ສະຫນາມບິນສາກົນຫນອງຄ້າງຈະເປັນແຮງກະຕຸກຊຸກຍູ້ການພັດທະນາເສດຖະກິດ-ສັງຄົມແຂວງຫົວພັນຂະຫຍາຍຕົວ

          ນັບວ່າເປັນການຄອງຄອຍທີ່ດົນນານມາແລ້ວຂອງຊາວແຂວງຫົວພັນເພື່ອຈະມີເສັ້ນທາງເດີນທາງອາກາດ ທີ່ສະດວກ ສະບາຍເໝືອນກັບເຂດແຂວງທົ່ງພຽງອື່ນໆ ແລະ ມາຮອດປັດຈຸບັນສິ່ງຄອງຄອຍດັ່ງກ່າວໄດ້ປາກົດຜົນ ເປັນຈິງພາຍຫລັງພິ ທີວາງສີລາເລີກໂຄງການກໍ່ສ້າງສະໜາມບິນສາກົນໜອງຄ້າງໄດ້ມີຂຶ້ນໃນວັນທີ 14 ມີນານີ້ ໂດຍ ການໃຫ້ກຽດເຂົ້າຮ່ວມ ຂອງນາຍົກລັດຖະມົນຕີ ທອງສິງ ທຳມະວົງ ແລະ ທ່ານ ຫງວຽນເຕິນຢຸງ ນາຍົກລັດຖະ ມົນຕີແຫ່ງ ສສ ຫວຽດນາມ ພ້ອມ ດ້ວຍແຂກຂັ້ນສູງຂອງສອງຝ່າຍ.

     ສະໜາມບິນດັ່ງກ່າວຕັ້ງຢູ່ຫ່າງຈາກເທສະບານເມືອງຊຳເໜືອໄປທາງທິດຕາເວັນອອກສຽງເໜືອປະມານ 35 ກິໂລແມັດ ໂດຍໄດ້ຮັບການຊ່ວຍເຫລືອຈາກ ສສ ຫວຽດນາມ ໃນເບື້ອງຕົ້ນເປັນຈຳນວນເງິນ 80 ລ້ານໂດລາ ສະຫະລັດ ໂດຍແມ່ນບໍລິສັດ ຮວາງແອງຢາລາຍເປັນຜູ້ຮັບເໝົາກໍ່ສ້າງ ເຊິ່ງຈະໄດ້ແບ່ງອອກເປັນສອງໄລຍະ ຄືໄລຍະທຳ ອິດຈະສ້າງໃນເນື້ອທີ່ 183 ເຮັກຕາ, ໃນນັ້ນ ມີອາຄານຮອງຮັບຜູ້ໂດຍສານປະມານ 1 ແສນຄົນຕໍ່ປີ, ສ້າງທາງແລ່ນ ຂຶ້ນ-ລົງຂອງເຮືອບິນ (Runway) ຍາວ 2.400 ແມັດ ກວ້າງ 30 ແມັດ ທີ່ສາມາດຮອງຮັບເຮືອບິນຂະໜາດ 70-100 ບ່ອນນັ່ງ ຄືເຮືອບິນ ATR 72, Forkker 70 ແລະ ເຮືອບິນທຽບ ເທົ່າອື່ນໆໂດຍຄາດວ່າຈະໃຫ້ສຳ ເລັດໃນ ປີ 2015, ສ່ວນໄລຍະທີສອງແມ່ນຈະສືບຕໍ່ຍົກລະດັບ ແລະ ຂະຫຍາຍເນື້ອທີ່ສະໜາມບິນດັ່ງກ່າວອອກຕື່ມອີກ 66 ​ເຮັກຕາ ໃຫ້ເປັນ 249 ເຮັກຕາ

ເພື່ອຂະຫຍາຍອາຄານຜູ້ໂດຍສານໃຫ້ສາມາດຮອງຮັບໄດ້ 350.000 ຄົນໃນ ແຕ່ລະປີ, ຂະຫຍາຍທາງແລ່ນ ຂຶ້ນ-ລົງຂອງເຮືອບິນໃຫ້ຢູ່ໃນລະດັບ 3.800 ແມັດ, ກວ້າງ 45 ແມັດ ເພື່ອສາ ມາດຮອງຮັບເຮືອບິນຂະໜາດບັນຈຸແຕ່ 150-250 ບ່ອນນັ່ງ ເຊັ່ນ: ເຮືອບິນແອບັດ A320, A321, A300 ແລະ ເຮືອບິນທຽບເທົ່າອື່ນໆ. ພ້ອມນັ້ນກໍຈະໄດ້ກໍ່ສ້າງເດີ່ນຈອດເຮືອບິນ, ເສັ້ນທາງ, ສາງສິນຄ້າ ແລະ ສິ່ງອຳນວຍຄວາມ ສະດວກອື່ນໆອີກ.

    ຄາດວ່າການກໍ່ສ້າງສະໜາມບິນແຫ່ງນີ້ສຳເລັດແລ້ວຈະຊ່ວຍເຮັດໃຫ້ການພັດທະນາເສດຖະກິດ-ສັງຄົມຂອງທ້ອງ ຖິ່ນຂະຫຍາຍຕົວ, ໃນສະເພາະໜ້າກໍຈະເປັນການຊ່ວຍກະຕຸກຊຸກຍູ້ການທ່ອງທ່ຽວເມືອງປະຫວັດສາດແຫ່ງນີ້ເຕີບ ໃຫຍ່ຂະຫຍາຍຕົວ.

    ແຂວງຫົວພັນເປັນແຂວງໜຶ່ງທີ່ທຸກຍາກໄລ່ມາຮອດສົກປີ 2011-2012 ອັດຕາຄອບຄົວທຸກ ຍາກໃນແຂວງດັ່ງ ກ່າວຍັງກວມເອົາຫລາຍເຖິງ 44,84% ເຖິງວ່າ 2-3 ປີຜ່ານມານີ້,ເສດຖະກິດຂອງ ແຂວງຫົວພັນກໍມີທ່າຂະຫຍາຍ ຕົວດີສົມຄວນ ຄືສົກປີ 2011- 2012 ຜ່ານມາ, ລວມຍອດຜະລິດ ຕະພັນພາຍໃນ (GDP) ຂອງ ແຂວງບັນລຸໄດ້ 1.190 ຕື້ກວ່າກີບ, ມີອັດຕາການຂະຫຍາຍຕົວ 12,67%, ໃນນັ້ນກະສິກຳກວມເອົາ 63,66%, ອຸດສາຫະກຳ ກວມເອົາ 14,22% ແລະ ການບໍລິການ ກວມເອົາ 22,12% ໂດຍສະເລ່ຍ ລາຍຮັບຂອງພົນລະເມືອງຜູ້ໜຶ່ງ ບັນລຸໄດ້ປະມານ 514 ໂດລາຕໍ່ປີ ແລະ ສະເພາະສົກປີດັ່ງກ່າວແຂວງຫົວພັນໄດ້ຈັດຕັ້ງປະຕິບັດໂຄງການລົງ ທຶນທັງໝົດ 299 ໂຄງການລວມມີມູນຄ່າຫລາຍກວ່າ 530 ຕື້ກີບ, ໃນນັ້ນມີທຶນຕ່າງປະເທດຫລາຍກວ່າ 485 ຕື້ກີບ.