ສຸວັນນີຈະຂະຫຍາຍສາຂາຕື່ມ 3 ແຫ່ງຫລັງລະດົມທຶນຈາກມະຫາຊົນ

ບໍລິສັດ ສຸວັນນີ ໂຮມເຊັນເຕີ ມະຫາຊົນ ມີແຜນຈະຂະຫຍາຍສາຂາຈໍາໜ່າຍວັດສະດຸກໍ່ສ້າງ ແລະ ຜະລິດຕະພັນຕົບແຕ່ງເຮືອນແບບຄົບວົງຈອນຕື່ມອີກ 3 ແຫ່ງ, ຫລັງຈາກໄດ້ຈົດທະບຽນໃນຕະຫລາດຫລັກຊັບລາວ ແລະ ສາມາດລະດົມທຶນຈາກມວນຊົນມີຜົນສໍາເລັດ.

ທ່ານ ວັດດານາ ສຸຂະບັນດິດ ຮອງປະທານສະມາຊິກສະພາບໍລິຫານ, ຜູ້ອໍານວຍການໃຫຍ່ບໍລິສັດ ສຸວັນນີ ໂຮມເຊັນເຕີ ມະຫາຊົນ ກ່າວໃນພິທີຖະແຫລງຂ່າວກ່ຽວກັບການວາງແຜນທຸລະກິດ 5 ປີຂອງບໍລິສັດເມື່ອທ້າຍອາທິດຜ່ານມາຢູ່ນະຄອນຫລວງວຽງຈັນວ່າ: ໃນຕໍ່ໜ້ານີ້ບໍລິສັດພວກເຮົາມີແຜນຈະຂະຫຍາຍສາຂາຕື່ມອີກ 3 ແຫ່ງຄື: ສາຂາບ້ານໂຊກໃຫຍ່ ເມືອງໄຊທານີ ນະຄອນຫລວງວຽງຈັນ,ສາຂາບ້ານນໍ້າງຽບເມືອງປາກຊັນ ແຂວງບໍລິຄໍາໄຊ ແລະ ສາຂາບ້ານກາງ ເມືອງປາກເຊ ແຂວງຈໍາປາສັກ ຊຶ່ງຈະໃຫ້ສໍາເລັດໃນປີ 2017 ແລະ ມີມູນຄ່າການລົງທຶນທັງໝົດ 210 ຕື້ກີບ ໃນນັ້ນບໍ່ຕໍ່າກວ່າ 40 ຕື້ກີບ ແມ່ນເງິນທີ່ໄດ້ໃນການຂາຍຮຸ້ນສາມັນເພີ່ມທຶນໃຫ້ແກ່ປະຊາຊົນເປັນຄັ້ງທໍາອິດ(IPO)ຈຳນວນ 25 ລ້ານຮຸ້ນມູນຄ່າທີ່ກຳນົດໄວ້ (Par) ຮຸ້ນລະ 2.000 ກີບ, ປັດຈຸບັນບໍລິສັດ ມີທຶນຈົດທະບຽນຊໍາລະແລ້ວຈຳນວນ 280 ຕື້ກີບ, ມູນຄ່າທີ່ກຳນົດໄວ້ (Par) ຮຸ້ນລະ 2.000 ກີບ ແລະພາຍຫລັງເຂົ້າຈົດທະບຽນໃນຕະຫລາດຫລັກຊັບລາວ (LSX) ບໍລິສັດຈະມີທຶນຈົດທະບຽນຊຳລະແລ້ວເປັນຈໍານວນ 330 ຕື້ກີບ.

ທ່ານ ວັດດານາ ສຸຂະບັນດິດ ກ່າວວ່າ: ໃນຈໍານວນ 25 ລ້ານຮຸ້ນນີ້ແມ່ນກຸ່ມຄອບຄົວສຸຂະບັນດິດ ກວມເອົາປະມານ 51%, ບໍລິສັດໂກລໂບລຮາວກວມ 40% ແລະ ສ່ວນທີ່ເຫລືອຈະແມ່ນນັກລົງທຶນແລະ ກຸ່ມຜູ້ຖືຮຸ້ນອື່ນໆ.

ສຸວັນນີ ໂຮມເຊັນ ເຕີມະຫາຊົນ ດໍາເນີນທຸລະກິດຈຳໜ່າຍສິນຄ້າ ແລະ ບໍລິການທາງດ້ານວັດສະດຸກໍ່ສ້າງຕົກແຕ່ງເຮືອນແລະ ອາຄານແບບຄົບວົງຈອນ, ມີສູນວາງສະແດງສິນຄ້າຂະໜາດໃຫຍ່ ແລະ ທັນສະໄໝເປັນອັນດັບໜຶ່ງໃນລາວ. ປັດຈຸບັນບໍລິສັດມີສາຂາ 4 ແຫ່ງຄື: ສາຂາໂພນຕ້ອງ, ທົ່ງຂັນຄຳ, ທົ່ງຕູມ, ເມືອງຈັນທະບູລີ ແລະ ສາຂາບ້ານສີໄຄ ເມືອງສີໂຄດຕະບອງ ແລະ ການຕັ້ງເປົ້າຈະຂະຫຍາຍສາຂາເພີ່ມຂຶ້ນອີກ 3 ແຫ່ງ, ກໍເພື່ອຮອງຮັບການເປີດປະຊາຄົມເສດຖະກິດອາຊຽນໃນທ້າຍປີ 2015 ນີ້ເຊິ່ງພວກເຮົາລິງເຫັນວ່າ: ການລົງທຶນທັງພາກອຸດສາຫະກຳ ແລະ ຄົວເຮືອນຈະເພີ່ມຂຶ້ນຢ່າງວ່ອງໄວ ແລະ ຈະເຮັດໃຫ້ເສດຖະກິດຂອງລາວມີການເຕີບໃຫຍ່ເຂັ້ມແຂງເທື່ອລະກ້າວ ແລະ ເຊື່ອວ່າບໍລິສັດມີໂອກາດທີ່ຈະຂະຫຍາຍໂຕໄດ້ຢ່າງກ້າວກະໂດດເພາະວ່າເມື່ອເຂົ້າຈົດທະບຽນໃນຕະຫລາດຫລັກຊັບລາວຈະເຮັດໃຫ້ບໍລິສັດມີຊື່ສຽງຫລາຍຂຶ້ນ, ເປັນທີ່ຍອມຮັບໃນລະດັບມາດຕະຖານສາກົນ ແລະ ເຮັດໃຫ້ມີຖານແຫລ່ງທຶນທີ່ແຂງແກ່ນ,ເຮັດໃຫ້ສາມາດຂະຫຍາຍສາຂາເພີ່ມຜະລິດຕະພັນ, ເພີ່ມກຸ່ມລູກຄ້າ ແລະ ເພີ່ມຊ່ອງທາງການຈຳໜ່າຍໄດ້ຫລາຍຂຶ້ນແລະ ໝັ້ນໃຈວ່າຈະສ້າງຜົນຕອບແທນກັບຄືນສູ່ຜູ້ຖືຮຸ້ນ ແລະ ນັກລົງທຶນໄດ້ຢ່າງເປັນທີ່ໜ້າເພິ່ງພໍໃຈ.