ວັນທີ 26
ພຶດສະພານີ້ ທ່ານນາງ ຄຳເພົາ ເອີນທະວັນ, ຮອງລັດຖະມົນຕີ ກະຊວງການຕ່າງປະເທດ
ໄດ້ນຳພາຄະນະຜູ້ແທນ ຈາກບັນດາກະຊວງຕ່າງໆ ຂອງ ສປປ ລາວ ໂດຍປະກອບມີ ກະຊວງໂຍທາທິການ ແລະ
ຂົນສົ່ງ, ຄະນະກຳມະການແຫ່ງຊາດລາວ ເພື່ອຄຸ້ມຄອງເຂດເສດຖະກິດພິເສດ ແລະ
ເຂດເສດຖະກິດສະເພາະ, ແຂວງ ຫລວງພະບາງ ແລະ ກົງສຸນໃຫຍ່ລາວ ທີ່ ໜານໜິງ
ເຂົ້າຮ່ວມກອງປະຊຸມເວທີປຶກສາຫາລືການຮ່ວມມືເສດຖະກິດ ອ່າວ ພານ-ເປີຍປູ ຄັ້ງທີ 9 ທີ່
ແຂວງ ກວາງຊີ, ນະຄອນ ໜານໜິງ, ສປ ຈີນ.
ກອງປະຊຸມໃນຄັ້ງນີ້
ມີຜູ້ເຂົ້າຮ່ວມຈາກການນຳຂັ້ນສູງຂອງ ແຂວງ ກວາງຊີ, ຄະນະປະຈຳພັກແຂວງ, ສະມາຊິກອາຊຽນ,
ອົງການຈັດຕັ້ງສາກົນ ແລະ ພາກທຸລະກິດຂອງຈີນ ເຂົ້າຮ່ວມຫລາຍກ່ວາ
400 ຄົນ.
ກອງປະຊຸມຄັ້ງນີ້ ແມ່ນເພື່ອແນໃສ່ປຶກສາຫາລື ຊອກຫາຊ່ອງທາງສົ່ງເສີມການຮ່ວມມື ແລະ
ພັດທະນາ ອາວ ພານ-ເປີຍປູ ຕາມແລວເສັ້ນທາງສາຍໄໝ ພາຍໃຕ້ຫົວຂໍ້ “Joining Hands in Pan-beibu Gulf Cooperation and building the Belt and
Road together”. ການຮ່ວມມືເສດຖະກິດ ອ່າວ ພານ-ເປີຍປູ ແມ່ນການຮ່ວມມື
ລະ ດັບພາກພື້ນ ອາຊຽນ-ຈີນ ໂດຍມີເປົ້າໝາຍ ໃນການສ້າງຄວາມເຂັ້ມແຂງ
ຕາມເສັ້ນທາງການຮ່ວມມືເສດຖະກິດທາງທະເລ ແລະ ເສັ້ນທາງເຊື່ອມຕໍ່ ອາຊຽນ-ຈີນ.
ການເຂົ້າຮ່ວມກອງປະຊຸມໃນຄັ້ງນີ້,
ທ່ານຫົວໜ້າຄະນະຜູ້ແທນລາວ ໄດ້ຂຶ້ນກ່າວມີຄຳເຫັນຕໍ່ກອງປະຊຸມໃນຖານະປະທານອາຊຽນ ປີ 2016
ໂດຍເນັ້ນໃສ່ການແລກປ່ຽຄຳຄິດຄໍາເຫັນ ໃນການຜັນຂະຫຍາຍບັນດາບຸລິ ມະສິດ
ນະໂຍບາຍການພັດທະນາ ການເຊື່ອມໂຍງ ຂອງ ສປປ ລາວ ແລະ ນະໂຍບາຍຫັນປະເທດ ທີ່ບໍ່ມີທາງອອກສູ່ທະເລ
ໃຫ້ກາຍເປັນປະເທດເຊື່ອມຈອດທາງບົກ ກັບບັນດາປະເທດອ້ອມຂ້າງ ແລະ ບັນດາປະເທດໃນພາກພື້ນ
ແລະ ສາກົນ.
ໃນໂອກາດດຽວກັນ,
ທ່ານຫົວໜ້າຄະນະຜູ້ແທນ ແລະ ຄະນະຂອງສປປ ລາວ ໄດ້ຮ່ວມກັບບັນດາການນຳຂອງອາຊຽນ
ຍັງໄດ້ເຂົ້າຢ້ຽມຂ່ຳນັບການນຳຂັ້ນສູງ ຂອງ ແຂວງ ກວາງຊີ ສປ ຈີນ.
ກອງປະຊຸມການຮ່ວມມືດ້ານເສດຖະກິດ
ອ່າວ ພານ-ເປີຍປູ ແມ່ນເວທີກອງປະຊຸມສາກົນ ແນໃສ່ການສ້າງຂອບການຮ່ວມມືອາຊຽນ-ຈີນ
ຊຶ່ງໄດ້ຈັດຂຶ້ນເລີ່ມແຕ່ ປີ 2006 ເຊິ່ງມາເຖິງປະຈຸບັນ ໄດ້ຈັດຂຶ້ນແລ້ວ 8 ຄັ້ງ.
ການຮ່ວມມືເສດຖະກິດ ອ່າວ ພານ-ເປີຍປູ ແລະ ແຜນວຽກສຳລັບການຮ່ວມມືດັ່ງກ່າວ
ແມ່ນໄດ້ຮັບການເຫັນດີ ແລະ ສະໜັບສະໜູນຈາກລັດຖະບານ ສປ ຈີນ ແລະ
ໄດ້ຮັບໝາກຜົນເປັນຢ່າງດີຕະຫລອດມາ.
No comments:
Post a Comment