ຜົນກອງປະຊຸມໃຫຍ່ຄັ້ງທີ III ຂອງອົງຄະນະພັກສະພາແຫ່ງຊາດ

          ກອງປະຊຸມໃຫຍ່ຄັ້ງທີ III ຂອງຄະນະພັກສະພາແຫ່ງຊາດ, ໄດ້ຈັດຂຶ້ນຢ່າງເປັນທາງການໃນວັນທີ 7 ຕຸລານີ້, ໂດຍການເປັນປະທານຂອງສະຫາຍ ສົມພູ ດວງສະຫວັນ ຮັກສາການເລຂາຄະນະພັກສະພາແຫ່ງຊາດ ແລະ ໃຫ້ກຽດເຂົ້າຮ່ວມໂດຍສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແລະ ສະຫາຍນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ.

           ກອງປະຊຸມໄດ້ຜ່ານບົດລາຍງານການເມືອງໃນໄລຍະ 5 ປີຜ່ານມາຂອງອົງຄະນະພັກສະພາ

ແຫ່ງຊາດ, ເຊິ່ງເຫັນວ່າໄດ້ມີຜົນສໍາເລັດຫລາຍດ້ານປະກອບສ່ວນສໍາຄັນເຂົ້າໃນຜົນການຈັດຕັ້ງປະຕິ ບັດມະຕິກອງປະຊຸມໃຫຍ່ຄັ້ງທີ IX ຂອງພັກ, ໂດຍສະເພາະການສ້າງຄວາມເຂັ້ມແຂງໃຫ້ແກ່ລັດປະຊາ ທິປະໄຕທີ່ປົກຄອງດ້ວຍກົດໝາຍ ແລະ ເພີ່ມປະສິດທິພາບຂອງການບໍລິຫານລັດ, ຢຶດໝັ້ນຫລັກການພັກນໍາພາ ແລະ ລັດຄຸ້ມຄອງສັງຄົມດ້ວຍກົດໝາຍ, ສ້າງເງື່ອນໄຂໃຫ້ແກ່ການພັດທະນາເສດຖະກິດ ແລະ ຫັນປະເທດຫລຸດພົ້ນອອກຈາກສະຖານະພາບດ້ອຍພັດທະນາໃນປີ 2020, ພ້ອມທັງໄດ້ກໍານົດທິດທາງ, ຄາດໝາຍສູ້ຊົນ ແລະ ວຽກງານຈຸດສຸມໃນໄລຍະ 5 ປີຕໍ່ໜ້າ.

             ກອງປະຊຸມໄດ້ພ້ອມກັນໃຊ້ສິດປະຊາທິປະໄຕເລືອກເອົາຄະນະບໍລິຫານງານພັກຊຸດໃໝ່ຈໍານວນ 15 ສະຫາຍຈາກຜູ້ຮັບສະໝັກເລືອກຕັ້ງ 18 ສະຫາຍ, ໂດຍໄດ້ເປັນເອກະສັນເລືອກເອົາສະຫາຍພົນໂທ ແສງນວນ ໄຊຍະລາດ ເປັນເລຂາຄະນະພັກ, ສະຫາຍນາງ ສີໄສ ລືເດດມູນສອນ ເປັນຮອງເລຂາຄະນະພັກ ແລະ ເລືອກເອົາສະຫາຍ ຊົມພູ ດວງສະຫວັນ ເປັນປະທານກວດກາພັກ, ສະຫາຍ ສຸບັນ ສະວະບຸດ ເປັນຮອງ ແລະ ສະຫາຍ ສິນທະລາ ຫລ້າສຸກສະໄໝ ເປັນກໍາມະການ.

