ກະຊວງແຮງງານ ແລະ ສະຫວັດດີການສັງຄົມປູກຕົ້ນໄມ້ເພື່ອເພີ່ມພື້ນທີ່ສີຂຽວ

          ເນື່ອງໃນໂອກາດວັນປູກໄມ້ແຫ່ງຊາດ ແລະ ວັນເດັກນ້ອຍສາກົນ ວັນທີ 1 ມີຖຸນາ, ກະຊວງແຮງງານ ແລະ ສະຫວັດດີການສັງຄົມ ໄດ້ຈັດກິດຈະກຳປູກຕົ້ນໄມ້ຂຶ້ນທີ່ສະຖາບັນພັດທະນາລາວ-ເກົາຫລີ, ເພື່ອສ້າງພື້ນທີ່ດັ່ງກ່າວໃຫ້ເປັນສີຂຽວ, ມີຄວາມຮົ່ມເຢັນ, ສວຍງາມ ກາຍເປັນບ່ອນພັກຜ່ອນຂອງນ້ອງໆນັກຮຽນ ແລະ ອື່ນໆ, ເຊິ່ງຕົ້ນໄມ້ປະດັບທີ່ນຳມາປູກມີຫລາຍກວ່າ 50 ຕົ້ນ,ໃນນັ້ນ ມີຕົ້ນດອກຄູນ, ດອກກາເລົາ, ຕົ້ນໄມ້ສັກ ແລະ ຕົ້ນໄມ້ກິນໝາກອື່ນໆອີກ.

          ທ່ານລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ກ່າວວ່າ: ຄືດັ່ງທີ່ຮູ້ນຳກັນແລ້ວວ່າ ວັນທີ 1 ມີຖຸນາຂອງທຸກໆປີ ແມ່ນວັນປູກຕົ້ນໄມ້ແຫ່ງຊາດ ແລະ ໄລຍະຜ່ານມາບໍ່ວ່າຈະເປັນທາງສູນກາງ ກໍຄືຂັ້ນແຂວງ ນະຄອນຫລວງວຽງຈັນ ແມ່ນໄດ້ຈັດພິທີປູກຕົ້ນໄມ້ຢ່າງເປັນຂະບວນຟົດຟື້ນ ເພື່ອຄືນຄວາມສົມດຸນສູ່ທຳມະຊາດ ພ້ອມກັນນີ້ ຍັງເປັນການປູກຕົ້ນໄມ້ເພື່ອປະດັບສຳນັກງານ, ອົງການ ແລະ ອື່ນໆ, ແຕ່ຢ່າລືມວ່າພາຍຫລັງປູກໄປແລ້ວ ກໍຕ້ອງເອົາໃຈໃສ່ປົກປັກຮັກສາ, ເພື່ອເຮັດໃຫ້ຕົ້ນໄມ້ເຫລົ່ານັ້ນເຕີບໃຫຍ່, ສວຍງາມ ເຮັດໃຫ້ການປະຕິບັດນະໂຍບາຍ ສ ສີຂຽວ ປະກົດຜົນເປັນຈິງຫລາຍຂຶ້ນ. ແລະ ສ້າງຂະບວນການວັນປູກຕົ້ນໄມ້ແຫ່ງຊາດອີກດ້ວຍ.

          ນັບແຕ່ປີ 1980 ເປັນຕົ້ນມາ, ພັກ ແລະ ລັດຖະບານເຮົາໄດ້ວາງນະໂຍບາຍສົ່ງເສີມການປູກໄມ້ຢ່າງແຂງແຮງ ແລະ ແຕ່ນັ້ນມາ ກໍໄດ້ກຳນົດເອົາວັນທີ 1 ມີຖຸນາເປັນວັນປູກຕົ້ນໄມ້ແຫ່ງຊາດ, ເພື່ອເປັນການປຸກລະດົມຂະບວນການດັ່ງກ່າວໄປຄຽງຄູ່ກັບການສະເຫລີມສະຫລອງວັນເດັກສາກົນ ໃຫ້ມີຄວາມໝາຍຍິ່ງຂຶ້ນ ແລະ ນັບແຕ່ປີ 1980 ມາຮອດປັດຈຸບັນ ປະເທດເຮົາສາມາດປູກໄມ້ໄດ້ແລ້ວຫລາຍກວ່າ 440.000 ເຮັກຕາ, ອັນໄດ້ຊ່ວຍໃຫ້ການປົກຫຸ້ມຂອງປ່າໄມ້ໃນລາວເຮົາເພີ່ມຂຶ້ນຫລາຍກວ່າ 60% ແລະ ຄາດວ່າຮອດປີ 2020 ຈະໃຫ້ບັນລຸ 70%.