ເມື່ອມໍ່ໆມານີ້, ແຂວງຫົວພັນ ໄດ້ຈັດພິທີມອບ-ຮັບ
ແລະ ເປີດການນຳໃຊ້ສວນສາທາລະນະມິດຕະພາບ ຫົວພັນ-ກວາງ ນິງ ສສ ຫວຽດນາມ ຢູ່ທີ່ເທສະບານເມືອງຊຳເໜືອ
ດ້ວຍການລົງທຶນຫລາຍກວ່າ 34 ຕື້ກີບ, ໃນນັ້ນມີທຶນຊ່ວຍເຫລືອລ້າຈາກແຂວງກວາງນິງຫລາຍກວ່າ
5,74 ຕື້ກີບ ໂດຍແມ່ນບໍລິສັດຈິດຈະເລີນເປັນຜູ້ຮັບເໝົາກໍ່ສ້າງ, ເຂົ້າຮ່ວມເປັນກຽດໃນພິທີດັ່ງ
ກ່າວມີທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ, ລັດຖະມົນຕີວ່າການກະຊວງສຶກ
ສາທິການ ແລະ ກິລາ, ທ່ານ ຄຳຮຸ່ງ ເຮືອງວົງສີ ກຳມະການສູນກາງພັກ, ເລຂາພັກແຂວງ,
ເຈົ້າແຂວງຫົວພັນ, ທ່ານ ຫງວຽນດຶກລອງ ຮອງເລຂາພັກແຂວງ, ປະທານຄະນະກຳມະການປົກຄອງປະຊາຊົນແຂວງກວາງນິງ
ແລະ ມວນຊົນຊາວເມືອງຊຳເໜືອກໍໄດ້ເຂົ້າຮ່ວມເປັນຈຳນວນຫລາຍ.
ສວນສາທາລະນະດັ່ງກ່າວມີເນື້ອທີ່ກວ້າງ
46.000 ຕາແມັດ, ສ້າງກຳແພງຫີນໃຫຍ່ທີ່ສ່ອງແສງໃຫ້ເຫັນການດຳລົງຊີວິດ ແລະ ວັດທະນະທຳຂອງ
9 ຊົນເຜົ່າແຂວງຫົວພັນທີ່ຜ່ານມາຫລາຍສະໄໝ, ສ້າງມີຫ້ວຍ ແລະ ນ້ຳຕົກທຽມ ແລະ
ນ້ຳພຸ, ເຂດເຝິກແອບກຳລັງກາຍ, ເດີ່ນຈອດລົດມີເນື້ອທີ່ກວ້າງປະມານ 1.000 ຕາແມັດ,
ມີຮ້ານຄ້າຂາຍເຄື່ອງທີ່ລະນຶກ ແລະ ກິນດື່ມ 3 ຫລັງ ປະກອບຕັ່ງຫີນ 140 ຕັ່ງ, ລະບົບໄຟແສງສະຫວ່າງ
ແລະ ເຂດປູກຫຍ້າກວ້າງກວ່າ 21.700 ຕາແມັດ ທີ່ເປັນສັນຍາລັກໜຶ່ງແຫ່ງການຮັດແໜ້ນສາຍພົວພັນມິດຕະພາບທີ່ເປັນມູນເຊື້ອຄວາມສາມັກຄີພິເສດ
ແລະ ການຮ່ວມມືຮອບດ້ານລະຫວ່າງສອງພັກ, ລັດຖະບານ ແລະ ປະຊາຊົນສອງຊາດ ລາວ-ຫວຽດນາມ
ທີ່ມີມາແຕ່ດົນນານແລ້ວນັ້ນ ນັບມື້ແຕກດອກອອກຜົນງອກງາມຍິ່ງໆຂຶ້ນ.
No comments:
Post a Comment