ກະຊວງກະສິກຳ ແລະ ປ່າໄມ້ໃຫ້ຮູ້ວ່າ: ການຜະລິດນາແຊງຂອງປະເທດເຮົາໃນປີນີ້.ແມ່ນປະສົບຄວາມຫຍຸ້ງຍາກບໍ່ໜ້ອຍ, ຍ້ອນການປ່ຽນແປງຂອງລະພາບດິນຟ້າອາກາດ,
ໂດຍສະເພາະພາກເໜືອມີອາກາດໜາວແຮງເຮັດໃຫ້ການປັກດຳບໍ່ໄດ້ຕາມຄາດໝາຍ,
ຊຶ່ງໂດຍສະເລ່ຍແລ້ວມາຮອດດຽວນີ້ກະສິກອນທົ່ວປະເທດປັກດຳນາແຊງໄດ້ພຽງ 1 ແສນກວ່າເຮັກຕາ, ເທົ່າກັບ 87 % ຂອງເນື່ອທີ່ແຜນການວາງໄວ້
113.000 ເຮັກຕາ,ເຫັນວ່າຫຼຸດລົງຫຼາຍ ເມື່ອທຽບໃສ່ປີຜ່ານມາ.
ເນື່ອງຈາກສະພາບອາກາດໝາວໄດ້ສົ່ງຜົນກະທົບຕໍ່ການປັກດຳນາແຊງຢູ່ຫຼາຍທ້ອງຖິ່ນຫຼ້າຊ້າ, ຂະນະທີ່ປັດຈຸບັນຂະແໜງກະສິກຳ ແລະ ປ່າໄມ້ກໍໄດ້ສົ່ງພະນັກງານວິຊາການຂອງຕົນລົງຊຸກຍູ້ຊາວກະສິກອນສຸ່ມໃສ່ການຜະລິດກະສິກຳໃຫ້ໄດ້ຮັບຜົນເຊັ່ນ: ການບົວລະບັດຮັກສາ, ການກຽມພ້ອມປ້ອງກັນສັດຕູພືດ,
ໃສ່ຝຸ່ນ, ເສຍຫຍ້າໃຫ້ດີ
ເພື່ອສາມາດຍົກສະມັດຕະພາບການຜະລິດໃຫ້ສູງຂຶ້ນ.
ກະຊວງດັ່ງກ່າວໃຫ້ຮູ້ອີກວ່າ: ໃນໄລຍະນີ້ ຄຽງຄູ່ກັບການປັກດຳເຂົ້ານາແຊງແລ້ວກະສິກອນທ້ອງຖິ່ນຕ່າງໆຍັງໄດ້ສຸ່ມໃສ່ປູກພືດລະດູແລ້ງຢ່າງເປັນຂະບວນຟົດຟື້ນຄື:
ມາຮອດປັດຈຸບັນທົ່ວປະເທດສາມາດປະຕິບັດໄດ້ແລ້ວຫຼາຍກວ່າ
122 ພັນເຮັກຕາ, ທົ່ວກັບ 76 % ຂອງແຜນການ, ສ່ວນພືດທີ່ນິຍົມປູກຫຼາຍແມ່ນສາລີອາຫານສັດ, ສາລີຫວານ, ມັນຕົ້ນ,
ຖົ່ວດິນ ແລະ ເຜືອກມັນຕ່າງໆ, ໂດຍສະເພາະແມ່ນຢູ່ແຂວງພາກເໜືອ ແລະ ພາກກາງ,
ເຖິງຢ່າງໃດກໍຕາມສະພາບອາກາດໜາວຜ່ານມາຍັງສົ່ງຜົນກະທົບຕໍ່ຜົນລະປູກຂອງປະຊາຊົນຢູ່ບັນດາແຂວງພາກເໜືອຫຼາຍກວ່າ 2600 ເຮັກຕາ, ຄາດຄະເນມູນຄ່າຄວາມເສຍຫາຍຈະມີປະ ມານ 8,5 ຕື້ກີບ .
No comments:
Post a Comment