ເຈົ້າໜ້າທີ່ ປກສ ນະຄອນ ຫລວງວຽງຈັນ ເປີດເຜີຍວ່າ:
ໃນອາທິດຜ່ານມາ ຢູ່ນະຄອນຫລວງວຽງຈັນມີຄະດີຕ່າງໆເກີດຂຶ້ນຫລາຍກວ່າ 50 ເລື່ອງ
ພົ້ນເດັ່ນກວ່າໝູ່ແມ່ນຄະດີປຸ້ນຈີ້ຊີງຊັບ ແລະ ບັນຫາຢາເສບຕິດ ເຊິ່ງໃນນັ້ນເຈົ້າໜ້າທີ່ສາມາດແກ້ໄຂໄດ້
25 ເລື່ອງ, ກັກຜູ້ຕ້ອງຫາມາດຳເນີນຄະດີໄດ້ 10 ຄົນ ຄືຄະດີຄ້າຂາຍຢາເສບຕິດທີ່ເຈົ້າໜ້າທີ່
ປກສ ເມືອງສີສັດຕະນາກ ຈັບຜູ້ຕ້ອງຫາມາດຳເນີນຄະດີໄດ້ ຄືທ້າວ ຈັນດີ ອາຍຸ
41 ປີ ຢູ່ບ້ານທົ່ງພານທອງ ໃນຂະນະພວມດຳເນີນການຊື້-ຂາຍຢາເສບຕິດປະເພດຢາບ້າຈຳນວນ
100 ກວ່າເມັດແລະ ຜູ້ກ່ຽວກໍຮັບສາລະພາບວ່າຕົນເອງຕິດຢາເສບຕິດມາແຕ່ປີ
2012 ແລະ ຫລັງຈາກນັ້ນ ກໍໄດ້ເລີ່ມຄ້າຂາຍຢາເສບຕິດໃຫ້ຜູ້ເສບລາຍຍ່ອຍມາຫລາຍເທື່ອແລ້ວເພື່ອສະໜອງ
ໃຫ້ກຸ່ມໄວໜຸ່ມ ແລະ ນັກຮຽນຜູ້ຕິດຢາເສບຕິດຢູ່ບ້ານດຽວກັນຈຳນວນໜຶ່ງໃນລາຄາເມັດລະ
30.000-35.000 ກີບ ໂດຍຊື້ຈາກຜູ້ຄ້າຂາຍຢາເສບຕິດລາຍໃຫຍ່ຢູ່ເມືອງໄຊເສດຖາ
ແລະ ເທື່ອຫລ້າສຸດ ໄດ້ສັ່ງຊື້ຢາບ້າຈຳນວນ 200 ເມັດມາເສບ ພ້ອມຈຳໜ່າຍເປັນລາຍຍ່ອຍກ່ອນຖືກເຈົ້າໜ້າທີ່ຈັບໄດ້.
ເຈົ້າໜ້າທີ່ໃຫ້ຮູ້ວ່າ: ປັດຈຸບັນ ສະພາບການຊື້-ຂາຍ
ແລະ ມົ້ວ ສຸມຢາເສບຕິດຂອງໄວໜຸ່ມຢູ່ນະ ຄອນຫລວງວຽງຈັນມີລັກສະນະເພີ່ມຂຶ້ນຫລາຍ
ສິ່ງດັ່ງກ່າວກໍເນື່ອງມາຈາກການບໍ່ມີວຽກເຮັດງານທຳ ແລະ ການຫລິ້ນກິນຟຸມເຟືອຍຢູ່ໃນສັງຄົມ
ອັນເປັນປາກົດ ການແກ້ໄຂໄດ້ຍາກ ຖ້າຫລາຍພາກສ່ວນບໍ່ຮ່ວມມືກັນເຮັດຢ່າງຈິງຈັງ
ໂດຍສະເພາະສະຖາບັນຄອບຄົວກໍຕ້ອງໃສ່ໃຈສຶກສາອົບ ຮົມລູກຫລານຂອງຕົນໃຫ້ດີ
ເພື່ອເຂົາເຈົ້າບໍ່ໄປຫຍຸ້ງກ່ຽວກັບສິ່ງຫຍໍ້ທໍ້ດັ່ງກ່າວ. ພ້ອມນັ້ນ ສະຖາບັນການສຶກສາກໍຕ້ອງມີລະບຽບເຂັ້ມງວດຕໍ່ນັກຮຽນ-ນັກສຶກສາໃນການຫ່າງໄກຈາກຢາເສບຕິດ
ໂດຍການຈັດກິດຈະກຳ ແລະ ການຫລິ້ນກິລາປະເພດຕ່າງໆທີ່ໃຫ້ສາລະກວ່າ. ພ້ອມນັ້ນ
ເບື້ອງ ສັງຄົມກໍຕ້ອງເປັນເຈົ້າການ, ເປັນຫູເປັນຕາຊ່ວຍເຈົ້າໜ້າທີ່ໃນການເຄື່ອນໄຫວປາບປາມສິ່ງບໍ່ດີດັ່ງ
ກ່າວໃຫ້ໝົດໄປ.
No comments:
Post a Comment