laophatthananewspaper: ຊີວິດການເປັນຢູ່ປະຊາຊົນຜົ້ງສາລີ ໄດ້ຮັບການປັບປຸງດີຂຶ້ນ ໂດຍການສົ່ງເສີມຈາກອີຢູ

ສະຫະພາບເອີຣົບ (ອີຢູ) ດີໃຈທີ່ເຫັນຊີວິດການເປັນຢູ່ຂອງປະຊາຊົນຢູ່ເມືອງຂວາ ແຂວງຜົ້ງສາລີ ໄດ້ຮັບການປັບປຸງດີຂຶ້ນກວ່າເກົ່າ ຈາກການຊ່ວຍເຫລືອຂອງອີຢູ ໃນການຫັນເອົາການຜະລິດກະສິກໍາທີ່ມີຄວາມບົ່ມຊ້ອນຕິດພັນກັບການແກ້ໄຂຄວາມທຸກຍາກເປັນຈຸມສຸມ ເພື່ອບັນລຸເປົ້າໝາຍສະຫັດສະວັດແຫ່ງການພັດທະນາ ແລະ ຫລຸດພົ້ນອອກຈາກປະເທດດ້ອຍພັດທະນາໃນຕໍ່ໜ້າ, ໂດຍສະເພາະແມ່ນບັນດາຄູ່ຮ່ວມພັດທະນາເອີຣົບ ເຊັ່ນ: ຝຣັ່ງ, ເຢັຍລະມັນ, ລຸກຊຳບວກ ແລະ ສະວິດເຊີແລນໄດ້ສະໜອງການຊ່ວຍເຫລືອດ້ານການພັດທະນາທີ່ສຳຄັນໃຫ້ແກ່ປະຊາຊົນເຂດຫ່າງໄກສອກຫລີກ, ຢູ່ບັນດາເມືອງທີ່ທຸກຍາກໃນແຂວງຜົ້ງສາລີ ແລະ ບັນດາແຂວງພາກເໜືອອື່ນໆ. ໃນອາທິດຜ່ານມາ, ທ່ານ ມີແຊນ ໂກແຟງ ອຸປະທູດສະ ຫະພາບເອີຣົບ ແລະ ທ່ານນາງ ໂກຣດີນ ເລີດູ ເອກອັກຄະລັດຖະທູດຝຣັ່ງ ປະຈຳລາວ ພ້ອມດ້ວຍ

ຄະນະໄດ້ລົງເຄື່ອນໄຫວຢ້ຽມຢາມໂຄງການພັດທະນາ ທີ່ໄດ້ຮັບທຶນຊ່ວຍເຫລືອຈາກສະຫະພາບເອີຣົບ, ຝຣັ່ງ ແລະ ບັນດາຄູ່ຮ່ວມພັດທະນາຂອງເອີຣົບ ຢູ່ເມືອງຂວາ, ເມືອງໃໝ່ ແລະ ເມືອງສຳພັນ ຂອງແຂວງຜົ້ງສາລີ, ເພື່ອຕີລາຄາການຈັດຕັ້ງປະຕິບັດ ແລະ ໝາກຜົນຂອງໂຄງການໂດຍພົບວ່າ: ຊີວິດການເປັນຂອງປະຊາຊົນໃນເມືອງດັ່ງກ່າວ, ໄດ້ຮັບການປັບປຸງດີຂຶ້ນກວ່າເກົ່າ ຖ້າສົມທຽບກັບຜ່ານມາ, ເຊິ່ງປັດຈຸບັນ ປະຊາຊົນສ່ວນໃຫຍ່ໄດ້ຢຸດຕິການຖາງປ່າເຮັດໄຮ່ແບບເລື່ອນລອຍ ແລະ ຢຸດຕິການປູກຢາງພາລາ ມາປູກພືດເປັນສິນຄ້າທົດແທນທີ່ມີຕະຫລາດຮອງຮັບ ເຊັ່ນ: ໝາກແໜ່ງ, ກາເຟ, ລ້ຽງສັດ ແລະ ອື່ນໆ ເພື່ອສ້າງລາຍຮັບ ແລະ ສ້າງຄວາມເຂັ້ມແຂງໃຫ້ແກ່ຄອບຄົວ.ໃນອະດີດແຂວງຜົ້ງສາລີແມ່ນໜຶ່ງໃນບັນດາແຂວງທີ່ທຸກຍາກທີ່ສຸດໃນສປປ ລາວ ເຊິ່ງມີອັດຕາເດັກອາຍຸຕໍ່າກ່ວາ 5 ປີ ເປັນເດັກເຕັ້ຍສູງເຖິງ 61%, 62% ຂອງຈຳນວນປະຊາກອນບໍ່ມີວິດຖ່າຍ, 65% ຈຳນວນບ້ານທັງໝົດທຸກຍາກ ແລະ ມີ 35% ຂອງຈຳນວນບ້ານ ຕັ້ງຢູ່ຫ່າງຈາກຕາໜ່າງສາທາລະນະສຸກ.

