laophatthananewspaper: ເມື່ອຄຳຕັດສິນຂອງສານບໍ່ໄດ້ຮັບການຈັດຕັ້ງປະຕິບັດຢ່າງເຂັ້ມງວດ ແລ້ວໃຜຈະເປັນຜູ້ຮັບຜິດຊອບ ?

ປັດຈຸບັນ ບັນຫາຂໍ້ຂັດແຍ່ງດ້ານທີ່ດິນຢູ່ປະເທດເຮົາແມ່ນເກີດຂຶ້ນໃນຫລາຍກໍລະນີ ແລະ ການອອກໃບຕາດິນຊະຊາຍ, ທັບຊ້ອນ ໂດຍຖືເບົາຕໍ່ການກວດກາຂອງພາກສ່ວນກ່ຽວຂ້ອງນີ້ ແມ່ນສາເຫດໜຶ່ງທີ່ພາໃຫ້ເກີດມີຂໍ້ຂັດແຍ່ງດັ່ງກ່າວໃນສັງຄົມ ຈົນເຖິງຂັ້ນຂຶ້ນຮ້ອງຟ້ອງຕໍ່ສານມາແລ້ວຫລາຍກໍລະນີ. ດັ່ງກໍລະນີນີ້ຕົວຢ່າງໜຶ່ງທີ່ເກີດຂຶ້ນຢູ່ບ້ານນາກຸງ ເມືອງໄຊທານີ ນະຄອນ ຫລວງວຽງຈັນ ລະຫວ່າງນາງ (ສຄ) ແລະ ນາງ (ສຫວ) (ນາມສົມມຸດ) ໂດຍປະຊາຊົນທ່ານໜຶ່ງໄດ້ນຳເອກະສານສຳຄັນຈຳນວນໜຶ່ງທີ່ນາງ (ສຄ) ໄດ້ປະກອບໃນການສູ້ຄະດີໃນຊັ້ນສານ ເພື່ອທວງເອົາທີ່ດິນມູນຂອງຕົນກັບຄືນມາເປັນກຳມະສິດຂອງວົງຕະກຸນເໝືອນເດີມ, ຕາມເອກະ ສານທີ່ປະຊາຊົນຄົນດັ່ງກ່າວໄດ້ໃຫ້ຂໍ້ມູນແກ່ນັກຂ່າວພວກເຮົາ ເຊິ່ງສາມາດສັງລວມໄດ້ວ່າ: ກ່ອນໜ້ານີ້ ຄືໃນປີ 2010 ມີນາງ (ສຄ) ໄດ້ນຳເອົາໃບຕາດິນ ຈຳ ນວນ 3 ຕອນ ໃນນີ້ຢູ່ບ້ານນາກຸງ ເມືອງໄຊທານີ 2 ຕອນ ແລະ ຢູ່ບ້ານໂພນຄໍ້ ເມືອງໄຊທານີ 1 ຕອນ ລວມເນື້ອທີ່ຫລາຍພັນເຮັກ ຕາ ໄປຊວດຈຳນຳນາງ (ສຫວ) ເພື່ອເອົາເງິນມາລົງທຶນລ້ຽງໝູ. ຈາກນັ້ນ ກໍມີການໃຊ້ແທນຄືນທັງຕົ້ນທຶນທີ່ກູ້ຢືມ ແລະ ອັດຕາດອກເບ້ຍທີ່ໄດ້ມີການຕົກລົງກັນຕາມສັນຍາ, ແຕ່ກໍເກີດມີບັນຫາຕາມມາ ຄືຜູ້ທີ່ປ່ອຍເງິນກູ້ຄືນາງ (ສຫວ) ໄດ້ລັກເອົາໃບຕາດິນທັງ 3 ຕອນຂອງນາງ (ສຄ) ທີ່ມາຊວດຈຳ ນັ້ນໄປເຮັດໃບຕາດິນໃໝ່ ໂດຍ

