ຍ້ອນຫຍັງຄົນລາວຈຳນວນໜຶ່ງຈຶ່ງໄປເກີດລູກຢູ່ຕ່າງປະເທດ?

       ເຖິງແມ່ນວ່າ,ພັກ ແລະ ລັດ ຖະບານ ຈະສຸມໃສ່ການປັບປຸງ ຄຸນ ນະພາບ ການບໍລິການປິ່ນປົວ ພະຍາດ ແລະ ເລັ່ງຂະ ຫຍາຍຕາໜ່າງການບໍລິການສາທາລະ ນະສຸກໃຫ້ກວ້າງຂວາງໃນຂອບເຂດທົ່ວປະ ເທດເພື່ອຕອບສະໜອງຄວາມຮຽກຮ້ອງ ຕ້ອງການຂອງສັງຄົມໃນດ້ານສາທາລະນະສຸກເທື່ອລະກ້າວ,ແຕ່ກໍເຫັນວ່າການບໍລິການ ບາງດ້ານຍັງບໍ່ໄດ້ ຮັບຄວາມເຊື່ອໝັ້ນ ຈາກສັງຄົມເທົ່າທີ່ຄວນໂດຍສະເພາະແມ່ນປະ ຊາຊົນຜູ້​ມີ​ເງື່ອນ​ໄຂ​ທາງ​ເສດຖະກິດ​ຈຳນວນ​ໜຶ່ງ​ມັກ​ຈະ​ໄປ​ນຳ​ໃຊ້​ການ​ບໍລິການ​ຂອງ​ໂຮງໝໍຕ່າງປະເທດ ຄື ສສ ຫວຽດນາມ, ​ໄທ ຫລື ສປ ຈີນ ​ເຫລົ່ານັ້ນ​ເປັນຕົ້ນ ຈົນກະທັ້ງ ຮອດໄປໃຊ້ບໍລິການຝາກທ້ອງ ແລະ ເກີດລູກຢູ່ໂຮງໝໍບັນດາ​ປະ​ເທດ​ດັ່ງກ່າວ ໂດຍ​ສະ​ເພາະ​ກໍ​ແມ່ນ​ປະ​ເທດ​ໄທ.

         ຕໍ່ບັນຫາດັ່ງກ່າວ,ນັກຂ່າວ ໜັງສື ພີມລາວພັດທະນາໄດ້ສຳ ພາດ ທ່ານ ດຣ ບົວວັນ ແສນສະຖິດ ອຳນວຍການໂຮງ ໝໍແມ່ ແລະ ເດັກ ໂດຍທ່ານກ່າວວ່າ:ປັດ ຈຸບັນ ຕາໜ່າງສາທາລະນະສຸກ ຢູ່ປະ ເທດເຮົາບໍ່ວ່າຢູ່ສູນກາງ ແລະ ທ້ອງຖິ່ນຫາງໄກ ສອກຫລີກ ໄດ້ຂະຫຍາຍຕົວດີຂຶ້ນເທື່ອລະ ກ້າວ,​ແຕ່ຄຽງຄູ່ກັນນີ້ ຄວາມຮູ້ ດ້ານວິຊາການຂອງແພດໝໍລາວ ກໍມີລະດັບທີ່ແນ່ ນອນສົມຄວນເວົ້າສະເພາະຂະແໜງແມ່ ແລະ ເດັກ ແມ່ນມີການປັບປຸງພັດທະນາຢ່າງບໍ່ຢຸດຢັ້ງ ໂດຍສະເພາະແມ່ນການເອົາ ໃຈໃສ່ເບິ່ງແຍງສຸຂະພາບແມ່ ແລະ ບໍລິການເກີດລູກ ເຊິ່ງໃນໄລຍະຜ່ານມາກໍ ເຫັນວ່າໄດ້ຮັບຄວາມເຊື່ອໝັ້ນຈາກສັງຄົມເປັນ

ຢ່າງດີ.ແຕ່ແນວໃດກໍຕາມ ຕ້ອງຍອມຮັບວ່າທີ່ຜ່ານມາບັນຫາການຂ້າມໄປບໍລິການຝາກທ້ອງ ແລະ ເກີດລູກຂອງປະຊາຊົນ ລາ ຍັງມີຢູ່ ແຕ່ກໍມີຈຳນວນບໍ່ຫລາຍປານໃດ ເມື່ອທຽບກັບອັດຕາສ່ວນເກີດລູກຢູ່ພາຍໃນປະເທດ. ຍ້ອນວ່າການໄປເກີດລູກຢູ່ ຕ່າງປະເທດແມ່ນມີຄ່າໃຊ້ຈ່າຍສູງຫລາຍເທົ່າເມື່ອທຽບກັບການເກີດຢູ່ລາວ. ສະນັ້ນມີແຕ່ຄອບຄົວທີ່ມີຖານະເສດຖະກິດດີ    ເທົ່ານັ້ນຈຶ່ງສາມາດໄປເກີດລູກຢູ່ຕ່າງປະເທດໄດ້.

