6 ເດືອນ​ຕົ້ນສົກ​ປີ ປກສ ເມືອງ ຈັນທະບູລີ ແກ້ໄຂຄະດີໄດ້ 60 ກວ່າເລື່ອງ

         ເມືອງຈັນທະບູລີ ເປັນ ເມືອງໜຶ່ງທີ່ມີການພັດທະນາ ແລະ ເສດຖະກິດຂະ ຫຍາຍຕົວດີ ຂອງນະຄອນຫຼວງວຽງຈັນ, ຄຽງຄູ່ກັນນັ້ນສະພາບປະກົດ ການຫຍໍ້ທໍ້ ທາງສັງຄົມກໍຍັງເກີດຂຶ້ນຫຼາຍເປັນຕົ້ນແມ່ນລັກຊັບພົນ ລະເມືອງ, ປຸ້ນຈີ້-ຊີງຊັບ, ມົ້ວ ສຸມຢາເສບຕິດ ແລະ ອື່ນໆ ເຮັດໃຫ້ ສັງຄົມບໍ່ມີຄວາມສະຫງົບເຊິ່ງ ສະແດງ ອອກ ຄື: ໃນ 6 ເດືອນຕົ້ນ ສົກປີຜ່ານມານີ້ ຢູ່ ເມືອງຈັນທະບູລີ ມີຄະດີເກີດຂຶ້ນ 169 ເລື່ອງ, ເຈົ້າໜ້າທີ່ສາມາດແກ້ໄຂໄດ້ 67 ເລື່ອງ, ກັກຕົວຜູ້ກະທຳຜິດມາດຳ ເນີນຄະດີ ໄດ້ 102 ຄົນ, ໃນນີ້ ແມ່ນສາມາດແກ້ໄຂກຸ່ມແກ້ງລັກຊັບຄື: ທ້າວ ພູເງິນ ອາຍຸ 25 ປີ ແລະ ທ້າວ ທະນົງສັກ ອາຍຸ 31 ປີ ຢູ່ບ້ານສະຫວ່າງ ທັງສອງໄດ້ ຮ່ວມກັນລົດຈັກ 7 ຄັນ, ຄອມພິວ ເຕີ 5 ເຄື່ອງ ມາດຳ ເນີນຄະດີ ແລະ ກຸ່ມ ທ້າວ ນ້ອຍ ອາຍຸ 19 ປີ ຢູ່ບ້ານ ນາທົ່ມ ພ້ອມພັກພວກຄື: ທ້າວ ຄຳ ປະເສີດ ອາຍຸ 29 ປີ ຢູ່ ບ້ານດົງປ່າແຫຼບ, ທ້າວ ວຽງ ທອງລີ ອາຍຸ 37 ປີ ຢູ່ບ້ານ ໜອງ ບົວ ທອງ, ທ້າວ ແສນຄຳ ອາຍຸ 30 ປີ, ຢູ່ບ້ານໂພນທັນ ແລະ ທ້າວ ເລນູ ອາຍຸ 22 ປີ ຢູ່ບ້ານ ຂົວຫຼວງ ຊຶ່ງພວກ ກ່ຽວໄດ້ຮ່ວມກັນລັກລົດຈັກຫຼາຍເຖິງ 16 ຄັນ.

         ທ່ານ ພັນໂທ ໄມວິໄລສຸກ ແສນອຸໄທຄະນະປະຈຳພັກເມືອງຫົວໜ້າກອງບັນຊາການ ປກສ ເມືອງ ຈັນທະບູລີ ໄດ້ກ່າວ ໃນກອງປະຊຸມສະຫຼຸບວຽກງານ 6 ເດືອນຕົ້ນປີ ວ່າ: ໂດຍລວມ ເມືອງຈັນທະບູລີ ແມ່ນສາມາດຮັບປະກັນໄດ້ຄວາມສະ ຫງົບ, ມີການປ້ອງກັນ ແລະ ກວາດລ້າງ ກຸ່ມແກ້ງເປົ້າໝາຍທີ່ເຄື່ອນໄຫວກໍ່ຄວາມບໍ່ສະຫງົບພາຍໃນເມືອງ, ແຕ່ກໍເຫັນວ່າບັ ນຫາປາກົດການຫຍໍ້ທໍ້ທາງສັງຄົມຍັງ ເກີດຂື້ນນອກຈາກສະພາບລັກຊັບທີ່ເກີດຂຶ້ນພົ້ນເດັ່ນແລ້ວຍັງແມ່ນບັນຫາການມົ້ວ ສຸມຢາເສບຕິດຂອງຊາວໜຸ່ມ ແລະ ຮ້ານບໍລິການບັນເທີງຕ່າງໆທີ່ເຫັນວ່າມີການລະເມີດກົດລະບຽບເປັນຈຳນວນຫຼາຍ, ຊຶ່ງໃນຕໍ່ໜ້າກຳລັງເຈົ້າໜ້າທີ່ພວກເຮົາຈະໄດ້ເພີ່ມທະວີໃນການແກ້ໄຂສະພາບປາກົດການຫຍໍ້ທໍ້ທົ່ວສັງຄົມ, ໂດຍ ເນັ້ນໃຫ້ ປກສ ບ້ານເອົາໃຈໃສ່ໃນການເກັບກຳບັນຊີເປົ້າໝາຍ ແລະ ເລີກຮື້ເປົ້າໝາຍໃຫ້ເດັດຂາດ, ເພີ່ມຄວາມເຂັ້ມງວດໃຫ້ຜູ້ປະກອບ ການທຸລະກິດບັນເທີງໃຫ້ຫັນສູ່ລະບຽບຢ່າງເຂັ້ມງວດເພື່ອເຮັດໃຫ້ສັງຄົມມີຄວາມສະຫງົບ.

          ແນວໃດກໍດີ ທ່ານ ພັນໂທ ແສງເພັດ ນະວົງ ຮອງຫົວໜ້າກອງບັນຊາການນະຄອນຫຼວງວຽງຈັນໄດ້ເຂົ້າຮ່ວມເປັນ ປະທານກອງປະຊຸມດັ່ງກ່າວ ກໍມີຄວາມເຫັນເນັ້ນໃຫ້ເຈົ້າໜ້າທີ່ ເມືອງຈັນທະບູລີ ສືບຕໍ່ພ້ອມກັນເປັນເຈົ້າການໃນການແກ້ ໄຂປາກົດການຫຍໍ້ທໍ້ຕ່າງໆທີ່ເກີດຂຶ້ນ, ຕ້ອງປຸກລະດົມໃຫ້ທົ່ວສັງຄົມມີຄວາມຕື່ນຕົວ ແລະ ໃຫ້ຄວາມຊ່ວຍເຫຼືອແກ່ກຳລັງ ເຈົ້າໜ້າທີ່ໃນການລາຍງານສະພາບ ແລະ ໃຫ້ຂໍ້ມູນກຸ່ມຄົນບໍ່ດີ, ເພື່ອເຮັດໃຫ້ສັງຄົມມີຄວາມສະຫງົບ ແລະ ເປັນລະບຽບຮຽບ ຮ້ອຍ.