ລາວກຽມຄວາມພ້ອມເຂົ້າອົງການຄຸ້ມຄອງຫລັກຊັບສາກົນ

ສປປ ລາວ, ເປັນປະເທດໜຶ່ງທີ່ມີການພັດທະນາຕະຫລາດທຶນໃຫ້ນັບມື້ສູ່ມາດຕະຖານສາກົນ ແລະ ຜ່ານມາລັດຖະບານກໍໄດ້ຖືສໍາຄັນການພັດທະນາຕະຫລາດທຶນໃນທຸກດ້ານ, ໂດຍສະເພາະສ້າງທຸກເງື່ອນໄຂເອື້ອອໍານວຍໃຫ້ຄະນະກໍາມະການຄຸ້ມຄອງຫລັກຊັບ​​ປະຕິບັດ​ພາລະ​ບົດບາດ​ຄຸ້ມ​ຄອງ​ມະຫາ​ພາກດ້ານຫລັກຊັບ​, ໂດຍ​ສະ​ເພາະຕະຫລາດຫລັກຊັບລາວໄດ້ດໍາເນີນການຊື້-ຂາຍຮຸ້ນຢ່າງເປັນປົກກະຕິ, ສອດຄ່ອງ ແລະ ມີການເຊື່ອມໂຍງກັບຕະຫລາດຫລັກຊັບພາກພື້ນ ແລະ ສາກົນຫລາຍຂຶ້ນ. ຂະນະດຽວກັນ, ກໍມີຄວາມຄືບໜ້າໃນການກະກຽມຄວາມພ້ອມເຂົ້າເປັນສະມາຊິກອົງການຄຸ້ມຄອງຫລັກຊັບສາກົນ (IOSCO) ໃນກອງປະຊຸມຄະນະກໍາມະການຄຸ້ມຄອງຫລັກຊັບຄັ້ງທີ II ປະຈໍາປີ 2015 ໂດຍການ​ເປັນປະທານຂອງທ່ານຮອງນາຍົກລັດຖະມົນຕີ, ຜູ້ຊີ້ນໍາວຽກງານເສດຖະກິດມະຫາພາກ ແລະ ບໍລິການ, ປະທານຄະນະກໍາມະການຄຸ້ມຄອງຫລັກຊັບ ດຣ ບຸນປອນ ບຸດຕະນະວົງ ໃນວັນທີ 21 ກັນຍານີ້, ໄດ້ຊີ້ໃຫ້ເຫັນຫລາຍບັນຫາທີ່​ເຄື່ອນ​ໄຫວ​ດ້ວຍທ່ວງທ່າຂະຫຍາຍຕົວ, ໂດຍສະເພາະບົດສະຫລຸບການເຄື່ອນໄຫວຊື້-ຂາຍໃນຕະຫລາດຫລັກຊັບລາວໄລຍະ 6 ເດືອນຕົ້ນປີ 2015 ແລະ ແຜນການພັດທະນາຕະຫລາດຫລັກ

ຊັບລາວໃນຕໍ່ໜ້າ, ການອອກຈໍາໜ່າຍຮຸ້ນເພີ່ມທຶນຂອງບໍລິສັດຜະລິດ-ໄຟຟ້າລາວມະຫາຊົນ, ໂຄງການພັດທະນາລະບົບໄອຊີທີຂອງສໍານັກງານຄະນະກໍາມະການຄຸ້ມຄອງຫລັກຊັບໃນໄລຍະປີ 2016-2020 ແລະ ການກະກຽມການເຂົ້າເປັນສະມາຊິກຂອງອົງການຄຸ້ມຄອງຫລັກຊັບສາກົນ, ພ້ອມທັງຮັບຮອງເອົາລະບຽບຂອງຄະນະກໍາມະການຄຸ້ມຄອງຫລັກຊັບ 4 ສະບັບ, ເຊິ່ງມີລະບຽບວ່າດ້ວຍການຄຸ້ມຄອງການຊື້-ຂາຍຮຸ້ນຂອງຜູ້ລົງທຶນຕ່າງປະເທດທີ່ເຄື່ອນໄຫວຊື້-ຂາຍຢູ່ ສປປ ລາວ(ສະບັບປັບປຸງ), ລະບຽບວ່າດ້ວຍການຮັບຮອງບໍລິສັດຈັດລໍາດັບຄວາມໜ້າເຊື່ອຖືຕ່າງປະເທດ (ໃໝ່), ລະບຽບວ່າດ້ວຍການຮັບຮອງບໍລິສັດປະເມີນມູນຄ່າຊັບສິນຕ່າງປະເທດ(ໃໝ່) ແລະ ລະບຽບວ່າດ້ວຍການເປີດບັນຊີຕາງໜ້າຊື້-ຂາຍຫລັກຊັບໃນຕະຫລາດຫລັກຊັບຢູ່ ສປປ ລາວ(ໃໝ່).

ໃນໂອກາດນີ້, ທ່ານຮອງນາຍົກລັດຖະມົນຕີ ດຣ ບຸນປອນ ບຸດຕະນະວົງ, ໄດ້ຕີລາຄາສູງຕໍ່ຜົການເຄື່ອນໄຫວວຽກງານຄຸ້ມຄອງຫລັກຊັບໃນໄລຍະຜ່ານມາ, ເຊິ່ງເຮັດໃຫ້ວຽກງານດັ່ງກ່າວມີຄວາມສະຫງົບ ແລະ ນັບມື້ໜັກແໜ້ນຂຶ້ນແລະ ນັບແຕ່ຕົ້ນປີ 2015 ຜ່ານມາສໍານັກງານຄະນະກໍາມະການຄຸ້ມຄອງຫລັກຊັບ ແລະ ພາກສ່ວນກ່ຽວຂ້ອງໄດ້ເອົາໃຈໃສ່ຄຸ້ມຄອງການເຄື່ອນໄຫວຜູ້ມີສ່ວນຮ່ວມໃນຕະຫລາດຫລັກຊັບດ້ວຍຄວາມຮັບຜິດຊອບສູງ, ນອກນັ້ນໄດ້ສຸມໃສ່ປັບປຸງ ແລະ ສ້າງບັນດາລະບຽບການຕ່າງໆເພື່ອເປັນບ່ອນອີງໃນການຄຸ້ມຄອງ ແລະ ພັດທະນາວຽກງານຫລັກຊັບໃຫ້ຮັດກຸມ ແລະ ທັນສະພາບການບົນພື້ນຖານກົດໝາຍວ່າດ້ວຍຫລັກຊັບຄຽງຄູ່ກັບການກະກຽມຄວາມພ້ອມຂອງບໍລິສັດທີ່ອອກຈໍາໜ່າຍຮຸ້ນ ແລະ ຈົດທະບຽນໃນຕະຫລາດຫລັກຊັບລາວແນໃສ່ພັດທະນາຕະຫລາດທຶນຂອງ ສປປ ລາວ ໃຫ້ມີຄວາມໜັກແໜ້ນ ແລະ ເຂັ້ມແຂງຍິ່ງຂຶ້ນ.