ເປັນນິມິມິດໝາຍທີ່ດີທີ່ທະນາຄານການຄ້າຕ່າງປະເທດລາວ
ມະຫາຊົນ ( ທຄຕລ-BCEL
) ຮ່ວມກັບ Unionpay ສາກົນ ແລະ
ລັດວິສາຫະກິດການບິນລາວ ເປີດການບໍລິການນໍາໃຊ້ບັດເຄຼດິດຮູບແບບໃໝ່
ມາພ້ອມກັບສິດທິພິເສດ ແລະ ການບໍລິການເສີມທີ່ຫຼາກຫຼາຍ ນັ້ນກໍຄືບັດຮ່ວມພິເສດ (Co-Brand card) ທີ່ປະກອບດ້ວຍບັດຄຼາດສິກ, ບັດຄໍາ ແລະ ບັດແພລັດຕິນໍາ
ທີ່ເປັນບັດເຄຼດິດຂັ້ນສິດທິພິເສດສູງສຸດຢູ່ລາວໃນເວລານີ້ ໂດຍການຮ່ວມມືລະຫວ່າງ ທຄຕລ-Unionpay ສາກົນ ແລະ ລັດວິສາຫະກິດການບິນລາວ, ເຊິ່ງພິທີເປີດຕົວການນຳໃຊ້ບັດດັ່ງກ່າວໄດ້ຈັດຂຶ້ນທີ່ໂຮງແຮມລາວພລາຊາ
ນະຄອນຫຼວງວຽງຈັນໃນວັນທີ 25 ສິງຫາຜ່ານມາ .
ທ່ານ
ພູຂົງ ຈັນທະຈັກ ຮັກສາການ ທຄຕລ ໄດ້ກ່າວວ່າ: ບັດຮ່ວມພິເສດ ( Co-Brand card ) ເປັນຜະ ລິດຕະພັນໃໝ່ ຂອງ ທຄຕລ ເຊິ່ງຕະຫຼອດໄລຍະຜ່ານມາພວກເຮົາໄດ້ສຸມສະຕິປັນຍາ
ແລະ ຊັບພະຍາກອນເຂົ້າໃນການພັດທະນາທຸລະກິດ ແລະ ການບໍລິການຂອງ ທຄຕລ ໃຫ້ມີຄວາມທັນສະໄໝ
ແລະ
ສາມາດສະໜອງສິດທິພິເສດໃຫ້ແກ່ລູກຄ້າໂດຍ
ສະເພາະການບໍລິການອີເລັກໂທຼນິກທີ່ສາມາດເຄື່ອນໄຫວທຸລະກໍາທາງດ້ານການເງິນດ້ວຍຕົນເອງແບບອອນລາຍ
ໂດຍບໍ່ຈໍາເປັນເຂົ້າມາທະນາຄານເຊິ່ງໃນ 2 ປີມານີ້ ທຄຕລ
ໄດ້ທະຍອຍເປີດຕົວການບໍລິການ ແລະ ຜະລິດຕະພັນໃໝ່ຮັບໃຊ້ສັງຄົມຢ່າງຕໍ່ເນື່ອງ.
ການອອກຜະລິດຕະພັນໃໝ່ຂອງ ທຄຕລ
ໃນເທື່ອນີ້ມີເປົ້າໝາຍອໍານວຍຄວາມສະດວກໃນການຊໍາລະສະສາງ, ເປັນການສະໜອງສິດທິພິເສດຕ່າງໆແກ່ກຸ່ມລູກຄ້າທີ່ໃຊ້ການບໍລິການຂອງ
ທຄຕລ ແລະ ການບິນລາວ,
ສິດທິພິເສດຂອງບັດ BCEL Co-Brand card ທີ່ເໜືອຈາກບັດເຄຼດິດທົ່ວໄປ
ຍັງເປັນບັດທີ່ສະມາຊິກສະສົມ Mileage ເພື່ອແລກສິດທິພິເສດຕ່າງໆ, ພ້ອມນັ້ນຍັງເຂົ້າພັກຢູ່ຫ້ອງຮັບຮອງລ້າໆ
ເມື່ອເດີນທາງກັບການບິນລາວ ທັງສາມາດນໍາໃຊ້ບັດຮ່ວມພິເສດຫຼາຍກ່ວາ 150
ປະເທດ, 26 ລ້ານຮ້ານຄ້າ ແລະ 1,8 ລ້ານ ຕູ້ ATM
ທົ່ວໂລກ, ໄດ້ຮັບສ່ວນຫຼຸດຈາກບັນດາຮ້ານຄ້າສະມາຊິກ Partnership Program ຂອງ ທຄຕລ,
