ລາວຫາລືການພັດທະນາອຸດສະຫະກໍາປຸງແຕ່ງໄມ້

ກົມອຸດສະຫະກໍາ ແລະ ການຄ້າ, ກະຊວງອຸດສະຫະກໍາ ແລະ ການຄ້າ, ໄດ້ຈັດກອງປະຊຸມປຶກສາຫາລືກ່ຽວກັບການພັດທະນາຂະແໜງປຸງແຕ່ງໄມ້ໃນລາວ ແລະ ປັບປຸງການຈັດຕັ້ງໃນພາກເອກະຊົນເພື່ອຮັບປະກັນການເພີ່ມມູນຄ່າໃຫ້ແກ່ຊັບພະຍາກອນປ່າໄມ້ຂອງປະເທດ ແລະ ທັງໃຫ້ສອດຄ່ອງກັບແຜນງານຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ລະຫວ່າງລາວກັບສະຫະພາບເອີຣົບ(EU).

ທ່ານຫົວໜ້າກົມດັ່ງກ່າວໃຫ້ຮູ້ວ່າ: ການສົ່ງເສີມອຸດສະຫະກໍາປຸງແຕ່ງໄມ້ແມ່ນຍຸດທະສາດສໍາຄັນດ້ານເສດຖະກິດຂອງລັດຖະບານລາວເພື່ອຮັບປະກັນການເພີ່ມມູນຄ່າໃຫ້ແກ່ຊັບພະຍາກອນປ່າໄມ້ລວມເຖິງການສ້າງຄວາມເຂັ້ມແຂງໃນການແຂ່ງຂັນດ້ານຄຸນນະພາບຂອງຂະແໜງປຸງແຕ່ງໄມ້ໃນລາວອີກດ້ວຍ, ການສົ່ງເສີມໃນຮູບແບບນີ້ປຽບເໝືອນໃບເບີກທາງເພື່ອໃຫ້ສາມາດເຂົ້າເຖິງຕະຫລາດສົ່ງອອກໃໝ່ໃນກຸ່ມປະເທດໃນອາຊຽນ, ເອີຣົບ, ສະຫະລັດອາເມລິກາ, ຍີ່ປຸ່ນ, ຈີນ ແລະ ປະເທດອື່ນໆ. ສະນັ້ນ ເພື່ອບັນລຸເປົ້າໝາຍດັ່ງກ່າວການສະໜອງວັດຖຸດິບຕ້ອງໄດ້ຮັບການເອົາໃຈໃສ່, ພະນັກງານກໍາມະກອນ, ນາຍຊ່າງໃນໂຮງງານປຸ່ງແຕ່ງໄມ້ຕ້ອງໄດ້ຮັບການຍົກລະດັບ,ສ ະມາຄົມໃນຂະແໜງການຕ້ອງໄດ້ຮັບການສົ່ງເສີມ

ແລະ ບັນດາບໍລິສັດຕ້ອງສາມາດເຂົ້າເຖິງຂໍ້ມູນທາງດ້ານການຕະຫລາດ ແລະ ສີນຄ້າໄດ້ເປັນຢ່າງດີ. ຂະນະດຽວກັນທ່ານ ຮາຍໂກະ ວໍເນີ ທີ່ປຶກສາອາວຸໂສໂຄງການ GIZ ທີ່ໃຫ້ການສະໜັບສະໜູນລາວຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ລະຫວ່າງລາວກັບສະຫະພາບເອີຣົບ(Pro FLEGT) ກ່າວວ່າ: ການພັດທະນາ ແລະ ປັບປຸງການຈັດຕັ້ງຂະແໜງປຸງແຕ່ງໄມ້ຢ່າງຖືກຫລັກການມັນຈະສະໜອງຜົນປະໂຫຍດຫລາຍຢ່າງເຊັ່ນ: ການເພີ່ມມູນຄ່າຈາກການປຸງແຕ່ງໄມ້ສໍາເລັດຮູບ, ເພີ່ມປະສິດທິພາບຂອງບໍລິສັດ, ເພີ່ມຜົນຜະລິດ ແລະ ຄວາມອາດສາມາດໃນການແຂ່ງຂັນກັບສາກົນ. ຂະນະດຽວກັນກໍເປັນການປູກຈິດສໍານຶກໃຫ້ຮູ້ກ່ຽວກັບໄມ້ ແລະ ການນໍາໃຊ້ໄມ້ຖືກກົດໝາຍ, ເພີ່ມໂອກາດໃນການສົ່ງອອກ ແລະ ການສ້າງວຽກເຮັດງານທໍາໃຫ້ແກ່ປະຊາຊົນ.

ກົມດັ່ງກ່າວໃຫ້ຮູ້ວ່າ: ລັດຖະບານລາວ, ມີຄວາມພະຍາຍາມເພື່ອສ້າງຄວາມເຂັ້ມແຂງໃນຕະຫລາດສາກົນຂອງບໍລິສັດປຸງແຕ່ງໄມ້ໃນລາວ ແລະ ພາຍໃຕ້ແຜນງານເຈລະຈາ FLEGT ທີ່ລັດຖະບານພວມປະຕິບັດຈະເປັນເງື່ອນ ໄຂທີ່ດີໃຫ້ແກ່ຂະແໜງປ່າໄມ້ຂອງລາວໂດຍຜ່ານຂໍ້ຕົກລົງການຄ້າສອງຝ່າຍ.

ສະຫະພາບເອີຣົບ, ໄດ້ລິເລີ່ມແຜນງານການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ FLEGT ເພື່ອສະກັດກັ້ນການຂຸດຄົ້ນໄມ້ທີ່ຜິດກົດໝາຍໃນທົ່ວໂລກ, ພ້ອມນັ້ນສະຫະພາບເອີຣົບຍັງໄດ້ກະກຽມການເຈລະຈາຂໍ້ຕົກລົງການເຂົ້າເປັນຄູ່ຮ່ວມສັນຍາການຄ້າແບບສະໝັກໃຈ VPA ກັບບັນດາປະເທດຜະລິດໄມ້ເພື່ຫລຸດຜ່ອນການຕັດໄມ້ທີ່ຜິດກົດໝາຍແລະສົ່ງເສີມການຄ້າໄມ້ທີ່ຖືກກົດໝາຍ.

ສປປ ລາວ, ແມ່ນໜຶ່ງໃນບັນດາປະເທດທີ່ລິເລີ່ມເຈລະຈາຂໍ້ຕົກລົງການເປັນຄູ່ຮ່ວມສັນຍາດັ່ງກ່າວກັບສະຫະພາບເອີຣົບ, ໂດຍໄດ້ຮັບການຊ່ວຍເຫລືອຈາກໂຄງການ GIZ ເພືອສະໜັບສະໜູນແຜນງານຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ລະຫວ່າງລາວກັບສະຫະພາບເອີຣົບ.