laophatthananewspaper: ລາວ-ກຳປູເຈຍ ຖືສຳຄັນການຄວບຄຸມ, ສະກັດກັ້ນ ແລະ ຕ້ານຢາເສບຕິດຮ່ວມກັນ

ກອງປະຊຸມພົບປະ ແລະ ປຶກສາຫາລືບັນຫາການພົວພັນຮ່ວມມືເພື່ອຄວບຄຸມ, ສະກັດກັ້ນ ແລະ ຕ້ານຢາເສບຕິດ ລະຫວ່າງລາວ ແລະ ກໍາປູເຈຍ ໄດ້ມີຂຶ້ນໃນຕອນເຊົ້າວັນທີ 27 ເມສານີ້, ທີ່ນະຄອນຫລວງວຽງຈັນ, ຝ່າຍລາວນຳໂດຍທ່ານ ກຸ ຈັນສີນາ ປະທານຄະນະກຳມະການແຫ່ງຊາດ ເພື່ອກວດກາ ແລະ ຄວບຄຸມຢາເສບຕິດ, ຝ່າຍກຳປູເຈຍ ນຳໂດຍທ່ານ ແກ ກິມ ຢານ ຮອງນາຍົກລັດຖະມົນຕີ, ປະທານຄະນະກຳມະການຕໍ່ຕ້ານຢາເສບຕິດແຫ່ງລາຊະອານາຈັກກຳປູເຈຍ ພ້ອມຄະນະ, ຊຶ່ງພວມຢູ່ຢ້ຽມຢາມລາວ.

ທ່ານປະທານຄະນະກຳມະການແຫ່ງຊາດ ເພື່ອກວດກາ ແລະ ຄວບຄຸມຢາເສບຕິດ ໄດ້ມີຄຳເຫັນວ່າ: ໃນແຕ່ໃດໆມາ ສປປ ລາວ ໄດ້ຖືເອົາການຄວບຄຸມ, ສະກັດກັ້ນ ແລະ ຕ້ານຢາເສບຕິດ ເປັນໜ້າທີ່ສຳຄັນ ແລະ ໄດ້ເອົາໃຈໃສ່ຈັດຕັ້ງປະຕິບັດວຽກງານດັ່ງກ່າວຢ່າງຕັ້ງໜ້າ ແລະ ຈິງຈັງຕະຫລອດມາ, ໂດຍສະເພາະການສຶກສາອົບຮົມ ແລະ ໂຄສະນາເຜີຍແຜ່ ເພື່ອປູກຈິດສຳນຶກໃຫ້ຄົນໃນສັງຄົມໄດ້ຮັບຮູ້ ແລະ ເຂົ້າໃຈ ລະບຽບກົດໝາຍ, ເຫັນໄດ້ຜົນຮ້າຍຂອງຢາເສບຕິດດ້ວຍຫລາຍຮູບການ, ໄດ້ດຳເນີນການບຳບັດປິ່ນປົວ, ຟື້ນຟູ ແລະ ຝຶກວິຊາຊີບໃຫ້ຜູ້ຕິດຢາເສບຕິດທັງຢູ່ໃນສູນ ແລະ ຢູ່ຊຸມຊົນ ເພື່ອຊ່ວຍໃຫ້ເຂົາ

