laophatthananewspaper: ຮອງນາຍົກລັດຖະມົນຕີ ສົມສະຫວາດ ເລ່ັງສະຫວັດ ຕ້ອນຮັບປະທານອົງການການບິນພົນລະເຮືອນສາກົນ

ໃນວັນທີ 30 ຕຸລານີ້ຢູ່ຫ້ອງວ່າການລັດຖະບານ, ທ່ານ ສົມສະຫວາດ ເລັ່ງສະຫວັດ ຮອງນາຍົກ ລັດຖະມົນຕີ, ຜູ້ຊີ້ນຳ ວຽກງານເສດຖະກິດ ໄດ້ໃຫ້ ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ໂຣເບີໂຕ ໂກເບ ກອນຊາເລສ (Roberto Kwbeh Gonzalez) ປະທານອົງການການບິນພົນລະເຮືອນສາກົນ ໃນໂອກາດເດີນທາງມາຢ້ຽມຢາມລາວແຕ່ວັນທີ 29 ຕຸລາ-3 ພະຈິກ 2013.

ຮອງນາຍົກລັດຖະ ມົນຕີ ໄດ້ສະແດງຄວາມຊົມເຊີຍຕໍ່ການມາຢ້ຽມຢາມລາວຂອງປະທານອົງການການບິນພົນ ລະ ເຮືອນສາກົນ ໃນຄັ້ງນີ້ ເຊິ່ງເປັນການເສີມຂະຫຍາຍການພົວພັນຮ່ວມມືລະຫວ່າງ ສປປ ລາວ ແລະ ອົງ ການການບິນພົນລະ ເຮືອນສາກົນໃຫ້ດີຂຶ້ນກວ່າເກົ່າ.ພ້ອມນີ້ຮອງ ນາຍົກລັດຖະມົນຕີ ຍັງໄດ້ຊີ້ແຈງກ່ຽວກັບສະພາບເຮືອບິນ ATR 72 ຂອງສາຍການບິນລາວຕົກຢູ່ແຂວງຈຳປາສັກໃນກາງເດືອນຕຸລານີ້ວ່າເປັນເຫດການທີ່ບໍ່ເພິ່ງປາຖະໜາ,ແຕ່ເມື່ອເກີດຂຶ້ນລັດຖະບານ ແລະ ທຸກພາກສ່ວນກ່ຽວຂ້ອງໄດ້ເອົາໃຈໃສ່ຊ່ວຍເຫລືອຢ່າງເຕັມທີ. ສະນັ້ນຮຽກຮ້ອງໃຫ້ອົງການການບິນພົນລະເຮືອນສາກົນຈົ່ງໃຫ້ການຮ່ວມມືສະໜັບສະໜູນເພື່ອພັດທະນາການບິນລາວ ໃຫ້ມີຄວາມປອດໄພສູງ.

ປະທານອົງການ ການບິນພົນລະເຮືອນສາກົນ ໄດ້ສະແດງຄວາມຂອບໃຈ ຕໍ່ຮອງນາຍົກລັດຖະມົນຕີ ທີ່ໃຫ້ການຕ້ອນຮັບຢ່າງອົບອຸ່ນ ແລະ ມີຄຳເຫັນວ່າ:ຜ່ານມາສາຍການລາວ ກໍມີຄວາມປອດໄພດີ ແຕ່ເຫດການທີ່ເກີດຂຶ້ນຢູ່ແຂວງຈຳປາສັກ ເຖິງວ່າທຸກຄົນຈະບໍ່ເພິ່ງປາຖະໜາ ແຕ່ກໍເປັນສິ່ງທີ່ຫລີກບໍ່ໄດ້ ແລະ ກໍເປັນບົດຮຽນສຳຄັນ ທີ່ຈະໄດ້ຊ່ວຍໃຫ້ການບິນມີການພັດທະນາມາດ ຕະຖານຄວາມປອດໄພສູງສຸດ.

ອົງການການບິນພົນລະ ເຮືອນສາກົນ ແມ່ນອົງການພິເສດຂອງອົງການສະຫະປະຊາຊາດ ໄດ້ຮັບການສ້າງຕັ້ງຂຶ້ນເມື່ອປີ 1944, ປັດຈຸບັນ ມີສະມາຊິກທັງ ໝົດ 191 ປະເທດ,ມີສຳນັກງານໃຫຍ່ຕັ້ງຢູ່ເມືອງມົງເຮອານ ປະເທດການາດາ. ອົງການດັ່ງກ່າວ ມີບົດບາດການສົ່ງເສີມຄວາມປອດໄພ ແລະ ພັດທະນາການບິນພົນລະເຮືອນໃນທົ່ວໂລກ,ການ ສ້າງມາດ ຕະຖານ,ຂໍ້ກຳນົດກົດລະບຽບກ່ຽວກັບການຮັກສາ ຄວາມປອດໄພຂອງການບິນໃຫ້ມີປະສິດທິພາບ ແລະ ເປັນປົກກະຕິ ທັງຮັກສາສິ່ງແວດລ້ອມໃນການຂົນສົ່ງທາງອາກາດ. ສຳລັບ ສປປ ລາວ ໄດ້ເຂົ້າເປັນສະມາຊິກ ແລະ ໃຫ້ສັດຕະຍາບັນສົນທິສັນ ຍາ ວ່າດ້ວຍການບິນພົນລະເຮືອນ ສາກົນຫລາຍສະບັບ ແຕ່ປີ 1955- 1971.ຕະຫລອດໄລຍະຜ່ານມາ, ສປປລາວ ໄດ້ເອົາໃຈໃສ່ຍົກລະ ດັບ ແລະ ພັດທະນາຕົນເອງ ເພື່ອບັນລຸມາດຕະຖານຄວາມປອດໄພ ແລະ ການຮັກສາຄວາມປອດໄພ ຂອງອົງ ການການບິນພົນລະ ເຮືອນສາກົນວາງອອກ.ນັບແຕ່ປີ 2002 ເປັນຕົ້ນມາ,ສປປລາວ ໄດ້ເຂົ້າຮ່ວມຫລາຍໂຄງການຄວາມປອດໄພການບິນທັງໃນພາກພື້ນ ອາຊີຕາເວັນອອກສ່ຽງໃຕ້,ພາກ ພື້ນອາຊີ-ປາຊີຟິກ ແລະ ໃນສະຫະ ພາບເອີຣົບ ຊຶ່ງແຕ່ລະໂຄງການ ໄດ້ມີຊ່ຽວຊານຈາກອົງການການ ບິນພົນລະເຮືອນສາກົນ ແລະ ປະເທດອື່ນໆມາຊ່ວຍເຝິກອົບຮົມໃຫ້ວິຊາການຂອງລາວເພື່ອຍົກລະດັບຄວາມອາດສາມາດໃນການຄຸ້ມຄອງມະຫາພາກຕໍ່ຫົວ ໜ່ວຍທຸລະກິດທີ່ດຳເນີນການບໍລິການການບິນໃນລາວ.