ສາມາດຄວບຄຸມ ແລະ ຕິດຕາມລາຍການ ເຄື່ອນໄຫວຂອງບັດຜ່ານໂທລະສັບມືຖື
app: BCEL One
ແລະ ບໍລິ ການ hotline ຕະຫຼອດ 24
ຊົ່ວໂມງ, ພິເສດສໍາລັບບັດແພລັດຕິນໍາ ນອກເໜືອຈາກສິດທິພິເສດຂ້າງເທິງແລ້ວຍັງໄດ້ຮັບປະກັນໄພ
ລ້າໆທີ່ຄຸ້ມຄອງສູງສຸດ 90 ວັນ ຕໍ່ປີ (ໃນເວລາປີໜຶ່ງ, ເດີນທາງຫຼາຍຖ້ຽວລວມກັນບໍ່ກາຍ 90
ວັນ), ເຂົ້າພັກຢູ່ຫ້ອງຮັບຮອງພິເສດ ລ້າໆ 2 ຄັ້ງຕໍ່ປີ, ບັດດັ່ງກ່າວຍັງຊ່ວຍໃຫ້ການເດີນທາງສະດວກສະບາຍໂດຍບໍລິການສອບຖາມຂໍ້ມູນທ່ອງທ່ຽວ, ປຶກສາໃຫ້ຄໍາແນະ
ນໍາ, ຊ່ວຍສັ່ງຈອງໂຮງແຮມ ແລະ ຊ່ວຍເຫຼືອເລື່ອງການປິ່ນປົວສຸຂະພາບນຳອີກ.
ດ້ານຜູ້ອໍານວຍການລັດວິສາຫະກິດການບິນລາວ
ມີຄໍາເຫັນວ່າ: ການເຂົ້າຮ່ວມໂຄງການ ນໍາໃຊ້ບັດ Co-Brand ເຮັດໃຫ້ຫຼາຍຄົນທີ່ນໍາໃຊ້ບັດເຫັນໄດ້ ແລະ
ຮູ້ຈັກກັບການບໍລິການຂອງການບິນລາວຫຼາຍຂຶ້ນ, ທັງໃຫ້ສິດທິພິເສດແກ່ຜູ້ໃຊ້ບັດຊື້ປີ້ເຮືອບິນ
ແລະ ສາມາດຊື້ຕາມລະບົບອອນລາຍ, ນອກນີ້ຍັງເຂົ້ານໍາໃຊ້ຫ້ອງຮັບຮອງພິເສດຢູ່ສະໜາມບິນພາຍ
ໃນ ແລະ ຕ່າງປະເທດ,
ພ້ອມທັງເປັນບັດສະມາຊິກເພື່ອສະສົມຄະແນນ, ນໍາແລກສິດທິພິເສດ
ອື່ນໆໃນການນໍາໃຊ້ການບໍລິການຂອງການບິນລາວ, ໂຄງການນີ້ເປັນສ່ວນໜຶ່ງໃນການກຽມຄວາມພ້ອມສູ່
AEC ຂອງລັດວິສາຫະກິດການບິນລາວ ເຊິ່ງເປັນການເຊື່ອມທຸລະກິດສາຍການບິນໃນອາຊຽນ ແລະ
ຍັງເປັນການເຊື່ອມການຮ່ວມມືຂອງບັນດາສາຍການບິນທີ່ມີມາດຕະ
ຖານດຽວເພື່ອຜົນປະໂຫຍດຂອງທຸກຝ່າຍ, ມາຮອດດຽວນີ້ການບິນລາວ
ສາມາດມີລະບົບການຈ່ອງບ່ອນ-ຊື້ປີ້ເຮືອບິນທີ່ເຊື່ອມກັບລະບົບຈ່ອງບ່ອນບັນດາສາຍການບິນໃນໂລກ, ມີລະບົບບໍລິຫານອົງກອນໄດ້ມາດຕະຖານ
ISO, ການບິນລາວຍັງເປັນສະມາຊິກ IATA ດ້ານການຊໍາລະສະສາງ, ມີລະບົບການຄຸ້ມຄອງຄວາມປອດໄພການບິນ
ແລະ ກະກຽມຮັບການກວດສອບ IOSA
ເພື່ອຮັບຮອງເປັນສາຍການບິນທີ່ໄດ້ມາດຕະຖານຄວາມປອດໄພສາກົນໃນທ້າຍເດືອນກັນຍາ
2015 ນີ້.
No comments:
Post a Comment