ນາຍົກລັດຖະມົນຕີມອບສານໃຫ້ສັດຕະຍາບັນການປ່ຽນແປງດິນຟ້າອາກາດຕໍ່ອົງການ ສປຊ

          ໃນວັນທີ 7 ກັນຍາ 2016, ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ມອບສານໃຫ້ສັດຕະຍາບັນ ແກ່ສັນຍາປາຣີ ວ່າດ້ວຍການປ່ຽນແປງດິນຟ້າອາກາດ ຢ່າງເປັນທງການ ໃຫ້ແກ່ທ່ານ ບັນກີມູນ ເລຂາທິການໃຫຍ່ອົງການສະຫະປະຊາຊາດ (ສປຊ) ໃນໂອກາດເຂົ້າຮ່ວມ ກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ແຕ່ວັນທີ 6-8 ກັນຍາ 2016 ໂດຍມີບັນດາລັດຖະມົນຕີກ່ຽວຂ້ອງ ແລະ ອົງການຈັດຕັ້ງສາກົນເຂົ້າຮ່ວມ.

          ທ່ານນາຍົກລັດຖະມົນຕີ ທອງລຸນ ສີສຸລິດ ກ່າວວ່າ: ການປ່ຽນແປງຂອງດິນຟ້າອາກາດ ໄດ້ກາຍເປັນສິ່ງທ້າທາຍຕໍ່ການພັດທະນາແບບຍືນຍົງ ຂອງບັນດາປະເທດໃນໂລກ ກໍຄືຊີວິດການເປັນຢູ່ຂອງປະຊາຊົນ, ສະນັ້ນ ລັດຖະບານລາວຈຶ່ງໄດ້ກະກຽມ ແລະ ສະເໜີບົດລາຍງານແຫ່ງຊາດ ໃນການປະກອບສ່ວນແກ້ໄຂ ບັນຫາການປ່ຽນແປງດິນຟ້າອາກາດ, ພ້ອມທັງກໍານົດເອົາບັນຫາການປ່ຽນແປງດິນຟ້າ

ອາກາດ, ການຫລຸດຜ່ອນຄວາມສ່ຽງ ແລະ ຄວບຄຸມໄພພິບັດທຳມະຊາດ ແລະ ເປົ້າໝາຍການພັດທະນາແບບຍືນຍົງ ເຊື່ອມສານເຂົ້າໃນແຜນພັດທະນາເສດຖະກິດ-ສັງຄົມຂອງຕົນ ໂດຍເຫັນໄດ້ເຖິງຄວາມໝາຍສຳຄັນ ຂອງສັນຍາປາຣີ ດັ່ງກ່າວ ແລະ ຍ້ອນມີຄວາມໝາຍໝັ້ນ ໃນການຮ່ວມມືກັບວົງຄະນາຍາດສາກົນໃນການແກ້ໄຂບັນຫາໂລກຮ້ອນ, ລັດຖະບານລາວ ຈຶ່ງໄດ້ລົງນາມ ແລະ ໃຫ້ສັດຕະຍາບັນສັນຍາປາຣີ ວ່າດ້ວຍການປ່ຽນແປງດິນຟ້າອາກາດ ເຊິ່ງຈະເປັນການປະກອບສ່ວນໃຫ້ສັນຍາດັ່ງກ່າວມີຜົນບັງຄັບໃຊ້ໂດຍໄວ. ທ່ານນາຍົກລັດຖະມົນຕີ ໄດ້ກ່າວເນັ້ນວ່າ ພິທີມອບສານໃຫ້ສັດຕະຍາບັນແກ່ສັນຍາປາຣີຄັ້ງນີ້ ເປັນເຫດການປະຫວັດສາດທີ່ມີຄວາມໝາຍສຳຄັນຍິ່ງສຳລັບ ສປປ ລາວ ແລະ ທັງເປັນການສະແດງເຖິງຄວາມໝາຍໝັ້ນໃນການປະຕິບັດພັນທະສາກົນຂອງ ສປປ ລາວ.

          ທ່ານ ບັນກີມູນ ໄດ້ກ່າວເຖິງຄວາມສຳຄັນຂອງສັນຍາປາຣີ ພ້ອມທັງສະແດງຄວາມຊົມເຊີຍ ແລະ ຍິນດີຕໍ່ລັດຖະບານ ສປປ ລາວ ໄດ້ໃຫ້ສັດຕະຍາບັນສັນຍາປາຣີ ວ່າດ້ວຍການປ່ຽນແປງຂອງດິນຟ້າອາກາດ ຈາກນາຍົກລັດຖະມົນຕີ ແຫ່ງ ສປປ ລາວ ເຊິ່ງເປັນການມອບໃນລະດັບຜູ້ນຳທ່ານທີ 3 ຂອງໂລກ ພາຍຫລັງທີ່ເປັນເລຂາທິການໃຫຍ່ ຖັດຈາກຜູ້ນຳ ສປ ຈີນ ແລະ ສະຫະລັດອາເມລິກາ. ທ່ານ ບັນກີມູນ ຍັງໄດ້ສະແດງຄວາມຊົມເຊີຍທີ່ ສປປ ລາວ ເປັນປະເທດທຳອິດໃນອາຊຽນ ແລະ ເປັນປະເທດທີ 27 ຂອງໂລກ ທີ່ໄດ້ຮັບສັດຕະຍາບັນປາຣີ ໂດຍເຊື່ອໝັ້ນວ່າ ປະເທດຕ່າງໆໃນໂລກ ຈະເລັ່ງໃຫ້ສັດຕະຍາບັນແກ່ສັນຍາດັ່ງກ່າວໂດຍໄວ ເພື່ອໃຫ້ສັນຍາປາຣີມີຜົນບັງຄັບໃຊ້ໃນທ້າຍປີນີ້.

          ສັນຍາປາຣີ ໄດ້ຖືກຮັບຮອງເອົາໂດຍກອງປະຊຸມລັດພາຄີສົນທິສັນຍາ ວ່າດ້ວຍການປ່ຽນ ແປງດິນຟ້າອາກາດ ຄັ້ງທີ 21 ທີ່ປະເທດຝຣັ່ງ ໃນທ້າຍປີ 2015 ແລະ ເປີດໃຫ້ລົງນາມ ແຕ່ຕົ້ນປີ 2016 ຫາ ຕົ້ນປີ 2017 ທີ່ສຳນັກງານໃຫຍ່ອົງການ ສປຊ ທີ່ນະຄອນນິວຢອກ. ສັນຍາດັ່ງກ່າວຈະມີຜົນບັງຄັບໃຊ້ກໍຕໍ່ເມື່ອມີ 55 ປະເທດໃຫ້ສັດຕະຍາບັນ ແລະ ຕ້ອງມີອັດຕາການປ່ອຍອາຍພິດເຮືອນແກ້ວລວມກັນໃຫ້ໄດ້ຢ່າງໜ້ອຍ 55% ຂອງອັດຕາການປ່ອຍອາຍພິດເຮືອນແກ້ວ ທັງໝົດໃນທົ່ວໂລກ.