     ທ່ານອຳນວຍການໂຮງໝໍແມ່ ແລະ ເດັກ ອະທິບາຍວ່າ:ການ ໄປເກີດລູກຢູ່ ຕ່າງປະເທດ ສ່ວນ ໜຶ່ງມາຈາກກະແສນິຍົມສ່ວນຕົວ ຂອງບຸກຄົນ, ຂະນະດຽວກັນ ກໍ ຕ້ອງຍອມຮັບວ່າການບໍລິການຂອງໂຮງໝໍຢູ່ປະເທດໃກ້ ຄຽງເຮົານັ້ນ ແມ່ນມີການບໍລິການດີກວ່າໂຮງໝໍເຮົາແທ້ເນື່ອງຈາກວ່າໂຮງໝໍຢູ່ປະເທດເພີ່ນສ່ວນຫລາຍແມ່ນຂອງເອກກະຊົນ ສະນັ້ນເຂົາເຈົ້າຕ້ອງເຮັດການບໍລິການດີທີ່ສຸດເພື່ອດຶງດູດລູກຄ້າ, ສ່ວນໂຮງໝໍເຮົາສ່ວນຫລາຍແມ່ນໂຮງໝໍຂອງລັດ ,ແພດໝໍກໍ ແມ່ນພະນັກງານຂອງລັດບວກ ກັບແຕ່ລະມື້ມີຄົນເຈັບຫລາຍປະດັບຫລາຍປະເພດມາໃຊ້ບໍລິການ ຈຶ່ງເຮັດໃຫ້ແພດໝໍຈຳ ນວນໜຶ່ງມີຄວາມອິດເມື່ອຍຈົນເຮັດໃຫ້ຄຳເວົ້າຄຳຈາບາງຄຳບໍ່ຖືກໃຈຄອບຄົວ ຫລື ຍາດພີ່ນ້ອງຂອງຄົນເຈັບກໍມີ. ສະນັ້ນ ເພື່ອ ແກ້ໄຂບັນຫາດັ່ງກ່າວສິ່ງສຳຄັນຈະຕ້ອງໄດ້ເລັ່ງຍົກສູງຄຸນນະພາບການບໍລິການໃຫ້ດີກວ່າເກົ່າເປັນ ຕົ້ນ:ມີເຄື່ອງມື,ອາຄານທີ່ທັນ ສະໄໝດີ ແລະ ພຽງພໍ, ການເວົ້າຈາຂອງແພດໝໍພ້ອມ​ນັ້ນກໍຕ້ອງ​ເອົາ​ໃຈ​ໃສ່ໂຄສະນາປະຊາສຳພັນໃຫ້ສັງຄົມມີຄວາມເຊື່ອໝັ້ນ ໃນການບໍລິການປິ່ນປົວຂອງແພດລາວຢ່າງຖືກຕ້ອງ.

     ປັດຈຸບັນ ສຳລັບຄ່າບໍລິການ ໃນການເກີດ  ລູກສະເພາະຢູ່ໂຮງ ໝໍແມ່ ແລະ ເດັກ ປະມານ 3-5 ແສນກີບ,ຄ່າໃຊ້ຈ່າຍດັ່ງ ກ່າວນີ້ ແມ່ນບໍ່ໄດ້ລວມເອົາຄ່າປິ່ນປົວບັນ ດາອາການແຊກຊ້ອນ ຫລື ອາ ການສົນຕ່າງໆ,ນອກຈາກນີ້ກ່ຽວ ກັບບັນຫາທີ່ສັງຄົມ ມີຫາງສຽງ ຫລາຍທີ່ວ່າໃນເວລາເກີດ ລູກ ແລ້ວມີແພດໝໍເອົາລາຍຊື່ຄະນະ ແພດທີ່​ໄດ້​ຊ່ວຍ​ໃນ​ການເກີດລູກ ຄັ້ງນັ້ນມາໃຫ້ ຍາດ ພີ່ນ້ອງຄົນ ເຈັບເພື່ອຊອງຂາວໃຫ້ຄະນະແພດ, ຕໍ່ກໍລະນີນີ້ ທ່ານອຳນວຍ ການໂຮງໝໍແມ່ ແລະ ເດັກ ຢືນ ຢັນວ່າ: ສຳລັບ ໂຮງ ໝໍຂອງຂ້າພະເຈົ້າແມ່ນບໍ່ມີກໍລະນີຄືດັ່ງກ່າວ ເພາະວ່າຢູ່ໂຮງໝໍພວກເຮົາແມ່ນມີກົດລະບຽບຫລາຍຂໍ້ທີ່ຫ້າມກ່ຽວກັບ ການກະທຳທີ່ກໍໃຫ້ເກີດພາບພົດບໍ່ດີຕໍ່ໂຮງໝໍໜຶ່ງໃນນັ້ນ​ແມ່ນ​ຫ້າມການຮັບເງິນ ຫລື ຮັບຂອງຕ້ອນຈາກຄອບຄົວຄົນເຈັບທີ່ ແພດໝໍທຸກຄົນຕ້ອງໄດ້ພ້ອມກັນປະຕິບັດຢ່າງ ເຂັງຂັດ,ແຕ່ ຫາກຄອບຄົວ ຫລື ຍາດພີ່ນ້ອງ ຄົນເຈັບມີນ້ຳໃຈມອບໃຫ້ແພດ ໝໍໃນກໍລະນີພໍໃຈພິເສດກໍແມ່ນ ສາມາດເອົາໄດ້. ​ໃນ​ປີ 2012 ມີ​ຄົນ​ເຈັບ​ມາ​ເກີດ​ລູກ​ຢູ່​ໂຮງ​ໝໍ​ແມ່ ​ແລະ ​ເດັກ​ປະມານ 5 ພັນ​ກວ່າ​ຄົນ ສິ່ງ​ທີ່​ພາກພູມ​ໃຈ​ຂອງ​ແພດ​ໝໍ​ແມ່ນ​ໃນ​ຈຳນວນ​ທີ່​ມາ​ເກີດ​ຢູ່​ໂຮງໝໍ​ນີ້​ແມ່ນ​ບໍ່​ມີ​ການ​ເສຍ​ຊີວິດ​ຂອງ​ແມ່ ​ແລະ ​ເດັກ​ແຕ່​ຢ່າງ​ໃດ.