ໃນຕອນບ່າຍຂອງວັນທີ 25 ເມສານີ້,
ພະນະທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ ແລະ ຄະນະ ໄດ້ເດີນທາງກັບເຖິງ
ສປປ ລາວ ພາຍຫລັງສຳເລັດການເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 22 ເຊິ່ງໄດ້ຈັດຂຶ້ນໃນວັນທີ
24-25 ເມສານີ້ ຢູ່ບັນດາເສຣີ ເບກາວັນ ປະເທດບຣູໄນ ດາຣູຊາລາມ.
ໃນກອງປະຊຸມສຸດຍອດອາຊຽນ ຄັ້ງທີ 22 ນີ້,
ບັນດາຜູ້ນຳອາຊຽນ ໄດ້ປຶກສາຫາລື 4 ຫົວຂໍ້ທີ່ສຳຄັນຄື 1. ການສ້າງປະຊາຄົມອາຊຽນ.
2. ການພົວພັນກັບພາຍນອກຂອງອາຊຽນ, 3. ທິດທາງໃນອະນາຄົດຂອງອາຊຽນ ແລະ 4. ສະພາບການພາກພື້ນ
ແລະ ສາກົນທີ່ພົ້ນເດັ່ນ ແລະ ມີຄວາມສົນໃຈຮ່ວມກັນ.
ໃນກອງປະຊຸມສຸດຍອດອາຊຽນ ຄັ້ງທີ 21 ໃນເດືອນພະຈິກ
2012 ຢູ່ພະນົມເປັນ, ບັນດາຜູ້ນຳອາຊຽນ ໄດ້ຕົກ ລົງເອົາວັນທີ 31 ທັນວາ 2015
ເປັນວັນປະກາດການສ້າງ ຕັ້ງປະຊາຄົມອາຊຽນ. ດັ່ງນັ້ນ, ໃນກອງປະຊຸມສຸດຍອດອາຊຽນ
ຄັ້ງທີ 22 ນີ້, ບັນດາຜູ້ນຳອາຊຽນ ຈຶ່ງໄດ້ທົບທວນ ຄືນຄວາມຄືບໜ້າໃນການສ້າງປະຊາຄົມອາຊຽນ
ແລະ ໄດ້ມີຄວາມຍິນດີຕໍ່ຄວາມຄືບໜ້າໃນການຈັດຕັ້ງປະຕິບັດແຜນແມ່ບົດຂອງ
3 ເສົາຄ້ຳປະຊາຄົມອາຊຽນ (ປະຊາຄົມການເມືອງ- ຄວາມໝັ້ນຄົງ, ປະຊາຄົມເສດຖະ ກິດ
ແລະ ປະຊາຄົມວັດທະນະ ທຳ- ສັງຄົມ), ແຜນວຽກຂໍ້ລິເລີ່ມວ່າດ້ວຍການເຊື່ອມໂຍງອາຊຽນໄລຍະ
2, ແຜນແມ່ບົດວ່າດ້ວຍການເຊື່ອມຈອດອາຊຽນ ແລະ ໄດ້ຮຽກຮ້ອງໃຫ້ທຸກຂະແໜງການຂອງອາຊຽນສືບຕໍ່ຄວາມພະຍາຍາມໃນ
ການຈັດຕັ້ງ
ປະຕິບັດບັນດາແຜນວຽກຂອງຕົນຢ່າງມີປະສິດທິຜົນ. ພ້ອມກັນນັ້ນ,ບັນດາຜູ້ນຳອາຊຽນກໍໄດ້ຮັບຊາບບູລິມະສິດ
ແລະ ກິດ ຈະກຳຕ່າງໆພາຍໃຕ້ການເປັນປະ ທານອາຊຽນຂອງບຣູໄນດາຣູ ຊາລາມ ສຳລັບປີ
2013 ພາຍໃຕ້ຄຳຂວັນ “ປະຊາຊົນຂອງພວກເຮົາ, ອະນາຄົດຮ່ວມຂອງພວກເຮົາ”.
