ກະຊວງການຕ່າງປະເທດຍົກລະດັບຄວາມຮູ້ດ້ານການເງິນຈຸລະພາກ

          ກະຊວງການຕ່າງປະເທດຮ່ວມກັບທະນາຄານແຫ່ງ ສປປ ລາວ ( ທຫລ ) ໄດ້ຈັດຕັ້ງການເຜີຍແຜ່ຄວາມຮູ້ກ່ຽວກັບວຽກງານສະຖາບັນການເງິນຈຸລະພາກຂຶ້ນໃນວັນທີ 29 ກັນຍາ 2016 ທີ່ກະຊວງດັ່ງກ່າວ ພະນັກງານລັດຖະກອນຂະແຫນງການຕ່າງປະ ເທດຮູ້ເລິກເຊິ່ງກ່ຽວກັບຮູບແບບສະຖາບັນການເງິນພາຍໃຕ້ການຄຸ້ມຄອງຂອງ ທຫລ ເຊິ່ງມີສະຖາບັນການເງິນຈຸລະພາກທີ່ຮັບເງິນຝາກ, ແລະ ທີ່ບໍ່ຮັບເງິນຝາກ, ສະຫະກອນສິນເຊື່ອ ແລະເງິນຝາກປະຢັດ,ໂຮງຊວດຈໍາ, ບໍລິສັດເຊົ່າສິນເຊື່ອ ແລະບໍລິສັດໂອນເງິນດ່ວນລະຫວ່າງປະເທດ, ນອກນີ້ຍັງກ່າວເຖິງການດໍາເນີນທຸລະກໍາຂອງສະຖາບັນການ

ເງິນແຕ່ລະຮູບແບບ, ຂັ້ນຕອນຂອງການຂໍອະນຸຍາດດໍາເນີນທຸລະກິດສະຖາບັນການເງິນແລະການຄຸ້ມຄອງສະຖາບັນການເງິນ ເຊິ່ງປະຈຸບັນວຽກງານສະຖາບັນການເງິນຢູ່ໃນທ່ວງທ່າຂະຫຍາຍ ຕົວທັງດ້ານປະລິມານ ແລະ ຄຸນນະພາບ ແນໃສ່ເປັນອີກແຫຼ່ງທຶນທີ່ເຂົ້າຫາງ່າຍ, ສະດວກ ແລະ ວ່ອງ ໄວທັນໃຈ.

            ຂະນະດຽວກັນ ຍັງໄດ້ນໍາສະເໜີຂໍ້ກໍານົດວ່າດ້ວຍການຄຸ້ມຄອງສະຫະກອນສິນເຊື່ອ ແລະເງິນຝາກປະຢັດເພື່ອເປັນການຄຸ້ມຄອງການສ້າງຕັ້ງ ແລະດໍາເນີນທຸລະກິດຂອງບັນດາສະຫະກອນສິນເຊື່ອ ແລະເງິນຝາກປະຢັດໃນ  ລາວ ໂດຍການວາງມາດຕະການ ແນໃສ່ເພື່ອຮັບປະກັນຄວາມໝັ້ນຄົງແລະສອດຄ່ອງກັບການຈັດຕັ້ງປະຕິບັດ ເພາະສະຫະກອນສິນເຊື່ອ ແລະເງິນຝາກປະຢັດແມ່ນການຮ່ວມກຸ່ມຂອງປະຊາຊົນທີ່ໄດ້ຮັບການອະນຸຍາດສ້າງຕັ້ງ ແລະດໍາເນີນທຸລະກິດຈາກ ທຫລ, ນອກນີ້ຍັງມີການເຜີຍແຜ່ຄໍາແນະນໍາການຈັດຕັ້ງປະຕິບັດດໍາລັດວ່າດ້ວຍສະຖາບັນການເງິນຈຸລະພາກ ແລະວຽກງານຕ່າງໆທີ່ກ່ຽວຂ້ອງກັບສະຖາບັນການເງິນ.

          ໃນໂອກາດດັ່ງກ່າວ, ທ່ານຮອງຫົວໜ້າກົມຄຸ້ມຄອງສະຖາບັນການເງິນ ວິສອນ ໄຊສົງຄມ ຍັງຮຽກຮ້ອງມາຍັງນັກສໍາມະນາກອນລວມທັງພົນລະເມືອງລາວທຸກຄົນຈົ່ງຢ່າໃຫ້ຫຼົງເຊື່ອຄໍາໂຄສະນາທີ່ເປັນການຕົວະຍົວະ, ຫຼອກລວງ, ຕົ້ມຕຸນໂດຍຜ່ານຫຼາຍຮູບການໃນນີ້ຜ່ານສື່ອອນລາຍ, ຜ່ານສື່ຕ່າງໆເຊິ່ງພວກເຂົາໄດ້ໂຄສະນາວ່າ: ໃຫ້ມາຮ່ວມລົງທຶນ ແລະຈະໄດ້ຮັບຜົນຕອບແທນສູງກວ່າອັດຕາດອກເບ້ຍທະນາຄານທຸລະກິດ ຫຼື ສະຖາບັນການເງິນ ແລະໃນເມື່ອຫາກພົບເຫັນຂໍໃຫ້ທຸກພາກສ່ວນ ກະລຸນາແຈ້ງການເຄື່ອນໄຫວທຸລະກິດທີ່ໜ້າສົງໃສ ແລະບໍລິການທີ່ເອົາປຽບ ຫຼື ບໍ່ມີຄວາມຍຸຕິທໍາລວມເຖິງການບໍລິການທີ່ບໍ່ມີຄວາມໂປ່ງໃສ ມາຍັງກົມຄຸ້ມຄອງສະຖາບັນການເງິນ ທຫລໂທຣ: 021 265 712-5 ໄດ້ຕາມໂມງເວລາລັດຖະການ.

 # ຂ່າວ-ພາບ: ຣັດສະໝີ ດວງສັດຈະ