ມີຜູ້ເສຍຊີວິດເພີ່ມເປັນ 9 ຄົນແລ້ວຍ້ອນພະຍາດໄຂ້ເລືອດອອກ

          ຕາມການລາຍງານຂອງໜ່ວຍເຝົ້າລະວັງພະຍາດລະບາດ,ກະຊວງສາທາລະນະສຸກໃນວັນທີ 12 ກໍລະກົດນີ້ໃຫ້ຮູ້ວ່າ: ປັດຈຸບັນສະພາບການລະບາດຂອງພະຍາດໄຂ້ເລືອດອອກ ຫຼື ໄຂ້ຍຸງລາຍຢູ່ຫຼາຍແຂວງທາງພາກໃຕ້ຍັງມີແນວໂນ້ມເພີ່ມຂື້ນເລື້ອຍໆ ແລະ ມາຮອດດຽວນີ້ມີຍອດຜູ້ຕິດເຊື້ອແລ້ວຫຼາຍກວ່າ 1.760 ກໍລະນີ, ເພີ່ມຂື້ນຈາກອາທິດຜ່ານມາເຖິງ 350 ກວ່າກໍລະນີ, ໃນນັ້ນມີຜູ້ເສຍຊີວິດເພີ່ມເປັນ 9 ຄົນແລ້ວ ຄື: ຢູ່ແຂວງຈຳປາສັກມີຜູ້ຕິດເຊື້ອຫຼາຍກວ່າ 880 ກໍລະນີ ແລະ ມີຜູ້ເສຍຊີວິດແລ້ວ 7 ຄົນ,ບໍລິຄຳໄຊຫຼາຍກວ່າ 210  ກໍລະນີ,ເສຍຊີວິດ 1 ຄົນ, ຄຳມ່ວນ 159 ກໍລະນີ, ນະຄອນ ຫຼວງວຽງຈັນ 99 ກໍລະນີ, ເຊກອງ 72 ກໍລະນີ, ຫຼວງພະບາງ 68 ກໍລະນີ, ສະຫວັນນະ ເຂດ 78 ກໍລະນີ, ສາລະວັນ 73 ກໍລະນີ, ເສຍຊີວິດ 1 ຄົນ,ອັດຕະປື 52 ກໍລະນີ, ອຸ ດົມໄຊ 32 ກໍລະນີ, ຫຼວງນ້ຳທາ 20 ກໍລະນີ, ສຳລັບແຂວງອື່ນໆກໍມີຜູ້ຕິດເຊື້ອຈຳນວນໜຶ່ງ ແລະ ປັດຈຸບັນກະຊວງສາທາ ລະນະສຸກ ໄດ້ສຸມໃສ່ສະກັດກັ້ນພະຍາດດັ່ງກ່າວ

ໂດຍໄດ້ສົມທົບກັບທ້ອງຖິ່ນລົງ ທຳລາຍແຫຼ່ງເພາະພັນຂອງຍຸງລາຍທີ່ເປັນພາຫະນຳເຊື້ອຢູ່ຕາມເມືອງ ແລະ ບ້ານ ຕ່າງໆເຂດທີ່ມີຄວາມສ່ຽງໃນແຂວງທີ່ມີການລະບາດໃຫ້ຫລຸດຜ່ອນລົງ, ໂດຍສະເພາະ ອຳນາດການປົກຄອງທ້ອງຖິ່ນ,ຕະຫຼອດ ຮອດປະຊາ ຊົນບັນດາເຜົ່າຕ້ອງໄດ້ເພີ່ມທະວີຄວາມເປັນເຈົ້າການສະກັດກັ້ນ ແລະ ປ້ອງກັນພະຍາດດັ່ງກ່າວໃຫ້ເຂັ້ມງວດກວ່າເກົ່າ ແລະ ເຕືອນໃຫ້ປະຊາຊົນທີ່ຢູ່ໃນ ເຂດມີການລະບາດຂອງພະຍາດດັ່ງກ່າວເອົາໃຈ ໃສ່ການປະຕິບັດຄຳຂັວນ 5 ປ ທີ່ກະຊວງສາທາລະນະສຸກວາງອອກຢ່າງເຂັ້ມງວດຄື: 1 ປິດຝາພາຊະ ນະທີ່ເກັບນ້ຳໃນເຮືອນ ແລະ ນອກເຮືອນເພື່ອບໍ່ໃຫ້ຍຸງມາໄຂ່ໃສ່, 2 ປ່ຽນນ້ຳໃນພາຊະນະເຊັ່ນ: ເຕົ້າດອກໄມ້ , ນ້ຳຮອງຕີນຕູ້ , ຖ້ານຮອງຈອກນ້ຳ, 3 ປ່ອຍປາຫາງນົກຍູງເພື່ອກິນໜອນນ້ຳ, 4 ປັບປຸງການອະນາໄມສິ່ງແວດລ້ອມອ້ອມເຮືອນບໍ່ໃຫ້ມີກະໂປະ, ກະປ໋ອງ, ຢາງຕີນລົດເກົ່າທີ່ມີນ້ຳຂັງ, 5 ປະຕິບັດໃຫ້ເປັນນິໃສປະຈຳ ແລະ ຖ້າຫາກເປັນໄຂ້ໃຫ້ໄປພົບແພດໝໍດ່ວນ,ສິ່ງສຳຄັນແມ່ນຕ້ອງນອນໃນມຸ້ງເພື່ອຫລີກລ້ຽງ ບໍ່ໃຫ້ຍຸງກັດໄດ້ງ່າຍ.