ອອກຊື່ຜູ້ກ່ຽວເອງ ແລະ ສາມີ ເຊິ່ງໃບຕາດິນທີ່ເຮັດໃໝ່ນັ້ນອອກໃຫ້ໂດຍພະແນກຊັບພະ ຍາ ກອນທຳມະຊາດ ແລະ ສິ່ງແວດລ້ອມນະຄອນຫລວງວຽງຈັນ. ຫລັງທີ່ສານປະຊາຊົນສູງສຸດໄດ້ພິຈາລະນາຄຳຮ້ອງຟ້ອງຂອງນາງ (ສຄ) ແລ້ວ ຈຶ່ງຕັດສິນໃຫ້ລຶບລ້າງໃບຕາດິນທີ່ຜູ້ປ່ອຍເງິນກູ້ຄືນາງ (ສຫວ) ໄດ້ອອກເປັນຊື່ຕົນເອງນັ້ນ. ຈາກບັນຫາດັ່ງ ກ່າວ ຈຶ່ງເປັນສະນວນສຳຄັນທີ່ກໍ່ໃຫ້ເກີດຂໍ້ຂັດແຍ່ງທາງທີ່ດິນລະຫວ່າງສອງຝ່າຍ ອັນເປັນໜຶ່ງໃນຫລາຍໆປາກົດການຫຍໍ້ທໍ້ທີ່ແຜ່ຫລາຍຂອງສັງຄົມ ແລະ ມີການຮ້ອງຟ້ອງຕໍ່ສານ ເພື່ອຕັດ ສິນຫາຄວາມຖືກຕ້ອງ ແລະ ເປັນທຳ. ສຳລັບກໍລະນີຂໍ້ຂັດແຍ່ງທີ່ກ່າວມານີ້, ຜ່ານການພິຈາລະນາຢ່າງຮອບຄອບຂອງສານປະຊາ ຊົນສູງສຸດ ຈຶ່ງໄດ້ມີຄຳພິພາກສາ ສະບັບເລກທີ 23/ລລ.ກ, ລົງວັນທີ 30 ພຶດສະພາ 2013 ໄດ້ຕັດສິນໃຫ້ລຶບລ້າງໃບຕາດິນໃໝ່ທີ່ອອກຊື່ຜູ້ປ່ອມໃບຕາດິນ (ນາງ ສຫວ) ແລະ ໃຫ້ເຮັດໃບຕາດິນໃໝ່ໃຫ້ເຈົ້າຂອງເດີມ ຄືນາງ (ສຄ) ຜູ້ກູ້ຢືມ ພ້ອມທັງໃຫ້ຜູ້ປ່ອຍເງິນກູ້ (ນາງ ສຫວ) ສົ່ງເງິນທີ່ຜູ້ກູ້ຢືມໄດ້ຈ່າຍເກີນຈຳນວນ 80 ກວ່າລ້ານ ໃນຜ່ານມາ. ພ້ອມກັນນີ້ ສານປະ ຊາຊົນສູງສຸດກໍໄດ້ອອກໜັງສືແຈ້ງເຖິງພາກສ່ວນທີ່ກ່ຽວຂ້ອງໃຫ້ຈັດຕັ້ງປະຕິບັດຄຳຕັດສິນຂອງສານຢ່າງເຂັ້ມງວດ, ແຕ່ໃນກໍລະນີນີ້ບໍ່ພຽງແຕ່ຄຳຕັດສິນຂອງສານບໍ່ໄດ້ຮັບການຈັດຕັ້ງ ປະຕິບັດຢ່າງເຂັ້ມງວດເທົ່ານັ້ນ, ຜູ້ປ່ອຍເງິນກູ້ຄືນາງ (ສຫວ) ຍັງໄດ້ນຳດິນຕອນດັ່ງກ່າວໄປຂາຍຕໍ່ໃຫ້ແກ່ນັກທຸລະກິດອີກຕໍ່ໜຶ່ງ ເຊິ່ງໃບຕາດິນໄດ້ປ່ຽນເປັນຊື່ຂອງ (ນາງ ຂ) ຢູ່ບ້ານໄຊມຸງຄຸນ ເມືອງນາຊາຍທອງ ນະຄອນ ຫລວງວຽງຈັນ ເຊິ່ງອອກໃຫ້ໂດຍພະແນກຊັບພະຍາກອນ ແລະ ສິ່ງແວດລ້ອມນະຄອນ ຫລວງວຽງຈັນ, ລົງວັນທີ 28 ພະຈິກ 2013.

ນີ້ເປັນພຽງຕົວຢ່າງໜຶ່ງທີ່ສະແດງໃຫ້ເຫັນວ່າ: ສະພາບການຂັດແຍ່ງດ້ານທີ່ດິນຢູ່ສັງຄົມເຮົາແມ່ນມີລັກສະນະເພີ່ມຂຶ້ນ, ຂໍ້ຂັດແຍ່ງດັ່ງກ່າວຕົ້ນຕໍແມ່ນເກີດຂຶ້ນ ຈາກຄວາມບໍ່ເຂົ້າໃຈເລິກເຊິ່ງຕໍ່ລະບຽບກົດໝາຍທີ່ກ່ຽວຂ້ອງກັບບັນຫາທີ່ດິນຂອງບຸກຄົນຈຳນວນໜຶ່ງ ອັນກໍ່ໃຫ້ເກີດຄວາມສັບສົນ ແລະ ບໍ່ສະຫງົບຂອງສັງຄົມ. ນອກຈາກນັ້ນ ພະນັກງານທີ່ກ່ຽວ ຂ້ອງຈຳນວນໜຶ່ງຍັງຂາດຄວາມຮັບຜິດຊອບຕໍ່ໜ້າທີ່ວຽກງານ, ຂາດຄວາມຮອບຄອບ ແລະ ຖືເບົາຕໍ່ລະບຽບກົດໝາຍ, ພ້ອມທັງມີການສວຍໂອກາດໃຊ້ຕຳແໜ່ງ ໜ້າທີ່ຂອງຕົນເອື້ອອຳນວຍໃຫ້ບຸກຄົນອື່ນເພື່ອວິ້ງເຕັ້ນກະທຳໃນສິ່ງທີ່ບໍ່ຖືກຕ້ອງຕາມລະບຽບກົດໝາຍ ເພື່ອຫວັງຜົນປະໂຫຍດໃສ່ຕົນໂດຍບໍ່ຄຳນຶງເຖິງຜົນສະທ້ອນທີ່ຈະກໍ່ໃຫ້ເກີດຄວາມເສຍຫາຍຕໍ່ຜົນປະໂຫຍດຂອງປະຊາ ຊົນ ແລະ ສ່ວນລວມ, ເວົ້າສະເພາະກໍແມ່ນສ້າງຄວາມບໍ່ເຊື່ອໝັ້ນຂອງປະຊາຊົນຕໍ່ແນວທາງນະໂຍບາຍຂອງພັກ ແລະ ລັດເຮົາ ໂດຍສະເພາະຄວາມສັກສິດ ແລະ ຄວາມຍຸຕິທຳຂອງການປະຕິບັດລະບຽບກົດໝາຍບ້ານເມືອງ.