ລັດຖະບານໃຫ້ກວດກາຄືນໄມ້ຝານ-ປອກ ທີ່ຕົກຄ້າງຢູ່ໂຮງງານ

        ຫ້ອງວ່າການສຳນັກງານນາຍົກລັດຖະມົນຕີ ໄດ້ອອກແຈ້ງການເລກທີ 955/ຫສນຍ.ກລຂ ວັນທີ 8 ກໍລະກົດ 2016  ໂດຍໃຫ້ກະຊວງກະສິກຳ ແລະ ປ່າໄມ້ ພ້ອມດ້ວຍກະຊວງອຸດສາຫະກຳ ແລະ ການຄ້າ ສົມທົບກັບພາກສ່ວນກ່ຽວຂ້ອງ ດຳເນີນການກວດກາຄືນຈຳນວນໄມ້ຝານ ແລະ ໄມ້ປອກ ທີ່ຕົກຄ້າງຢູ່ສະເພາະໃນໂຮງງານຕ່າງໆໃຫ້ລະອຽດ ແລະ ຊັດເຈນເພື່ອຂໍອະນຸມັດສົ່ງອອກ. ສ່ວນໃນຕໍ່ໜ້າແມ່ນໃຫ້ຫັນມາປຸງແຕ່ງເປັນຜະລິດຕະພັນພາຍໃນ.

          ລັດຖະບານຍັງໄດ້ມອບໃຫ້ ກະຊວງອຸດສາຫະກຳ ແລະ ການຄ້າ ກວດກາຄືນລະຫັດໄມ້ສຳເລັດຮູບ ໃຫ້ສອດຄ່ອງກັບຄຳສັ່ງເລກທີ 15/ນຍ ເພື່ອອຳນວຍຄວາມສະດວກໃຫ້ບັນດາໂຮງງານປຸງແຕ່ງໄມ້
ສຳເລັດຮູບ ທີ່ໄດ້ມາດຕະຖານ ແລະ ຖືກຕ້ອງກັບຄວາມຕ້ອງການຂອງຕະຫລາດ ເພື່ອການສົ່ງອອກ. ສຳ ລັບໄມ້ປູກ ແມ່ນມອບໃຫ້ທັງສອງກະຊວງດັ່ງກ່າວກວດກາຄົ້ນຄວ້າຄືນໃຫ້ລະ ອຽດ ແຕ່ບໍ່ທັນອະນຸຍາດໃຫ້

ມີການສົ່ງອອກ. ທັງສອງກະຊວງຕ້ອງເປັນເຈົ້າການກວດກາ ແລະ ຂຶ້ນບັນຊີຈຳນວນໄມ້ແຕ່ລະປະເພດ ທີ່ຍັງຕົກຄ້າງຢູ່ສະໜາມ II ໃນທົ່ວປະເທດແລ້ວ ໃຫ້ລາຍງານຕໍ່ລັດຖະ ບານ ເພື່ອດຳເນີນການປະມູນຂາຍໃຫ້ຖືກຕ້ອງຕາມລະບຽບຫລັກການ.

          ຄຳສັ່ງຂອງທ່ານນາຍົກລັດຖະມົນຕີ ເລກທີ 15/ນຍ ໃຫ້ຢຸດຕິສົ່ງອອກໄມ້ທຸກປະເພດ ທີ່ບໍ່ແມ່ນຜະລິດຕະພັນໄມ້ສຳເລັດຮູບ ແລະ ເຄື່ອງປ່າຂອງດົງ ທີ່ບໍ່ຖືກຕ້ອງຕາມກົດໝາຍ ຜ່ານ ສປປ ລາວໄປຍັງຕ່າງປະເທດຢ່າງເດັດຂາດນັ້ນແມ່ນພວມໄດ້ຮັບການຈັດຕັ້ງຜັນຂະຫຍາຍຢ່າງເຄັ່ງຮ້ອນໃນທົ່ວປະ ເທດ. ກໍລະນີຫາກກວດພົບການກະທຳຜິດ ຫລື ລະເມີດຄຳສັ່ງ ແມ່ນໃຫ້ດຳເນີນການຕາມກົດໝາຍຢ່າງເຂັ້ມງວດ.