ເຈົ້າໄດ້ກັບຄືນເປັນຄົນດີຂອງສັງຄົມ, ພ້ອມກັນນີ້ ຢູ່ເຂດພາກເໜືອຂອງລາວ ລັດຖະບານ ຍັງໄດ້ລົງທຶນປະຕິບັດຫລາຍໂຄງການພັດທະນາຊົນນະບົດ ເພື່ອເຮັດໃຫ້ປະຊາຊົນຫັນໄປເຮັດອາຊີບອື່ນແທນການປູກຝິ່ນ. ນອກຈາກນີ້ ການພົວພັນຮ່ວມມືກັບສາກົນ ໂດຍສະເພາະປະເທດເພື່ອນບ້ານໄກ້ຄຽງ ກໍເປັນອີກວຽກງານໜຶ່ງທີ່ສຳຄັນ, ເຊິ່ງສາມາດເຮັດໃຫ້ບັນຫາຢາເສບຕິດຢູ່ລາວ ຖືກສະກັດກັ້ນ ແລະ ແກ້ໄຂໄດ້ໃນລະດັບອັນແນ່ນອນ, ທັງໄດ້ປະກອບ ສ່ວນອັນສຳຄັນເຮັດໃຫ້ສັງຄົມລາວມີຄວາມສະຫງົບ ແລະ ເປັນລະບຽບຮຽບຮ້ອຍໄດ້ໂດຍພື້ນຖານ. ຄຽງຄູ່ກັບຜົນດີທີ່ໄດ້ຮັບນັ້ນ ກໍຍັງມີບາງຈຸດອ່ອນ ແລະ ສິ່ງທ້າທາຍຫລາຍປະການ ທີ່ຈະຕ້ອງໄດ້ຮີບແກ້ໄຂເຊັ່ນ: ບັນຫາການເສບ ແລະ ການຄ້າຂາຍຢາບ້າລາຍຍ່ອຍຢູ່ຕາມຕົວເມືອງໃຫຍ່ຂອງຫລາຍທ້ອງຖິ່ນ ທີ່ມີທ່າອ່ຽງເພີ້ມຂຶ້ນຢ່າງໜ້າເປັນຫ່ວງ. 10 ປີ ຜ່ານມາ, ໄດ້ປະສົບຜົນສຳເລັດໃນການສູ້ຊົນລົບລ້າງການປູກຝິ່ນ, ແຕ່ຍ້ອນມີຫລາຍສາເຫດທັງໃນຕົວ ແລະ ນອກຕົວ, ມາຮອດປັດຈຸບັນນີ້ ບັນຫາການລັກປູກຝິ່ນຂອງປະຊາຊົນຢູ່ຫລາຍບໍລິເວນທາງພາກເໜືອ ໄດ້ກັບຄືນມາອີກ ແລະ ຢູ່ບາງບ່ອນ, ສະພາບການດັ່ງກ່າວ ໄດ້ມີທ່າອ່ຽງເພີ້ມຂຶ້ນໃນແຕ່ລະປີ.

ທ່ານໃຫ້ຮູ້ຕື່ມວ່າ: ໃນປີ 2015ນີ້, ເປັນປີສຸດທ້າຍຂອງການຈັດຕັ້ງປະຕິ ບັດວິໄສທັດ “ອາຊຽນປອດຈາກຢາເສບຕິດ”, ເພື່ອບັນລຸຄາດໝາຍສູ້ຊົນດັ່ງກ່າວ ໃນຖານະເປັນສະມາຊິກສະມາຄົມອາຊຽນດ້ວຍກັນ, ປະເທດລາວ ແລະ ກຳປູເຈຍ ມີຊາຍແດນຕິດຈອດກັນຍາວກວ່າ 500 ກິໂລແມັດ, ຕັ້ງຢູ່ອານຸພາກພື້ນລຸ່ມແມ່ນ້ຳຂອງນຳກັນ. ສະນັ້ນ ທັງສອງປະເທດຈະຕ້ອງໄດ້ສຶບຕໍ່ເພີ່ມທະວີການຮ່ວມມື ເພື່ອຄວບຄຸມ, ສະກັດ ກັ້ນ ແລະ ຕ້ານຢາເສບຕິດ ແນໃສ່ເຮັດໃຫ້ບັນ ຫາຢາເສບຕິດຢູ່ 2 ປະເທດ ໄດ້ໝົດໄປເທື່ອລະກ້າວ, ເພື່ອນຳເອົາຄວາມສະຫງົບສຸກ ແລະ ຄວາມເປັນລະບຽບຮຽບຮ້ອຍ ມາສູ່ສັງຄົມຂອງ 2 ປະເທດ.