ປະຊາຊົນຫລາຍກວ່າ 2 ແສນຄົນໃນເຂດຊົນນະບົດໄດ້ຄວາມຮູ້ຈາກວິທະຍຸຊຸມຊົນ

     ກະຊວງຖະແຫລ່ງຂ່າວ, ວັດທະນະທຳ ແລະ ທ່ອງທ່ຽວ ໃຫ້ຮູ້ວ່າ: ປັດຈຸບັນປະຊາຊົນປະມານ 2 ແສນກວ່າຄົນຢູ່ ແຂວງຊຽງຂວາງ, ເຊກອງ ແລະ ອຸດົມໄຊ ສາມາດຮັບຟັງວິທະຍຸຊຸມຊົນໃນຈຳນວນ 6 ສະຖານີທົ່ວປະເທດ, ຊ່ວຍໃຫ້ ເຂົາເຈົ້າໄດ້ຮັບຮູ້ຂໍ້ມູນຂ່າວສານທີ່ມີປະໂຫຍດຕ່າງໆເປັນຕົ້ນ: ດ້ານການສຶກສາ, ສຸຂະພາບ, ກະສິກຳ, ເຕັກນິກການຜະລິດ, ການປ່ຽນແປງຂອງສະພາບອາກາດ ແລະ ກ່ຽວກັບບັນຫາລະເບີດບໍ່ ທັນແຕກ ແລະ ພວກເຂົາໄດ້ນຳເອົາຄວາມຮູ້ ດັ່ງກ່າວໄປ ໝູນໃຊ້ເຂົ້າໃນໜ້າທີ່ວຽກງານການຜະລິດ, ການຮຽນ, ການເບິ່ງແຍງສຸຂະພາບ, ຕິດຕາມການປ່ຽນແປງຂອງດິນຟ້າອາກາດ ແລະ ຮູ້ປ້ອງກັນຕົນເອງຈາກໄພອັນຕະລາຍຕ່າງໆເຮັດໃຫ້ການດຳລົງຊີວິດມີການພັດທະນາຫັນປ່ຽນດີຂຶ້ນເປັນລຳດັບ.

          ທ່ານ ສະຫວັນຄອນ ຣາຊມຸນຕຣີ ລັດຖະມົນຕີຊ່ວຍວ່າການກະຊວງຖະແຫລ່ງຂ່າວ, ວັດທະນາທຳ ແລະ ທ່ອງທ່ຽວ ໄດ້ກ່າວໃນພິທີເປີດສະຖານີວິທະຍຸຊຸມຊົນຢູ່ເມືອງຮຸນ ແລະ ເມືອງນາໝໍ້, ແຂວງອຸດົມໄຊ ເຊິ່ງແມ່ນການສະໜັບສະໜູນ ຂອງອົງການສະຫະປະຊາຊາດເພື່ອການພັດທະນາ (UNDP) ໃນວັນທີ 3 ກຸມພານີ້ວ່າ: ວິທະຍຸຊົມຊົນ, ແມ່ນການຮັບປະ ກັນໃຫ້ປະຊາຊົນຢູ່ເຂດຫ່າງໄກສອກຫລີກໄດ້ເຂົ້າເຖິງຂໍ້ມູນຂ່າວສານດ້ານຕ່າງໆຫລາຍຂຶ້ນສາມາຊ່ວຍປັບປຸງຄຸນນະພາບຊີວິດຂອງປະຊາຊົນ, ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມຢູ່ເຂດຊົນນະ ບົດ ແລະ ມີສ່ວນສຳຄັນໃນການຫລຸດຜ່ອນ ຄວາມທຸກຍາກຂອງປະຊາຊົນ.

     ທ່ານນາງ ອາຊູຊາ ຄູໂບຕາ ຮອງຜູ້ຕາງໜ້າອົງການສະຫະປະຊາຊາດ ກ່າວວ່າ: ພວກເຮົາຍີນດີຮ່ວມມືກັບລັດຖະ ບານ ລາວ ເພື່ອຊ່ວຍເຫລືອພັດທະນາວຽກງານວິທະຍຸຊຸມຊົນ ເພາະວ່າມັນເປັນເຄື່ອງມືສຳຄັນຊຸກຍູ້ການພັດທະ ນາເສດຖະກິດ- ສັງຄົມຢ່າງແທ້ຈິງ ແລະ ໃນປີນີ້ກໍຈະສ້າງສະຖານີວິທະຍຸຊຸມຊົນອີກ 2 ແຫ່ງຢູ່ເມືອງຄອບ, ແຂວງໄຊຍະບູລີ ແລະ ເມືອງລະຄອນເພັງ, ແຂວງສາລະວັນ.ສ່ວນສະຖານີວິທະຍຸຊຸມ ຊົນ ທີ່ສ້າງສຳເລັດແລ້ວມີຄື: ຢູ່ເມືອງຄູນແລະ ໜອງແຮດ ແຂວງຊຽງຂວາງ ເມືອງທ່າແຕງ ດາກຈຶງແຂວງເຊກອງ ແລະ ເມືອງຮຸນ ນາໝໍ້ແຂວງອຸດົມໄຊ.