             ໃນໂອກາດນີ້, ສະຫາຍ ບຸນຍັງ ວໍລະຈິດ ໄດ້ໃຫ້ກຽດໂອ້ລົມຊີ້ນໍາຕໍ່ກອງປະຊຸມ ແລະ ຄະນະພັກສະພາແຫ່ງຊາດຊຸດໃໝ່, ໂດຍສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຄະນະພັກຍາດມາໄດ້ໃນໄລຍະຜ່ານມາ ແລະ ເຊື່ອໝັ້ນວ່າບັນດາທິດທາງທີ່ຄະນະພັກວາງອອກໃນຊຸມປີຕໍ່ໜ້ານັ້ນຈະສ້າງບາດ ກ້າວບຸກທະລຸໃນການເຄື່ອນໄຫວວຽກງານຂອງສະພາແຫ່ງຊາດ, ພ້ອມທັງເນັ້ນໃຫ້ເອົາ ໃຈໃສ່ໃນບາງບັນຫາຄື: ໃຫ້ສືບຕໍ່ເພີ່ມທະວີການສຶກສາອົບຮົມການເມືອງແນວຄິດໃຫ້ສະມາຊິກພັກ-ພະນັກງານ ຢ່າງໜັກແໜ້ນເຂັ້ມແຂງ, ໂດຍຕິດພັນກັບການສ້າງພັກ-ພະນັກງານ ເປັນຕົ້ນ ແມ່ນການປັບປຸງທັດສະນະຫລັກໝັ້ນ ກໍຄືຄຸນສົມບັດສິນທໍາປະຕິວັດໃຫ້ເລິກເຊິ່ງເປັນລະບົບຕໍ່ເນື່ອງຕິດພັນກັບຮັກສາມູນເຊື້ອອັນດີງາມຂອງສະພາແຫ່ງຊາດ, ຕ້ອງເຊີດຊູຄວາມເປັນແບບຢ່າງນໍາໜ້າ ແລະ ການກະທໍາຕົວຈິງ, ສືບຕໍ່ປັບປຸງກໍ່ສ້າງພັກໃຫ້ໜັກແໜ້ນທາງດ້ານການຈັດຕັ້ງ, ປັບປຸງຮາກຖານພັກໃຫ້ມີຄວາມເຂັ້ມແຂງໂດຍຖືເອົາການສ້າງໜ່ວຍພັກປອດໄສ, ເຂັ້ມແຂງ ແລະ ໜັກແໜ້ນເປັນວຽກຈຸດສຸມຕົ້ນຕໍ ແລະ ບັນລຸຕາມຄາດໝາຍສູ້ຊົນທີ່ວາງອອກ, ໜ່ວຍພັກໃດໄດ້ຮັບນາມມະຍົດເປັນໜ່ວຍພັກປອດໄສເຂັ້ມແຂງແລ້ວກໍຕ້ອງສືບຕໍ່ຮັກສາ ແລະ ເສີມຂະຫຍາຍບົດບາດໃນວຽກງານຕົວຈິງດ້ວຍຄຸນນະ ພາບສູງຂຶ້ນກວ່າເກົ່າ, ເຊີດຊູຄວາມເປັນແບບຢ່າງນໍາໜ້າຂອງພະນັກງານສະມາຊິກພັກ, ປັບປຸງລະ ບອບແບບແຜນວິທີເຮັດວຽກລະຫວ່າງຄະນະພັກ, ຄະນະປະຈໍາສະພາແຫ່ງຊາດໃຫ້ກົມກຽວກັນ, ຕ້ອງປະຕິບັດລະບອບຂໍຄໍາເຫັນ, ໃຫ້ຄໍາແນະນໍາຈາກປະທານສະພາແຫ່ງຊາດ, ຄະນະປະຈໍາຕໍ່ວຽກງານຕ່າງໆຂອງຄະນະພັກໃຫ້ເປັນປົກກະຕິ, ສ້າງຖັນແຖວພະນັກງານມີຄຸນສົມບັດ, ມີຄວາມສາມາດ, ມີທາດແທ້ຫລັກໝັ້ນການເມືອງທີ່ໜັກແໜ້ນ, ສ້າງໃຫ້ໄດ້ຖັນແຖວພະນັກງານທີ່ມີຄຸນນະພາບຄົບຊຸດ, ມີໂຄງປະກອບອັນເໝາະສົມແນໃສ່ຕອບສະໜອງຄວາມຮຽກຮ້ອງຕ້ອງການວິຊາສະເພາະໃນຕໍ່ໜ້າ ແລະ ຍາວນານ, ເອົາໃຈໃສ່ວຽກງານກວດກາຢ່າງຮອບດ້ານ ແລະ ປົກກະຕິ ເພື່ອກໍາຈັດຈຸດອ່ອນ ແລະ ສິ່ງຫຍໍ້ທໍ້ ເຮັດໃຫ້ການເຄື່ອນໄຫວວຽກງານມີປະສິດທິພາບ ແລະ ເຂັ້ມແຂງຂຶ້ນເລື້ອຍໆ.