ລັດຖະບານສັ່ງໂຈະ 3 ບໍລິສັດຢຸດການເຄື່ອນໄຫວທຸລະກິດຊົ່ວຄາວ

          ກົມທະບຽນ ແລະ ຄຸ້ມຄອງວິສາຫະກິດ ກະຊວງອຸດສາຫະກຳ ແລະ ການຄ້າ ໄດ້ອອກແຈ້ງການສັ່ງໃຫ້ 3 ບໍລິສັດ ໂຈະການເຄື່ອນທຸລະກິດຊົ່ວຄາວ ໄດ້ແກ່ ບໍລິສັດ ຮຸ່ງເຮືອງວຽງຈັນ ຈຳກັດ,  ບໍລິສັດ ວຽງຈັນແອຊີ ໂລຫະມີສີ ຂາອອກ-ຂາເຂົ້າ ຈຳກັດຜູ້ດຽວ ແລະ ບໍລິສັດ ຊວງຊິນເຕີລີ້ກຸຈີ ຂາອອກ-ຂາເຂົ້າ ຈຳກັດຜູ້ດຽວ.

          ທ່ານ ຫຸມແພງ ຄຳພາສິດ ຮອງຫົວໜ້າ ກົມທະບຽນ ແລະ ຄຸ້ມຄອງວິສາຫະກິດ ເປີດເຜີຍໃນວັນທີ 12 ກໍລະກົດ 2016 ນີ້ວ່າ: ການແຈ້ງການໃຫ້ໂຈະການເຄື່ອນໄຫວທຸລະກິດຂອງ 3 ບໍລິສັດ ດັ່ງກ່າວແມ່ນເນື່ອງມາຈາກບາງສາເຫດສຳຄັນຄື: ບໍ່ມີການເຄື່ອນໄຫວທຸລະກິດໃດໆ ຫລັງຈາກໄດ້ຮັບອະນຸຍາດ, ບໍ່ເສຍພັນທະອາກອນ, ຕະຫລອດເຖິງການເຄື່ອນໄຫວກິດຈະການບໍ່ຖືກຕ້ອງຕາມເປົ້າໝາຍ. ສະນັ້ນທາງ ກົມ

ທະບຽນ ແລະ ຄຸ້ມຄອງວິສາຫະກິດ ເຫັນວ່າຕ້ອງໄດ້ສັ່ງໂຈະການເຄື່ອນໄຫວທຸລະກິດເປັນການຊົ່ວຄາວ ເຊິ່ງມີຜົນນັບແຕ່ວັນທີ 11 ກໍລະກົດເປັນຕົ້ນໄປ. ຢ່າງໃດກໍຕາມ ທັງ 3 ບໍລິ ສັດຂ້າງເທິງຕ້ອງເຂົ້າມາພົວພັນ ແລະ ຊີ້ແຈງເຫດຜົນຕ່າງໆ ເພື່ອນຳໄປປັບປຸງແກ້ໄຂໃຫ້ຖືກຕ້ອງຕາມຂັ້ນຕອນ ແລະ ລະບຽບການ ກ່ຽວກັບໂຮງງານອຸດສາຫະກຳ ແລະ ນຳເອກະສານຢັ້ງຢືນການປັບແກ້ໄຂດັ່ງກ່າວ ມາແຈ້ງຕໍ່ເຈົ້າໜ້າທີ່ທະບຽນວິສາຫະກິດ, ຫາກເຫັນວ່າມີຄວາມຖືກຕ້ອງ ແລະ ເໝາະສົມ ກໍຈະອະນຸຍາດໃຫ້ດຳເນີນທຸລະກິດຕໍ່ໄປ. 

   ທ່ານ ຫຸມແພງ ຄຳພາສິດ ໃຫ້ຮູ້ອີກວ່າ: ຫາກກາຍໄລຍະເວລາທີ່ກຳນົດໄວ້ຂ້າງເທິງເຈົ້າໜ້າທີ່ທະບຽນວິສາຫະກິດ ກໍຈະອອກແຈ້ງໂຈະການເຄື່ອນໄຫວທຸລະກິດຖາວອນ, ພ້ອມທັງຫ້າມເຄື່ອນໄຫວທຸລະກິດອື່ນໆຢ່າງເດັດຂາດ, ຫາກລະເມີດ ຫລື ບໍ່ປະຕິບັດຕາມແຈ້ງການສະບັບນີ້ ບໍ່ວ່າຈະດ້ວຍເຫດ ຜົນໃດກໍຕາມ ຈະຖືກປະຕິບັດມາດຕະການຕາມມາດຕາ 212 ຂອງກົດໝາຍ ວ່າດ້ວຍວິສາຫະກິດ ຢ່າງເຂັ້ມງວດ.