ລາວຈະຈັດສັບປະດາຄວາມປອດໄພທາງຖະໜົນ 2015 ໃນທ້າຍເດືອນມີນານີ້

    ກະຊວງໂຍທາທິການ ແລະ ຂົນສົ່ງ, ກະຊວງປ້ອງກັນຄວາມສະຫງົບ, ອົງການ ກາແດງລາວ, ສູນກາງຊາວໜຸ່ມປະຊາຊົນປະຕິ ວັດລາວ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ໜ່ວຍກູ້ໄພນະຄອນຫລວງ, ບໍລິສັດນິວຈິບເຊັງ, ຈະຮ່ວມກັນຈັດງານສັບປະດາຄວາມປອດໄພທາງຖະໜົນລາວ-ສາກົນ 2015 ແລະ ຂັບຂີ່ປອດໄພປະຕິບັດກົດຈະລາຈອນ ແລະ ລະວັງເດັກ ນ້ອຍ ຂຶ້ນໃນວັນທີ 28 ມີນານີ້, ຢູ່ສວນເຈົ້າອານຸວົງ ບໍລິເວນເດີ່ນຜາມໄຊທ່າວັດຈັນ, ເມືອງຈັນທະບູລີ, ນະຄອນຫລວງວຽງຈັນ.

     ຕາມແຈ້ງການຂອງຄະນະກຳມະການແຫ່ງຊາດດ້ານຄວາມປອດໄພທາງຫລວງ ໃຫ້ຮູ້ວ່າ: ການຈັດງານ ດັ່ງກ່າວ ກໍເພື່ອ ເປັນການລະນຶກເຖິງສັບປະດາຄວາມປອດໄພທາງຖະໜົນຂອງລາວປະຈຳປີ 2015 ແຕ່ວັນທີ 29 ມີນາຫາ 4 ເມສາ 2015

ແລະ ສັບ ປະດາຄວາມປອດໄພທາງຖະໜົນສາກົນຄັ້ງທີ 3 ແຕ່ວັນທີ 4 - 10 ພຶດສະພາ 2015, ທັງເປັນການໂຄສະນາປູກ ຈິດສຳນຶກໃຫ້ທົ່ວສັງຄົມເວົ້າລວມ, ເວົ້າສະເພາະນະຄອນຫລວງໃຫ້ຫລີ້ນບຸນປີໃໝ່ລາວ ພສ 2558 ດ້ວຍບັນຍາກາດມ່ວນ ຊື່ນ ແລະ ປອດໄພດີກວ່າປີຜ່ານມາ.

    ສຳລັບກິດຈະກຳຂອງງານດັ່ງກ່າວ, ຈະມີການວາງສະແດງຜະລິດຕະພັນຍານຍົນຂອງບັນດາບໍລິສັດ-ຫ້າງຮ້ານທີ່ຜະລິດ ແລະ ຈຳໜ່າຍລົດໃນລາວ, ວາງສະແດງຮູບພາບກ່ຽວກັບຄວາມປອດໄພ, ມີຂະບວນຂີ່ລົດຖີບຜ່ານຜາມໄຊທ່າວັດຈັນ, ໄຟແດງທາດຂາວ, ຫໍວັດທະນະທຳ, ສວນເຈົ້າຟ້າງຸ່ມ, ໂຮງຮຽນມິດຕະພາບວຽງຈັນ-ຮ່າໂນ້ຍ, ວິທະຍາໄລວິຊາຊີບເຕັກ ນິກປາກປ່າສັກ ແລະ ກັບມາທ່າວັດຈັນລວມໄລຍະທາງ 7 ກິໂລແມັດ, ນອກຈາກນີ້, ຍັງມີການແຂ່ງຂັນຖາມ-ຕອບ ຄຳຖາມກ່ຽວກັບຄວາມປອດໄພຂອງການຂັບຂີ່ລົດບົນທ້ອງຖະໜົນ ແລະ ແຈກຢາຍເສື້ອຍືດນຳດ້ວຍ. ດັ່ງນັ້ນຈຶ່ງຂໍເຊີນຊວນມວນຊົນເຂົ້າຮ່ວມໃນຂະບວນການສະຫລອງງານສັບປະດາດັ່ງກ່າວດ້ວຍໃຫ້ມີບັນຍາກາດຟົດຟື້ນ.