ກ່ຽວກັບການພົວພັນກັບພາຍນອກ, ບັນດາຜູ້ນຳອາຊຽນ
ໄດ້ຢ້ຳເຖິງຄວາມສຳຄັນຂອງການສືບຕໍ່ຮັດແໜ້ນການຮ່ວມມືກັບພາຍນອກຂອງອາຊຽນ
ເພື່ອປະ ກອບສ່ວນເຂົ້າໃນຂະບວນການສ້າງປະຊາຄົມອາຊຽນໂດຍລວມ ກໍຄືບົດບາດເປັນແກນກາງ
ຂອງອາຊຽນໃນຂອບການຮ່ວມມືທີ່ອາຊຽນເປັນຜູ້ລິເລີ່ມຄື ອາຊຽນ +1, ອາຊຽນ
+3, ເວທີພາກພື້ນ ອາຊຽນ, ກອງປະຊຸມລັດຖະມົນ ຕີປ້ອງກັນປະເທດອາຊຽນບວກ ແລະ ກອງປະຊຸມສຸດຍອດອາຊີຕາເວັນອອກ
ແນໃສ່ສືບຕໍ່ປະ ກອບສ່ວນເຂົ້າໃນພາລະກິດລວມແຫ່ງການປົກປັກຮັກສາ ແລະ ສົ່ງເສີມສັນຕິພາບ,
ສະຖຽນລະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກໂດຍລວມ.
ກ່ຽວກັບທິດທາງໃນອະນາຄົດຂອງອາຊຽນ, ບັນດາຜູ້ນຳອາຊຽນເຫັນວ່າ:ອາຊຽນຄວນກຳ
ນົດວິໄສທັດຂອງຕົນ ພາຍຫລັງການສ້າງປະຊາຄົມອາຊຽນ ໃນປີ 2015 ແລະ ໄດ້ມອບໝາຍໃຫ້ບັນດາລັດຖະມົນຕີທີ່ກ່ຽວຂ້ອງປຶກສາຫາລືກັນກ່ຽວກັບບັນ
ຫານີ້ ແລະ ມີຂໍ້ສະເໜີແນະໃຫ້ຜູ້ນຳອາຊຽນພິຈາລະນາໃນກອງປະຊຸມສຸດຍອດເທື່ອຕໍ່ໄປ.
ນອກຈາກຫົວຂໍ້ທີ່ກ່າວມາຂ້າງເທິງ,ບັນດາຜູ້ນຳອາຊຽນ
ຍັງໄດ້ປຶກສາຫາລືກັນກ່ຽວກັບສະພາບການພາກພື້ນ ແລະ ສາ ກົນທີ່ພົ້ນເດັ່ນ ແລະ
ມີຄວາມສົນໃຈຮ່ວມກັນເຊັ່ນ:ການຟື້ນໂຕຂອງເສດຖະກິດຂອງບາງພາກ ພື້ນທີ່ຍັງມີຄວາມບໍ່ແນ່ນອນ,
ສະ ພາບການໃນແຫລມເກົາຫລີ, ສະ ພາບການຢູ່ຕາເວັນອອກກາງ ແລະ ອື່ນໆ.
ສຳລັບ ສປປ ລາວ, ນອກຈາກໄດ້ປະກອບສ່ວນປຶກສາຫາລືໃນຫົວຂໍ້ທີ່ກ່າວມາຂ້າງເທິງແລ້ວ,
ພະນະທ່ານນາຍົກລັດຖະ ມົນຕີ ທອງສິງ ທຳມະວົງ ໄດ້ຖືໂອກາດການເຂົ້າຮ່ວມກອງປະຊຸມສຸດຍອດອາຊຽນຄັ້ງທີ
22 ນີ້ ສະແດງຄວາມຂອບໃຈຕໍ່ບັນ ດາປະເທດສະມາຊິກອາຊຽນ, ຄູ່ເຈລະ ຈາອາຊຽນ
ແລະ ບັນດາປະເທດ ແລະ ອົງການຈັດຕັ້ງພາກພື້ນ ແລະ ສາກົນອື່ນໆທີ່ໄດ້ໃຫ້ການສະໜັບສະໜູນ
ແລະ ຊ່ວຍເຫລືອ ສປປ ລາວ ອັນໄດ້ເຮັດໃຫ້ ສປປ ລາວ ໄດ້ເຂົ້າເປັນສະມາຊິກອົງ ການການຄ້າໂລກ
ໃນວັນທີ 2 ກຸມພາ 2013 ເຊິ່ງບໍ່ສະເພາະແຕ່ເປັນການເປີດກວ້າງການຮ່ວມມືດ້ານເສດຖະກິດ,ການຄ້າ,
ການລົງທຶນ ແລະ ການບໍລິການຂອງ ສປປ ລາວ, ແຕ່ຍັງເປັນການປະ ກອບສ່ວນເຂົ້າໃນການສ້າງປະ
ຊາຄົມເສດຖະກິດອາຊຽນນຳອີກ.
No comments:
Post a Comment