ສຳເລັດໂຄງການກໍ່ສ້າງຫໍວັດທະນະທຳ ໄກສອນ ພົມວິຫານ

   ໂຄງການກໍ່ສ້າງຫໍວັດທະນະທຳ ໄກສອນ ພົມວິຫານ ທີ່ແຂວງ ສະຫວັນນະເຂດ ເປັນໂຄງການ ຊ່ວຍເຫລືອລ້າຈາກພັກ ແລະ ລັດຖະບານ ສສ ຫວຽດນາມ ມອບ ເປັນຂອງຂວັນໃຫ້ພັກ-ລັດ ກໍຄື ປະຊາຊົນບັນດາເຜົ່າຊາວແຂວງສະຫວັນນະເຂດ ໂດຍໄດ້ວາງສີລາລືກລົງມືກໍ່ສ້າງແຕ່­ທັນວາ 2011, ປັດຈຸບັນການກໍ່ສ້າງສຳ ເລັດແລ້ວ.

      ຫໍວັດທະນະທຳ ໄກສອນ ພົມ ວິຫານນີ້ ແມ່ນສະຫະບໍລິສັດ ເລກທີ 36  ຂຶ້ນກັບກະຊວງປ້ອງ ກັນປະເທດແຫ່ງ ສສ ຫວຽດ ນາມເປັນຜູ້ຮັບເໝົາກໍ່ສ້າງມູນຄ່າ 8,5 ລ້ານໂດລາສະຫະລັດ, ເປັນ ອາຄານ 4 ຫລັງ, ຫລັງທີ 1 ເປັນອາຄານຮັບຕ້ອນ ຊັ້ນດຽວມີເນື້ອທີ່ 210 ຕາແມັດ; ຫລັງທີ 2 ເປັນ ອາຄານ 2 ຊັ້ນ ເປັນຫ້ອງອະ ເນກປະສົງເຊັ່ນ: ຫ້ອງຮຽນ, ເຝິກ ອົບຮົມ, ອອກກຳລັງກາຍ, ຈັດ ງານລ້ຽງ ມີເນື້ອທີ່ 1.010 ຕາ ແມັດ, ຫລັງທີ 3 ເປັນອາຄານ 2 ຊັ້ນເຮັດເປັນຫ້ອງບໍລິຫານມີເນື້ອທີ່ 198 ຕາແມັດ ແລະ ຫລັງທີ 4 ເຮັດເປັນຫ້ອງປະຊຸມອະເນກປະສົງມີບ່ອນຕ້ອນຮັບ, ຫ້ອງຮັບແຂກພິເສດ, ຫ້ອງສະແດງຈຳ ນວນ

650-680 ບ່ອນນັ່ງ, ເວທີ ການສະແດງ, ບ່ອນເຕັກນິກຮັບ ໃຊ້ມີເນື້ອທີ່ 1.355 ຕາແມັດ. ແຕ່ລະອາຄານມີໂຄງສ້າງ ເບຕົງ ເສີມເຫລັກ, ຝາກໍ່ດິນຈີ່ ຊຶ່ງເປັນອາຄານທີ່ຄົບຖ້ວນ ແລະ ທັນສະໄໝ ພ້ອມໃຫ້ການບໍລິການຢ່າງເປັນທາງການ ແລະ ຈະຈັດ ພິທີມອບ-ຮັບໃນໄວໆນີ້.

          ທ່ານ ດຣ ສຸພັນ ແກ້ວມີໄຊ ເຈົ້າແຂວງສະຫວັນນະເຂດ ມີຄຳ ເຫັນວ່າ: ຫໍວັດທະນະທຳໄກສອນ ພົມວິຫານເປັນການ ປະກອບສ່ວນໃຫ້ອະນຸສາວະລີປະທານໄກສອນພົມວິຫານ, ມີສິ່ງອຳນວຍ ຄວາມສະດວກເພີ່ມຂຶ້ນເປັນການຍົກສູງພື້ນຖານ ວັດຖຸໃນການຈັດພິທີຕ່າງໆ, ການແລກປ່ຽນສະແດງສິລະປະວັດທະນະທຳ. ໂຄງການດັ່ງກ່າວມີຄວາມໝາຍສຳຄັນເປັນພິເສດ ເພື່ອເປັນການຊ່ວຍໂຄສະນາຮູບພາບ ແລະ ສາຍພົວພັນມິດຕະພາບລາວ-ຫວຽດນາມອັນເປັນມູນເຊື້ອແກ່ເພື່ອນມິດນາໆປະ ເທດທີ່ເຂົ້າມາຊົມກໍຄືປະຊາຊົນລາວ-ຫວຽດນາມ ທີ່ກຳລັງເຮັດວຽກ ແລະ ດຳລົງຊີວິດຢູ່ແຂວງສະຫວັນນະເຂດ.