ສະມາຄົມການແພດຝຣັ່ງ-ລາວສືບຕໍ່ຊ່ວຍຍົກລະດັບວິຊາການດ້ານການແພດ

          ສະມາຄົມການແພດຝຣັ່ງ-ລາວ, ໄດ້ຕົກລົງໃຫ້ທຶນຊ່ວຍເຫລືອ 5 ແສນກວ່າເອີໂຣ ຫລື ປະ ມານ 5 ຕື້ກວ່າກີບໃນໄລຍະເວລາແຕ່ 2016-2021 ເພື່ອນໍາໃຊ້ເຂົ້າໃນການຍົກລະດັບດ້ານການແພດ-ຜ່າຕັດ ໃຫ້ແກ່ບັນດາແພດໝໍຕາມໂຮງໝໍຕ່າງໆຄື: ໂຮງໝໍມະໂຫສົດ, ມິດຕະພາບ 150 ຕຽງ, ໂຮງໝໍເດັກ, ໂຮງ ໝໍແຂວງຫລວງພະບາງ ແລະ ໂຮງໝໍແຂວງຈໍາປາສັກ. ເພື່ອສ້າງຄວາມອາດສາມາດດ້ານເຕັກນິກວິຊາ ການໃຫ້ແກ່ພະນັກງານສາທາລະນະສຸກຂອງລາວ ແລະ ຊ່ວຍເຫລືອເດັກນ້ອຍທີ່ເປັນພະຍາດຫົວໃຈໃຫ້ໄດ້ຮັບການປິ່ນປົວຫລາຍຂຶ້ນ, ເຊິ່ງກິດຈະກໍາຫລັກຂອງໂຄງການແມ່ນຝຶກອົບຮົມເຕັກນິກດ້ານວິຊາການປີລະ 2 ຄັ້ງໃນຂະແໜງຜ່າຕັດກະດູກ, ຫູ, ດັງເດັກ ແລະ ຫົວ ໃຈເສັ້ນເລືອດ. ພ້ອມທັງກວດບັນດາເດັກນ້ອຍທີ່ມີ

ບັນຫາກ່ຽວກັບພະຍາດຫົວໃຈຢູ່ໂຮງໝໍມະໂຫສົດ, ໂຮງໝໍມິດຕະພາບ, ໂຮງໝໍເດັກ, ໂຮງໝໍແຂວງຫລວງພະບາງ ແລະ ໂຮງໝໍແຂວງຈໍາປາສັກ ເພື່ອໃຫ້ການຊ່ວຍເຫລືອສົ່ງໄປປິ່ນປົວ, ຜ່າຕັດຢູ່ປະເທດຝຣັ່ງ ແລະ ກວດກາຕິດຕາມຄືນບັນດາເດັກນ້ອຍທີ່ໄດ້ຮັບການປິ່ນປົວຜ່ານມາ.

           ພິທີລົງນາມບົດທຶກການຊ່ວຍເຫລືອດັ່ງກ່າວ, ໄດ້ຈັດຂຶ້ນໃນທ້າຍອາທິດຜ່ານມາ ລະຫວ່າງທ່ານ ຈັນພົມມາ ວົງສໍາພັນ ຫົວໜ້າກົມປິ່ນປົວກະຊວງສາທາລະນະສຸກ ແລະ ທ່ານ ອານຟົງ ປລຸກແກເລັກ ປະທານສະມາຄົມການແພດ ຝຮັ່ງ-ລາວ, ໂດຍມີທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ແລະ ພະນັກງານວິຊາການກ່ຽວຂ້ອງເຂົ້າຮ່ວມ.