 |
| ທ່ານ ພັນເອກ ຄຳຜົນ ສີຫາປັນຍາ |
ທ່ານ ພັນເອກ ຄຳຜົນ ສີຫາປັນຍາ ຫົວໜ້າກົມສະກັດກັ້ນ
ແລະ ຕ້ານຢາເສບຕິດ ໄດ້ໃຫ້ສຳ ພາດຕໍ່ນັກຂ່າວລາວພັດທະນາ ໃນວັນທີ 24 ມິຖຸນາ,
ເນື່ອງໃນໂອກາດວັນສາກົນຕ້ານຢາເສບຕິດ ວ່າ: ປັດຈຸບັນຢາເສບຕິດໄດ້ແຜ່ລາມໄປທົ່ວໂລກ
ບໍ່ວ່າປະເທດທຸກຍາກຫຼືຮັ່ງມີກໍລ້ວນແຕ່ໄດ້ຮັບຜົນ ສະທ້ອນໃນລັກສະນະແຕກຕ່າງກັນ
ແລະ ໄດ້ກາຍເປັນບັນຫາຂອງໂລກທີ່ຈະຕ້ອງໄດ້ເອົາໃຈໃສ່ແກ້ໄຂ, ສະເພາະ ຢູ່ ສປປ
ລາວ ກໍໄດ້ຮັບຜົນສະທ້ອນເຊັ່ນກັນ, ຈາກການສຳຫຼວດ ຂອງຄະນະ ກຳມະການແຫ່ງຊາດ ເພື່ອກວດກາ
ແລະ ຄວບຄຸມຢາເສບຕິດ ໃນປີ 2006, ລາວ ສາມາດ ລົບລ້າງການປູກຝິ່ນໄດ້ໂດຍພື້ນ
ຖານແຕ່ມາຮອດປັດຈຸບັນຜູ້ປູກຝິ່ນໄດ້ກັບຄືນມາອີກ, ຄາດວ່າຈະມີເນື້ອທີ່ປະມານ
3000 ກ່ວາເຮັກຕາ ແລະ ຜູ້ຕິດຝິ່ນກໍເພີ່ມຂື້ນແຕ່ 9 -10 ພັນຄົນ, ສ່ວນຫຼາຍຢູ່ບັນດາແຂວງພາກເໜືອ,
ສະເພາະຢາບ້າພວມເປັນບັນຫາໃໝ່ແຜ່ຂະຫຍາຍຫຼາຍ, ຊຶ່ງຢາເສບຕິດປະເພດນີ້ນຳເຂົ້າຈາກຕ່າງປະເທດໂດຍສະເພາະປະເທດໃກ້ຄຽງມຄື:
ປີ 2012 ສະ ຖິຕິຜູ້ຕິດຢາບ້າມີປະ ມານ 50 ພັນຄົນອັນເປັນສາເຫດຕົ້ນຕໍພາໃຫ້ເກີດປະກົດການຫຍໍ້ທໍ້ຕ່າງໆ,
ສົ່ງຜົນກະທົບຕໍ່ບັນຫາຄວາມບໍ່ສະຫງົບ ແລະ ຄວາມເປັນລະບຽບຮຽບຮ້ອຍ, ກ້າວໄປເຖີງກົດໜ່ວງທວງດຶງການສ້າງສາພັດ
ທະນາປະເທດຊາດ, ຕໍ່ບັນຫາດັ່ງກ່າວ ແຕ່ໃດມາພັກ-ລັດ ຖະບານເຮົາໄດ້ເອົາໃຈໃສ່ສະກັດກັ້ນ
ແລະ ຕ້ານຢາເສບຕິດດ້ວຍຫຼາຍ ຮູບການທີ່ມີກົດໝາຍ ແລະ ລະ ບຽບການຕ່າງໆ ຄື: ໃນຕົ້ນເດືອນ
ພຶດສະພາ 2012 ຜ່ານມານາຍົກໄດ້ອອກຄຳສັ່ງເລກທີ 27/ນຍ; ວ່າດ້ວຍການເພີ່ມທະວີວຽກງານສະກັດກັ້ນ
ແລະ ແກ້ໄຂປະກົດການຫຍໍ້ທໍ້ໃນສັງຄົມ, ຄະນະເລ ຂາທິການສູນກາງພັກອອກຄຳສັ່ງເລກທີ
22 ວ່າດ້ວຍການເພີ່ມທະວີສະກັດກັ້ນ ແລະ ຕ້ານຢາເສບຕິດ ແລະ ກະຊວງປ້ອງກັນຄວາມສະຫງົບກໍໄດ້ມີບົດຍຸດທະສາດສະກັດກັ້ນ,
ປາບປາມການຜະລິດ, ຄ້າຂາຍ, ຂົນສົ່ງ ຢາເສບຕິດ ແລະ ຫຼາຍນິຕິກຳກ່ຽວຂ້ອງອື່ນໆ.
