ບໍ່ຄຳ-ທອງເຊໂປນ ພວມເລັ່ງປົວແປງສະພາບແວດລ້ອມ

              ສະພາບແວດລ້ອມໜ້າ ດິນ ແລະ ປ່າໄມ້ຢູ່ເຂດສຳປະທານຂອງບໍ່ຄຳ- ທອງເຊໂປນ ພວມມີການປົວແປງສະພາບໃຫ້ສົມດູນກັບທຳມະຊາດຫຼາຍທີ່ສຸດ ນັບແຕ່ໄດ້ມີການບຸກເບີກ ແລະ ຂຸດເຈາະບໍ່ທອງ-ຄຳໃນເຂດດັ່ງກ່າວ ແລະ ເມື່ອ ໄລຍະການສຳປະທານທີ່ພວມຈະໝົດລົງໃນອີກບໍ່ເທົ່າໃດປີຂ້າງໜ້າຊຶ່ງເຮັດ ໃຫ້ບໍລິສັດຕ້ອງໄດ້ມີການເລັ່ງພັດທະນາສະພາບແວດລ້ອມຕາມພັນທະທີ່ຕົກ ລົງກັບລັດຖະບານ. ມາຮອດປັດຈຸບັນເນື້ອທີ່ຫຼາຍເຮັກຕາກໍໄດ້ມີການປົວແປງສະພາບແວດລ້ອມທີ່ຖືກລົບກວນໃຫ້ມີສະພາບປົກກະຕິໃຫ້ຫຼາຍທີ່ ສຸດຊຶ່ງຄາດວ່າຈະໃຊ້ເວລາຫຼາຍສົມຄວນເພື່ອສາມາດຟື້ນຟູສິ່ງແວດລ້ອມໄດ້ ກັບມາສົມບູນຫຼາຍຂຶ້ນ.           

         ການຟື້ນຟູສະພາບແວດລ້ອມໃນເຂດສຳປະທານບໍ່ຄຳ-ທອງ ເຊໂປນ ເປັນວຽກງານໜຶ່ງທີ່ສຳຄັນພາຍຫຼັງກອງປະຊຸມ ຂອງຄະນະກຳມະການປິດບໍ່ຂອງບໍ່ຄຳ-ທອງ ເຊໂປນ ໄດ້ມີການພິຈາລະນາຄາດວ່າອາດຈະດຳເນີນການຜະລິດຢ່າງໜ້ອຍຮອດ

ປີ 2020 ຊຶ່ງຕ້ອງໄດ້ມີການວາງແຜນເບື້ອງຕົ້ນສຳລັບການປິດບໍ່ເພື່ອຮັບປະກັນໃຫ້ສະພາບແວດລ້ອມທີ່ດີບໍ່ໃຫ້ມີຜົນກະທົບ ໂດຍມາຮອດປັດຈຸບັນການຟື້ນຟູສະພາບແວດລ້ອມທີ່ຖືກລົບກວນນັ້ນກໍເຫັນໄດ້ວ່າມີການປັບປຸງດີຂຶ້ນໄປຕາມລຳດັບ. ວິຊາ ການທີ່ປຶກສາດ້ານສິ່ງແວດລ້ອມບໍ່ຄຳ -ທອງເຊໂປນ ໃຫ້ຮູ້ວ່າ: ພາຍຫຼັງການຂຸດຄົ້ນແຮ່, ການຟື້ນຟູກໍດຳເນີນຂຶ້ນເພື່ອປັບສະ ພາບໜ້າດິນໃຫ້ແໜ້ນ ແລະ ປູກຕົ້ນໄມ້ຄືນໃໝ່ໃນປີ 2012 ຈຳນວນ 15,6 ເຮັກຕາໄດ້ຮັບການຟື້ນຟູຄືນຊຶ່ງຫຼາຍກວ່າ 39% ຂອງການຟື້ນຟູທີ່ໄດ້ວາງແຜນໄວ້. ປັດຈຸບັນການບູລະນະເຂດທີ່ໄດ້ຮັບການຟື້ນຟູແລ້ວບັນລຸໄດ້ຫຼາຍກວ່າ 37 ເຮັກຕາ ໂດຍ ການຟື້ນຟູແມ່ນມີການປູກຕົ້ນໄມ້ຄືນເພື່ອເຮັດໃຫ້ໜ້າດິນໝັ້ນຄົງ ແລະ ປ້ອງກັນການເຊາະເຈື່ອນ. ຈາກນັ້ນກໍບຳລຸງຮັກສາ ແລະ ໄດ້ຮ່ວມກັບອົງການອະນຸລັກສັດປ່າ (WCS ) ເພື່ອເພີ່ມຈຳນວນປະຊາກອນແຂ້ນ້ຳຈືດ, ອະນຸລັກເຂດນ້ຳລຳທານ ທີ່ ພວກມັນອາໄສຢູ່ ແລະ ປັບປຸງການດຳລົງຊີວິດສຳລັບບັນດາຊຸມຊົນທີ່ອາໄສຢູ່ຄຽງຄູ່ກັບແຂ້ນ້ຳຈືດ ແລະ ໂຄງການຮັກສາແຫຼ່ງ ນ້ຳຊຶ່ງໄດ້ມີການສ້າງອ່າງບຳບັດນ້ຳທີ່ໄຫຼຜ່ານບໍລິເວນເຂດຂຸດຄົ້ນບໍ່ຄຳ-ທອງເຊໂປນ ເພື່ອບໍ່ໃຫ້ສົ່ງຜົນກະທົບຕໍ່ສະພາບແວດ ລ້ອມຫ້ວຍຮ່ອງ, ລຳເຊ ແລະ ການດຳລົງຊີວິດຂອງປະຊາຊົນ.