ຫວຽດນາມ ຊ່ວຍກໍ່ສ້າງສະຖານີເຊື່ອມຕໍ່ໂທລະພາບ ແລະ ວິທະຍຸຢູ່ແຂວງອຸດົມໄຊ

      ໃນວັນທີ 3 ມັງກອນນີ້, ທ່ານ ສະຫວັນຄອນ ຣາຊມຸນຕຣີ ລັດຖະມົນຕີຊ່ວຍ ວ່າການກະຊວງຖະແຫລງຂ່າວ, ວັດທະ ນະທຳ ແລະ ທ່ອງທ່ຽວ, ທ່ານ ຄຳເພັງ ຈິດທ ວົງ ຮອງເຈົ້າແຂວງອຸດົມໄຊ, ທ່ານ ເຈິນ ວັນຕວນ ກົງສູນ ຫວຽດນາມປະຈຳ ພາກເໜືອ, ທ່ານ ເຈິນຢຸງຈິງ ຮອງອຳນວຍ ການສະຖານີໂທລະພາບຫວຽດນາມ ໄດ້ເຂົ້າຮ່ວມວາງສີລາເລີກກໍ່ສ້າງສະຖານີ ເຊື່ອມຕໍ່ໂທລະພາບ ແລະ ວິທະຍຸຢູ່ແຂວງ ອຸດົມໄຊ ເຊິ່ງເປັນທຶນຊ່ວຍເຫລືອເພື່ອການພັດທະນາໂດຍກົງຂອງລັດຖະບານ ຫວຽດນາມ ແລະ ເປັນຂອງຂວັນອັນລ້ຳຄ່າໃຫ້ແກ່ ສປປ ລາວ.

      ສະຖານີດັ່ງກ່າວປະກອບມີລະບົບອຸປະກອນເຕັກນິກ ແລະ ພື້ນຖານໂຄງລ່າງເພື່ອຕອບສະໜອງໃຫ້ແກ່ການຕິດຕັ້ງອຸປະ ກອນການແພ່ພາບໂດຍມີກຳລັງສົ່ງ 20 ກິໂລວັດລະບົບ UHF ແລະ ການກະຈາຍສຽງວິທະຍຸລະບົບ FM ຫລື FM+HD ໂດຍມີກຳລັງສົ່ງ 20 ກິໂລແມັດ. ສ່ວນການກໍ່ສ້າງພື້ນຖານໂຄງລ່າງນັ້ນກໍປະກອບມີເສົາອັງແຕນສູງ 125 ແມັດ. ນອກນີ້ກໍ

ຈະກໍ່ສ້າງອາຄານທີ່ກວມເອົາເນື້ອທີ່ 133 ຕາແມັດພ້ອມເຮືອນພັກພະນັກງານ, ສວນດອກໄມ້, ຫົນທາງໃນສະຖານີເຊິ່ງໄດ້ ອະນຸຍາດໃຫ້ບໍລິສັດຈິດຈະເລີນກໍ່ສ້າງຮັບເໝົາ.

        ທ່ານ ປິ່ນປາຖະໜາ ພັນທະມະລີ ຫົວໜ້າກົມສື່ມວນຊົນກະຊວງຖະແຫລ່ງຂ່າວ, ວັດທະນະທຳ ແລະ ທ່ອງທ່ຽວ ກ່າວໃນ ພິທີວ່າ:ໂດຍສະແດງຄວາມຮູ້ບຸນຄຸນຕໍ່ພັກ, ລັດຖະບານ ແລະ  ປະຊາຊົນຫວຽດນາມ ທີ່ໄດ້ຊ່ວຍລາວກໍ່ສ້າງສະຖາ ນີດັ່ງກ່າວອັນຈະເຮັດໃຫ້ປະຊາຊົນລາວຢູ່ບັນດາແຂວງທາງພາກເໜືອກໍຄືປະເທດລາວສາມາດຊົມໂທລະພາບ ແລະ ຟັງລາຍ ການວິທະຍຸທີ່ມີຄຸນນະພາບເຊິ່ງຈະນຳໄປສູ່ການເພີ່ມຄວາມຮູ້ຄວາມເຂົ້າໃຈ ແລະ ຈັດຕັ້ງປະຕິບັດແນວທາງນະໂຍບາຍຂອງ ພັກ-ລັດ. ທີ່ສຳຄັນການຊ່ວຍເຫລືອດັ່ງກ່າວນອກຈາກເປັນຂອງຂວັນທີ່ລ້ຳຄ່າຂອງພັກ-ລັດ ແລະ ປະຊາຊົນຫວຽດນາມມອບ ໃຫ້ແລ້ວຍັງເປັນການເພີ່ມທະວີຄວາມສາມັກຄີ ແລະ ການຮ່ວມມືພິເສດຮອບດ້ານຂອງ 2 ພັກ, 2 ລັດ ແລະ ປະຊາຊົນ 2 ຊາດລາວ-ຫວຽດນາມໃຫ້ສູງຂຶ້ນເລື້ອຍໆ.