ທ່ານ ຫົວໜ້າກົມຕຳຫຼວດ ສະກັດກັ້ນ ແລະ
ຕ້ານຢາເສບຕິດ ໃຫ້ຮູ້ວ່າ: ນັບແຕ່ ປີ 2012 ຫາຕົ້ນປີ 2013 ກົມຕຳຫຼວດສະກັດກັ້ນ
ແລະ ຕ້ານຢາເສບຕິດຮ່ວມກັບບັນດາກຳລັງຕຳຫຼວດສາມາດ ສະກັດກັ້ນ ແລະ ຕ້ານຢາເສບຕິດໄດ້ຢ່າງແຂງແຮງຄື:
ໃນປີ 2012 ມ້າງຄະດີໄດ້ທັງໝົດ 1.300 ກ່ວາເລື່ອງ, ກັກຕົວຜູ້ຕ້ອງຫາໄດ້ 2 ພັນກ່ວາຄົນ,
ຍິງ 407 ຄົນ, ໃນນັ້ນມີຄົນຕ່າງປະເທດ 66
ຄົນ. ຢຶດຂອງກາງປະເພດເຮໂລອິນໄດ້ 54,84 ກິໂລກຼາມ ແລະ ຢາບ້າຫຼາຍກ່ວາ 1.200 ກິໂລກຼາມ,
ຝິ່ນມີເກືອບ 200 ກິໂລກຼາມ, ກັນ ຊາ2.266 ກ່ວາກິໂລກຼາມ ແລະ ສະເພາະ 6 ເດືອນຕົ້ນປີ
2013 ມ້າງຄະດີໄດ້ທັງໝົ້ດ 600 ກ່ວາເລື່ອງ, ກັກຕົວຜູ້ຕ້ອງຫາໄດ້ 963 ຄົນ, ຍິງ
142 ຄົນ, ໃນນັ້ນມີຄົນຕ່າງປະເທດ 20 ຄົນ. ຍຶດຂອງປະເພດເຮໂລອິນໄດ້ກ່ວາ 186 ກິໂລ
ກຼາມ, ຢາບ້າ 1.696 ກິໂລກຼາມ, ຝິ່ນ 58,24 ກິໂລກຼາມ, ກັນຊາ 4.594 ກ່ວາກິໂລກຼາມ,
ໂຄເຄນ 10,5 ກິໂລກຼາມ, ຜົງຂາວ 19,9 ກິໂລກຼາມ, ແປ້ງທີ່ມີສານເສບຕິດ 112,25
ກິໂລກຼາມ, ລົດໃຫຍ່ 43 ຄັນ, ລົດຈັກ 79 ຄັນ, ເຮືອບັນທຸກ 3 ລຳ, ອາວຸດປືນ 21 ກະບອກ,
ລູກປືນ 2.000 ກ່ວາລູກ, ໝາກແຕກ 2 ໜ່ວຍ, ໝາກຝ່າ 13,5 ກິໂລກຼາມ ແລະ ອຸປະກອນໂຮງອັດຢາບ້າ
2 ຊຸດ, ໂຮງອັດເຮໂລອິນ 2 ຊຸດ.
ທ່ານ ພັນເອກ ຄຳຜົນ ສີຫາປັນຍາ ໃຫ້ທັດສະນະວ່າ:
ຄຽງຄູ່ຜົນງານດັ່ງກ່າວ ພວກເຮົາກໍຍັງເຫັນວ່າມີຫຼາຍບັນຫາທ້າທາຍທີ່ຈະຕ້ອງໄດ້ເອົາໃຈໃສ່ແກ້ໄຂ
ແລະ ມັນຕ້ອງໄດ້ຮ່ວມມືກັບຫຼາຍປະເທດ ແລະ ພ້ອມກັນແກ້ໄຂຢ່າງເອົາຈິງເອົາຈັງເພື່ອໃຫ້ຢາເສບຕິດຫຼຸດລົງ
ແລະ ຄ່ອຍ ໝົດໄປເທື່ອລະກ້າວ ດັ່ງທີ່ພວກເຮົາໄດ້ກຳນົດໃນບົດຍຸດທະສາດປີ
2011 ຫາ 2015. ຊຶ່ງເມື່ອບໍ່ດົນມານີ້ ລາວເຮົາກໍໄດ້ສ້າງຕັ້ງ ໜວ່ຍສະເພາະກິດເພື່ອປາບປາມຢາເສບຕິດຢູ່ເຂດພາກເໜືອຂື້ນຊຶ່ງລວມມີແຂວງຫຼວງ
ພະບາງ, ອຸດົມໄຊ, ຫຼວງນ້ຳທາ ແລະ ບໍ່ແກ້ວ. ພ້ອມດຽວກັນກໍໄດ້ປະສານສົມທົບກັບເຈົ້າໜ້າທີ່ຕຳຫຼວດປະເທດໃກ້ຄຽງເພື່ອ
ຫາລືແລກປ່ຽນບົດຮຽນໃນການສະກັດກັ້ນ ແລະ ປາບາປມຢາເສບຕິດໃຫ້ມີປະສິດທິຜົນກ່ວາເກົ່າ.
No comments:
Post a Comment