ນັບວ່າເປັນຂ່າວດີສໍາລັບປະຊາຊົນຊາວນະຄອນຫລວງວຽງຈັນ
ກໍຄືຜູ້ປະກອບການທຸລະກິດຂະໜາດນ້ອຍ ແລະ
ກາງທີ່ຕ້ອງການກູ້ຢືມທຶນຮອນເພື່ອມາພັດທະນາການຜະລິດ ແລະ
ປັບປຸງຊີວິດການເປັນຢູ່ຂອງຕົນໃຫ້ດີຂຶ້ນ, ພາຍຫລັງສະຖາບັນການເງິນຈຸລະພາກທີ່ບໍ່ຮັບເງິນຝາກ
ວີແອລວີ (VLV Micro Finance) ຊຶ່ງມີສໍານັກງານຕັ້ງຢູ່ບ້ານໜອງບອນ,
ເມືອງໄຊເສດຖາ, ນະຄອນຫລວງວຽງຈັນ, ໄດ້ເລີ່ມເປີດໃຫ້ບໍລິການກູ້ຢືມເງິນນັບແຕ່ວັນທີ 9 ກຸມພານີ້ເປັນຕົ້ນໄປ.
ທ່ານ ວັນທະກອນ ເດດວົງສາ
ອໍານວຍການສະຖາບັນການເງິນດັ່ງກ່າວ ໃຫ້ຮູ້ວ່າ:
ສະຖາບັນການເງິນພວກເຮົາຈະສະໜອງສີນເຊື່ອຈຸລະພາກທີ່ມີການໄລ່ລຽງອັດຕາດອກເບ້ຍຕາມກົນໄກຕະຫລາດ
ແລະ ສອດຄ່ອງຕາມລະບຽບກົດໝາຍຂອງທະນາຄານແຫ່ງ ສປປ ລາວ, ແນໃສ່ກະຕຸ້ນການພັດທະ
ນາເສດຖະກິດ-ສັງຄົມໃຫ້ມີການເຕີບໃຫຍ່ຂະຫຍາຍຕົວ, ໂດຍເນັ້ນໃຫ້ບໍລິການດ້ານການເງິນແກ່ພະນັກ ງານລັດຖະກອນ, ທະຫານຕໍາຫລວດ, ແມ່ຄ້າຊາວຂາຍ, ຜູ້ປະກອບການຫົວໜ່ວຍການຜະລິດຂະໜາດນ້ອຍ ແລະ ກາງ
ລວມເຖິງປະຊາຊົນທີ່ຕ້ອງການທຶນຮອນໄປນໍາໃຊ້ເຂົ້າໃນການຜະລິດ, ປຸງແຕ່ງ
ແລະ ປັບປຸງຊີວິດການເປັນຢູ່ຂອງຕົນແຕ່ບໍ່ສາມາດເຂົ້າເຖິງແຫລ່ງທຶນຈາກທະນາຄານ.
ທ່ານ ວັນທະກອນ ໃຫ້ຮູ້ວ່າ:
ສະຖາບັນການເງິນແຫ່ງນີ້ມີທຶນຈົດທະບຽນຈໍານວນ 5 ຕື້ກີບ, ພ້ອມທັງໄດ້ຕັ້ງເປົ້າໝາຍໃຫ້ຍອດບໍລິການສີນເຊື່ອບັນລຸຫລາຍກວ່າ
5 ຕື້ກີບໃນປີທໍາອິດ ແລະ ຂະຫຍາຍໜ່ວຍບໍລິ ການໃຫ້ໄດ້ຢ່າງໜ້ອຍ 3 ແຫ່ງໃນໄລຍະ 3 ປີ,
ພ້ອມທັງມີແຜນເພີ່ມທຶນຈົດທະບຽນຫລາຍຂຶ້ນເພື່ອແນໃສຂະຫຍາຍການບໍລິການສີນເຊື່ອໃຫ້ລູກຄ້າໄດ້ຢ່າງກວ້າງຂວາງໃນອານາຄົດ.
ທ່ານ ອາຄົມ ປຣະເສີດ
ຫົວໜ້າກົມຄຸ້ມຄອງສະຖາບັນການເງິນທະນາຄານແຫ່ງ ສ ປປ ລາວ ໃຫ້ຮູ້ວ່າ: ໃນໄລຍະຜ່ານມາ,
ສະຖາບັນການເງິນໄດ້ມີບົດບາດສໍາຄັນໃນການປະກອບສ່ວນພັດທະນາເສດຖະກິດ-ສັງຄົມຂອງຊາດ
ແລະ ໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII ລັດຖະບານໄດ້ກໍານົດວ່າ:
ຕ້ອງສ້າງທຸກເງື່ອນໄຂເພື່ອຂົນຂວາຍທຶນຮອນຈາກສັງຄົມເພື່ອສະໜອງໃຫ້ແກ່ການຊຸກຍູ້ສົ່ງເສີມການຜະລິດເປັນສີນຄ້າ
ແລະ ປັບປຸງຊີວິດການເປັນຢູ່ຂອງປະຊາຊົນບັນດາເຜົ່າໃຫ້ນັບມື້ດີຂຶ້ນ, ແນໃສ່ຫລຸດພົ້ນອອກຈາກຄວາມທຸກຍາກ ແລະ
ນໍາປະເທດຊາດຫລຸດພົ້ນຈາກຄວາມດ້ອຍພັດທະ ນາເທື່ອລະກ້າວ, ຊຶ່ງມາຮອດປັດຈຸບັນທົ່ວປະເທດມີສະຖາບັນການເງິນ
172 ແຫ່ງ ແລະ ມີ 59 ແຫ່ງທີ່ເຄື່ອນໄຫວຮູບແບບບໍ່ຮັບເງິນຝາກ.
ເຂົ້າຮ່ວມພິທີເປີດສະຖາບັນການເງິນດັ່ງກ່າວມີທ່ານລັດຖະມົນຕີກະຊວງແຮງງານ
ແລະ ສະ ຫວັດດີການສັງຄົມ ຄໍາແພງ ໄຊສົມແພງ, ພ້ອມດ້ວຍຜູ້ຕາງໜ້າທະນາຄານແຫ່ງ
ສປປ ລາວເຂົ້າຮ່ວມນໍາດ້ວຍ.
No comments:
Post a Comment