໃນກອງປະຊຸມສຸດຍອດອາຊຽນ+3 ຄັ້ງທີ 19, ບັນດາຜູ້ນຳອາຊຽນ ແລະ ປະເທດບວກສາມຄື: ສປ ຈີນ, ຍີ່ປຸ່ນ ແລະ ສ.ເກົາຫລີ ໄດ້ສະແດງຄວາມຍິນດີ ທີ່ເຫັນວ່າການຮ່ວມມືອາຊຽນ+3 ໄດ້ຮັບໝາກຜົນສໍາເລັດຫລາຍດ້ານ ໂດຍສະເພາະແມ່ນດ້ານການເງິນ ແລະ ຄວາມໝັ້ນຄົງດ້ານສະບຽງອາຫານ, ອັນໄດ້ປະກອບສ່ວນເຂົ້າໃນການຄ້ຳປະກັນສະຖຽນສະພາບດ້ານການເງິນ ແລະ ການເຕີບໂຕແບບຍືນຍົງໃນພາກພື້ນ. ກອງປະຊຸມເຫັນດີສືບຕໍ່ຮັດແໜ້ນການຮ່ວມມືໃນຂົງເຂດດັ່ງກ່າວ ໂດຍຜ່ານຂໍ້ລິເລີ່ມຊຽງໃໝ່ຫລາຍຝ່າຍ, ຫ້ອງການຕິດຕາມເສດຖະກິດມະຫາພາກອາຊຽນ+3, ຂໍ້ລິເລີ່ມພັນທະບັດອາຊີ, ເຄື່ອງມືຄ້ຳປະກັນສິນເຊື່ອ ແລະ ການລົງທຶນ ແລະ ຄັງເຂົ້າສຸກເສີນອາຊຽນ +3, ບັນດາຜູ້ນຳອາຊຽນ+3 ໄດ້ຮັບຊາບບົດລາຍງານຄວາມຄືບໜ້າໃນການສ້າງແຜນປະຕິບັດງານ ເພື່ອຈັດຕັ້ງຜັນຂະຫຍາຍບັນດາຂໍ້ສະເໜີແນະ ຂອງໜ່ວຍງານວິໄສທັດອາຊີຕາເວັນອອກໄລຍະສອງ ແລະ ຮັບຮອງເອົາ: ຖະແຫລງການວ່າດ້ວຍການສົ່ງເສີມການຮ່ວມມືເພື່ອການພັດທະນາແບບຍືນຍົງທີ່ສະເໜີໂດຍ ສ ປປ ລາວ ແລະ ຖະແຫລງການວ່າດ້ວຍການສົ່ງເສີມສຸຂະພາບຜູ້ສູງອາຍຸ, ເຊິ່ງບັນດາຖະ

ແຫລງການທີ່ໄດ້ຮັບຮອງເອົາເປັນເອກະສານຍຸດທະສາດສຳຄັນ ເພື່ອສົ່ງເສີມການພັດທະນາແບບຍືນຍົງ ແລະ ຄວາມຢູ່ດີກິນດີຂອງປະຊາຊົນຢູ່ໃນພາກພື້ນ. ກອງປະຊຸມຍັງໄດ້ປຶກສາຫາລືກ່ຽວກັບການຈັດກິດຈະກຳຕ່າງໆ ເພື່ອສະເຫລີມສະຫລອງການຮ່ວມມືອາຊຽນ+3 ຄົບຮອບ 20 ປີ ໃນປີ 2017.