ຕຳແລ້ວເອົາຕົວຫລົບໜີຍັງມີຢູ່

          ທ້າຍອາທິດຜ່ານມາ, ຢູ່ເສັ້ນທາງເລກ 9 ເຂດບ້ານອຸດົມໄຊ, ເມືອງພະລານໄຊ ແຂວງສະຫວັນນະເຂດ, ໄດ້ເກີດອຸປະຕິເຫດລົດກະບະຕຳລົດຈັກຢ່າງແຮງ ເຮັດໃຫ້ຜູ້ຂັບຂີ່ລົດຈັກເສຍຊີວິດຄາທີ່ 2 ຄົນ, ສ່ວນຜູ້ຂັບຂີ່ລົດໃຫຍ່ຍັງເອົາຕົວຫລົບໜີ.

          ທ່ານ ພັຕ ນີວັນ ຈູມມະນີວົງ ຫົວໜ້າພະແນກຈະລາຈອນ ປກສ ແຂວງສະຫວັນນະເຂດ ໃຫ້ຮູ້ວ່າ: ເວລາປະມານ 5:00 ໂມງ, ໄດ້ມີລົດກະບະຕຳລົດຈັກຂອງນາງ

ຈັນ ອາຍຸ 24 ປີ ແລະ ມີນາງ ແມ໋ກ ອາຍຸ 30 ປີ ເປັນຜູ້ຊ້ອນທ້າຍ, ໂດຍທັງສອງເປັນປະຊາຊົນຢູ່ບ້ານແກ້ງຫລວງ, ເມືອງພະລານໄຊ ແຂວງສະຫວັນນະເຂດ, ຊຶ່ງເຮັດໃຫ້ຜູ້ຂັບຂີ່ລົດຈັກທັງສອງຄົນເສຍຊີວິດຄາທີ່. ຈາກນັ້ນ ຜູ້ກໍເຫດໄດ້ເອົາຕົວຫລົບໜີ. ຜ່ານການລົງກວດສອບສະຖານທີ່ເກີດເຫດຂອງເຈົ້າໜ້າທີ່ ໄດ້ພົບເຫັນປ້າຍລົດຄັນກໍ່ເຫດ ໝາຍເລກທະບຽນ ກກ 8596 ສະຫວັນນະເຂດ ຕົກເຮ່ຍຢູ່ສະຖານທີ່ດັ່ງກ່າວ, ຈາກນັ້ນ ຈຶ່ງໄດ້ປະສານຫາພາກສ່ວນກ່ຽວຂ້ອງເພື່ອຕິດຕາມ ແລະ ນຳຈັບຕົວຜູ້ກໍ່ເຫດມາດຳເນີນຄະດີຕາມກົດໝາຍໃຫ້ໄດ້ໂດຍໄວ.