ພິທີຕ້ອນຮັບຢ່າງເປັນທາງການໄດ້ຈັດຂຶ້ນໃນວັນທີ 8 ກັນຍາ ທີ່ສໍານັກງານນາຍົກລັດຖະ ມົນຕີຢ່າງສົມກຽດ ແລະ
ເຕັມໄປດ້ວຍບັນຍາກາດແຫ່ງໄມຕີຈິດມິດຕະພາບອັນອົບອຸ່ນ. ຫລັງຈາກນັ້ນ
ກໍໄດ້ມີການພົບປະສອງຝ່າຍ ລາວ-ຈີນ. ໃນການພົບປະຄັ້ງນີ້, ສອງຝ່າຍໄດ້ສະແດງຄວາມຍິນດີ ແລະ
ຕີລາຄາສູງຕໍ່ການພົວພັນຮ່ວມມື ລະຫວ່າງສອງພັກ-ສອງລັດ ແລະ ປະຊາຊົນສອງຊາດ ໃນໄລຍະຜ່ານມາທີ່ໄດ້ຮັບການເສີມຂະຫຍາຍຢ່າງບໍ່
ຢຸດຢັ້ງ
ແລະ ລົງເລິກໃນວຽກງານຕົວຈິງຫລາຍດ້ານ ເຊິ່ງເຫັນໄດ້ຈາກການແລກປ່ຽນຢ້ຽມຢາມເຊິ່ງກັນ ແລະ
ກັນ ຂອງຄະນະຜູ້ແທນຂັ້ນສູງຂອງສອງປະເທດ ໂດຍສະເພາະ ແມ່ນການຢ້ຽມຢາມຢ່າງເປັນທາງການທີ່
ສປ ຈີນ ຂອງເລຂາທິການໃຫຍ່, ປະທານປະເທດແຫ່ງ ສປປ ລາວ ໃນເມື່ອບໍ່ດົນມານີ້.
ສອງຝ່າຍເຫັນດີສືບຕໍ່ຊຸກຍູ້ຮ່ວມກັນໃນການພົວພັນຮ່ວມມືທາງດ້ານເສດຖະກິດ, ການຄ້າ, ການລົງທຶນ,
ການທ່ອງທ່ຽວ ແລະ ດ້ານອື່ນໆ, ເຊິ່ງໃນປີຜ່ານມາມູນຄ່າການຄ້າສອງຝ່າຍໄດ້ບັນລຸຫລາຍກວ່າ 3 ຕື້ໂດລາສະຫະລັດ, ການລົງທຶນຂອງບັນດາວິສາຫະກິດຂອງຈີນ ຢູ່ລາວ
ຈັດຢູ່ໃນອັນດັບ 1 ລວມມີ 765 ໂຄງການ, ລວມມູນຄ່າ 7 ຕື້ກວ່າໂດລາສະຫະລັດ,
ຈໍານວນນັກທ່ອງທ່ຽວຈີນ ເຂົ້າມາ ລາວ ຫລາຍກວ່າ 1 ລ້ານເທື່ອຄົນ. ໃນນີ້, ໂຄງການຮ່ວມມືທີ່ພົ້ນເດັ່ນ
ແລະ ເປັນລັກສະນະປະຫວັດສາດ ແຫ່ງການພົວພັນສອງຝ່າຍ ລາວ-ຈີນ
ແມ່ນຜົນສໍາເລັດຂອງການສົ່ງດາວທຽມລາວດວງທໍາອິດຂຶ້ນສູ່ວົງໂຄຈອນ ແລະ
ໂຄງການກໍ່ສ້າງທາງລົດໄຟ ລາວ-ຈີນ; ສອງຝ່າຍເຫັນດີ ຈະຈັດກິດຈະກໍາຕ່າງໆຮ່ວມກັນຢ່າງເປັນຂະບວນຟົດຟື້ນ
ເພື່ອສະເຫລີມສະຫລອງວັນສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 55 ປີ ໃນປີ 2016 ນີ້ໃຫ້ມີຄວາມໝາຍສໍາຄັນ
ແລະ ມີຜົນສໍາເລັດດີ; ເຫັນດີຊຸກຍູ້ພາກສ່ວນກ່ຽວຂ້ອງຂອງສອງຝ່າຍ ສືບຕໍ່ເອົາໃຈໃສ່ຈັດຕັ້ງປະຕິບັດບັນດາແຜນວຽກຕ່າງໆຮ່ວມກັນ
ໂດຍສະເພາະແມ່ນການຮ່ວມມືກັນຄົ້ນຄ້ວາ ເພື່ອເຮັດໃຫ້ແຜນພັດທະນາເສດຖະກິດ-ສັງຄົມ 5
ປີຄັ້ງທີ 8 ຂອງລາວ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 13 ຂອງຈີນ
ເຊື່ອມເຂົ້າກັນໂດຍປິ່ນອ້ອມຍຸດທະສາດ “ໜຶ່ງແລວທາງ”
ຂອງຈີນວາງອອກ ກັບນະໂຍບາຍຫັນປະເທດລາວ ຈາກປະເທດທີ່ບໍ່ມີທາງອອກສູ່ທະເລ
ເປັນປະເທດເຊື່ອມຈອດຂອງສປປ ລາວ;
ສອງຝ່າຍເຫັນດີເພີ່ມທະວີການໄປມາຫາສູ່ກັນ ລະຫວ່າງການນໍາຂັ້ນສູງ,
ສືບຕໍ່ເສີມຂະຫຍາຍການຮ່ວມມືໃນການແລກປ່ຽນທິດສະດີ ແລະ
ຈັດກອງປະຊຸມສໍາມະນາທິດສະດີປະຈໍາປີ ລະຫວ່າງພັກ,
ການແລກປ່ຽນຄະນະພະນັກງານໄປທັດ ສະນະສຶກສາ ແລະ ຝຶກອົບຮົມໃນຂົງເຂດຕ່າງໆ
ລະຫວ່າງອົງການຈັດຕັ້ງອ້ອມຂ້າງສູນກາງ, ຂັ້ນທ້ອງຖິ່ນ ແລະ
ອົງການຈັດຕັ້ງມະຫາຊົນຂອງສອງພັກ ໃຫ້ກ້າວສູ່ທັງທາງເລິກ ແລະ ທາງກວ້າງ, ຍົກສູງຄຸນນະພາບ
ແລະ ລະດັບການຮ່ວມມືຕາມທິດແຫ່ງການເພີ່ມທະວີ ການຮ່ວມມືຍຸດທະສາດຮອບດ້ານຍາວນານ
ແລະ ພົວພັນຕາມທິດ 4 ດີ. ພ້ອມນັ້ນ, ສອງຝ່າຍຕີລາຄາສູງຕໍ່ການຮ່ວມມືຢ່າງມີປະສິດທິຜົນຂອງສອງຝ່າຍໃນວຽກງານພາກພື້ນ
ແລະ ສາກົນ.
No comments:
Post a Comment