ດ້ວຍເຫດນັ້ນ, ສະຫະພາບເອີຣົບຈຶ່ງໄດ້ສະໜອງການຊ່ວຍເຫລືອດ້ານການພັດທະນາຈຳນວນຫລາຍໃຫ້ແຂວງຜົ້ງສາລີ, ເພື່ອຊ່ວຍຫລຸດຜ່ອນຄວາມທຸກຍາກ ຂອງປະຊາຊົນບັນດາເຜົ່າ ທີ່ຢູ່ເຂດຫ່າງໄກສອກຫລີກ ແລະ ທຸກຍາກຕະຫລອດໄລຍະຫລາຍກ່ວາໜຶ່ງທົດສະວັດ. ອີຢູ ໄດ້ສະໜອງທຶນຫລາຍກ່ວາ 6 ລ້ານເອີໂຣ ເຂົ້າໃນໂຄງການຄໍ້າປະກັນສະບຽງອາຫານ ແລະ ແຜນງານພັດທະນາແມ່ ຍິງຊົນເຜົ່າເຂດຫ່າງໄກສອກຫລີກ ຜ່ານອົງການແຄສາກົນແຕ່ປີ 2006 ເປັນຕົ້ນມາ, ເພື່ອຊ່ວຍປັບປຸງຄຸນນະພາບຊີວິດທີ່ເທົ່າທຽມ ໃຫ້ແມ່ຍິງຊົນເຜົ່າໃນເມືອງຂວາ, ເມືອງໄໝ່ ແລະ ເມືອງສຳພັນ ຮ່ວມທັງເມືອງຍອດອູ, ທີ່ມີເນື້ອທີ່ປູກຝັງຈຳກັດ, ມີອັດຕາການຂາດອາຫານ ແລະ ອື່ນໆ ຄາດວ່າບັນດາປະຊາຊົນພາຍໃນ 62 ບ້ານ ຈະໄດ້ຮັບຜົນປະໂຫຍດຈາກກິດຈະກຳຕ່າງໆ ເພື່ອສົ່ງເສີມໂອ ກາດສ້າງລາຍຮັບໃຫ້ແມ່ຍິງ, ສ້າງຄວາມສາມາດໃນການປັບຕົວ ກັບສະພາບການປ່ຽນແປງດິນຟ້າອາກາດ, ຍົກສູງບົດບາດຍິງ-ຊາຍ ໃນການສ້າງເສດຖະກິດ, ປັບປຸງຄວາມໝັ້ນຄົງດ້ານສະບຽງອາ ຫານ ແລະ ໂພຊະນາການ, ສົ່ງເສີມສຸຂະພາບແມ່ ແລະ ເດັກ ແລະ ສຸຂະອະນາໄມ, ຫລຸດຜ່ອນການໃຊ້ຄວາມຮຸນແຮງກັບແມ່ຍິງ ແລະ ສ້າງຄວາມສາມາດໃຫ້ກັບພະນັກງານຂອງເມືອງ ເພື່ອຮັບປະ ກັນການສະໜອງການເຂົ້າເຖິງບໍລິການພື້ນຖານຂອງແມ່ຍິງຊົນເຜົ່າ.

ທ່ານ ອຸປະທູດ ອີຢູ ກ່າວໃນໄລຍະຢ້ຽມຢາມບ້ານແສນລາດວ່າ: ‘’ຂ້າພະເຈົ້າປະທັບໃຈຫລາຍທີ່ເຫັນວ່າປະຊາຊົນບັນດາເຜົ່າ ທີ່ອາໄສຢູ່ເຂດຫ່າງໄກສອກຫລີກໃນເຂດນີ້ ສາມາດຫລຸດພົ້ນອອກຈາກຄວາມທຸກຍາກໄດ້ ແລະ ສະພາບຊີວິດການເປັນຢູ່ຂອງເຂົາເຈົ້າ ໄດ້ຮັບການພັດທະນາດີຂຶ້ນກ່ວາເກົ່າ. ນອກຈາກນີ້ ແຂວງຜົ້ງສາລີ ຍັງໄດ້ຮັບຜົນປະໂຫຍດຈາກແຜນງານພັດທະນາເນີນສູງພາກເໜືອ ທີ່ມີມູນຄ່່າທັງໝົດ 19.6 ລ້ານເອີໂຣ ໃນນັ້ນ 50% ແມ່ນສະໜອງໂດຍສະຫະພາບເອີຣົບ. ແຜນງານດັ່ງກ່າວ, ໄດ້ຈັດຕັ້ງປະຕິບັດແຕ່ປີ 2012 ເຖິງປີ 2016 ມີເປົ້າໝາຍ ຫລຸດຜ່ອນຄວາມທຸກຍາກ ແລະ ບັນລຸເປົ້າໝາຍການພັດທະນາທີ່ຍືນຍົງ ໃນເຂດເນີນສູງແນໃສ່ຮັບປະກັນ ແລະ ປັບປຸງຊີວິດການເປັນຢູ່ປະຊາຊົນຜູ້ທຸກຍາກ ໃນ 230 ບ້ານ ຂອງ 9 ຕົວເມືອງ ແຂວງ ຜົ້ງສາລີ, ຫົວພັນ ແລະ ຫລວງພະບາງ ໂດຍເນັ້ນໃສ່ຊົມຊົນເປັນຫລັກ ໃນການຄຸ້ມຄອງເນື້ອທີ່ການຜະລິດແບບຍືນຍົງ ແລະ ການຜະລິດກະສິກຳ.