ຈຳປາສັກພົບເຫັນການປິດບັງລາຍຮັບເປັນລາຍໃຫຍ່

     ແຫລ່ງຂ່າວແຂວງຈຳປາສັກລາຍງານວ່າ: ເນື່ອງຈາກການເກັບລາຍຮັບຂອງແຂວງໃນ 6 ເດືອນຕົ້ນ ສົກປີບໍ່ບັນລຸເປົ້າໝາຍທີ່ວາງໄວ້. ດັ່ງນັ້ນ, ທ່ານ ບຸນຖອງ ດີວິໄຊ ເຈົ້າແຂວງຈຳປາສັກ ພ້ອມຄະນະສະ ເພາະກິດ ໄດ້ລົງຕິດຕາມກວດກາ ແລະ ພົບເຫັນເຈົ້າໜ້າທີ່ພາສີ-ອາກອນຈຳນວນໜຶ່ງບໍ່ມີຄວາມຈິງໃຈ ແລະ ເຊື່ອງອຳບາງແຫລ່ງລາຍຮັບຂອງລັດ, ຂີ້ຕົວະຕົວເລກຈຳນວນຫ້າງຮ້ານຜູ້ປະກອບການທຸລະກິດຄ້າ-ຂາຍ ແລະ ສ້າງໜ່ວຍງານນາຍໜ້າເປັນບໍລິສັດຂົນສິນຄ້ານຳເຂົ້າແບບຝ່າຍດຽວ ຈຶ່ງເປັນສ່ວນໜຶ່ງເຮັດໃຫ້ ລາຍຮັບຂອງແຂວງໃນໄລຍະດັ່ງກ່າວບັນລຸໄດ້ພຽງ 529 ຕື້ກີບ ເທົ່າກັບ 41% ຂອງແຜນການ, ເມື່ອ ເຫັນວ່າການຈັດເກັບລາຍຮັບບໍ່ໄດ້ຕາມແຜນ, ເຈົ້າແຂວງເອງໄດ້ລົງຊຸກຍູ້ ແລະ ໃຊ້ມາດຕະການຕ່າງໆ ເພື່ອໃຫ້ບັນລຸແຜນ, ຜ່ານໃນໄລຍະ 2 ເດືອນ ຄືເດືອນ 5-6 ສາ ມາດເກັບລາຍຮັບໄດ້ເພີ່ມເປັນ 917 ຕື້ກີບ ເທົ່າກັບ 63% ຂອງແຜນການ.

     ແຫລ່ງຂ່າວໃຫ້ຮູ້ອີກວ່າ: ປັດຈຸບັນແມ່ນໃຫ້ບໍລິສັດແຈ້ງເສຍເອງ ຈຶ່ງເຮັດໃຫ້ການເກັບລາຍຮັບພົ້ນ ເດັ່ນຂຶ້ນ, ໃນໄລຍະໄຟໄໝ້ຢູ່ຕະຫລາດໃໝ່ປາກເຊກໍກວດພົບເຫັນ 200 ກວ່າຮ້ານທີ່ບໍ່ລາຍງານຕົວເລກ ແຈ້ງເສຍອາກອນ, ຈາກການນຳໃຊ້ມາດຕະການດັ່ງກ່າວເຫັນວ່າສາມາດກຳຈັດໄດ້ບັນຫາການສໍ້ລາດບັງ ຫລວງ ແລະ ຮັບປະກັນໄດ້ຄວາມໂປ່ງໃສ ແລະ ຄາດວ່າການເກັບລາຍຮັບເຂົ້າງົບປະມານຂອງແຂວງຈຳ ປາສັກຈະໃຫ້ໄດ້ຕາມແຜນທີ່ລັດຖະບານມອບໝາຍໃຫ້.