laophatthananewspaper: ກຽມຈັດງານເສັງເພງຕ້ານ ການໃຊ້ຄວາມຮຸນແຮງສຳລັບ ແມ່ຍິງ-ເດັກນ້ອຍ

ໃນຕົ້ນເດືອນພຶດສະພາ 2013 ທີ່ຈະມາເຖິງນ້ີ, ສະຫະພັນແມ່ຍິງ ນະຄອນ ຫຼວງວຽງຈັນ ຈະໄດ້ຈັດງານເສັງເພງ “ ຕ້ານຄວາມຮຸນແຮງສຳລັບແມ່ຍິງ ແລະ ເດັກນ້ອຍ ” ຂຶ້ນຢູ່ຫໍວັດທະນະທຳແຫ່ງຊາດ ໂດຍໄດ້ຮັບການສະໜັບສະໜູນຈາກອົງ ການແຄນາໆຊາດ, ສະມາຄົມພັດທະນາບົດບາດຍິງຊາຍ ແລະ ອົງການແພນນາໆຊາດ.

ໃນຕ້ອນບ່າຍຂອງວັນທີ 1 ມີນາ 2013 ນີ້ ຢູ່ສະມາຄົມນັກຂ່າວ ແຫ່ງ ສປປ ລາວ ຄະນະສະຫະພັນແມ່ຍິງ ນະຄອນຫຼວງວຽງຈັນ ໄດ້ຈັດງານຖະແຫຼງຂ່າວກ່ຽວກັບການກະກຽມຈັດງານດັ່ງກ່າວໂດຍມີທ່ານ ນາງ ລຳພອຍ ສີອັກຄະຈັນ, ປະທານສະຫະພັນແມ່ຍິງນະຄອນຫຼວງວຽງຈັນ, ທ່ານສົມສະໜຸກມີໄຊ, ຮອງປະທານສະມາຄົມນັກຂ່າວ ແຫ່ງ ສປປ ລາວ, ທ່ານນາງ ສຸກນິດາ ຢົງເຢຍລໍຊົວຕົວລີ, ປະທານສະມາຄົມພັດທະນາບົດ ບາດຍິງ-ຊາຍ, ທ່ານ ອິນປັນ ບໍລິ ຫານ, ຕາງໜ້າໃຫ້ອົງການແຄນາໆຊາດ, ທ່ານ ພິມມະສອນ ທອງ ພະໄທສັກ, ຕາງໜ້າອົງການແພນນາໆຊາດ, ທ່ານນາງ ວັນທະວີ ສຸພານຸວົງ, ຕາງໜ້າໃຫ້ອົງການແຄນາໆຊາດ ແລະ ມີ ບັນດາສື່ມວນຊົນຈາກພາກສ່ວນຕ່າງໆເຂົ້າຮ່ວມຢ່າງຫຼວງຫຼາຍ.

ໃນພິທີທ່ານນາງ ລຳພອຍ ສີອັກຄະຈັນ, ປະທານສະຫະພັນແມ່ຍິງນະຄອນຫຼວງວຽງຈັນ ໄດ້ກ່າວວ່າ: ໃນການຈັດງານໃນຄັ້ງນີ້ ແມ່ນເພື່ອໃຫ້ຂໍ້ມູນກ່ຽວກັບການຕ້ານການໃຊ້ຄວາມຮຸນແຮງສຳລັບແມ່ຍິງໂດຍຜ່ານການປະກວດສຽງເພງ, ເພື່ອໂຄ ສະນາໃຫ້ມວນຊົນໄດ້ຮັບຮູ້ເນື້ອໃນຂອງວຽກງານການຕ້ານຄວາມຮຸນແຮງສຳລັບແມ່ຍິງ, ເພື່ອສົ່ງເສີມໃຫ້ສັງຄົມໄດ້ຫັນມາໃສ່ໃຈ ຕໍ່ບັນຫາການໃຊ້ຄວາມຮຸນແຮງກັບແມ່ຍິງ, ເພື່ອປູກຈິດສຳນຶກຂອງເດັກນ້ອຍ ແລະ ໄວໜຸ່ມ ໃຫ້ຫຼຸດຜ່ອນພຶດຕິກຳການໃຊ້ຄວາມຮຸນແຮງ ແລະ ເພື່ອໂຄສະນາປຸກລະດົມແມ່ເຂົ້າຂະບວນການສ້າງວຽງຈັນເປັນຕົວເມືອງແຫ່ງສຸຂະພາບ ແລະ ສະ ອາດງາມຕາ. ສຳລັບກຸ່ມເປົ້າ ໝາຍທີ່ຈະເຂົ້າຮ່ວມແມ່ນໄວໜຸ່ມໃນໂຮງຮຽນຊັ້ນ ມ.ປາຍ, ໃນສະ ຖາບັນການສຶກສາລະດັບວິຊາ ຊີບ ແລະ ບຸກຄົນທົ່ວໄປໃນສັງ ຄົມ. ສ່ວນເງື່ອນໄຂຜູ້ສະໝັກ ແມ່ນຜູ້ທີ່ມີສັນຊາດລາວ (ບໍ່ຈຳ ກັດເພດ, ອາຍຸ, ອາຊີບ, ລະ ດັບການສຶກສາ) ; ສະໝັກເປັນທີມ ( ທີມ 1 ແຕ່ 1-6 ຄົນ ຈະຮ້ອງ ດ່ຽວ, ຄູ່ ຫຼື ເປັນວົງ) ; ແນວດົນຕີ ບໍ່ຈຳກັດ (ລາວສະ ໄໝ, ລູກທົ່ງບ້ານນາ, ຂັບລຳທ້ອງຖິ່ນສຳຄັນ ທີ່ເນື້ອຫາ); ທີມສະໝັກຕ້ອງ ແຕ່ງເພງຂຶ້ນໃໝ່ ໂດຍເນື້ອຫາ ໃຫ້ສອດຄ່ອງ ກັບການຕໍ່ຕ້ານການໃຊ້ຄວາມຮຸນແຮງສຳລັບແມ່ຍິງ ແລະ ເດັກນ້ອຍ ; ທີມ 1 ສາມາດເລືອກສະໝັກໄດ້ພຽງ ສາຍດຽວເທົ່ານັ້ນ ຊຶ່ງມີ : ສາຍ ນັກຮຽນຊັ້ນ ມ.ປາຍ, ສາຍນັກ ສຶກສາວິຊາຊີບ ແລະ ສາຍບຸກ ຄົນທົ່ວໄປ ; ຕ້ອງສົ່ງເນື້ອເພງພ້ອມສຽງດີໂມ ສຽງຮ້ອງໃສ່ແຜ່ນຊີດີ (ບໍ່ມີສຽງດົນຕີ) ໃຫ້ກຳມະການກ່ອນວັນທີ 22 ມີນາ 2013; ຜົນງານທີ່ໄດ້ຮັບລາງວັນຊະນະເລີດ ອົງການແຄນາໆຊາດມີສິດນຳໃຊ້ເພື່ອໂຄສະນາໃນວຽກງານຕ່າງໆຂອງອົງການໃນອະນາຄົດ; ທີມທີ່ໄດ້ເຂົ້າຮອບຊະນະເລີດມີ ໂອກາດເຂົ້າເປັນສິລະປິນຄ້າຍທີເຄການບັນເທິງ.

ທ່ານນາງ ລຳພອຍ ສີອັກ ຄະຈັນຍັງໃຫ້ຮູ້ອີກວ່າ : ປະເພດ ລາງວັນທີ 1 ຈະໄດ້ຮັບເງິນສົດ 5 ລ້ານກີບ ພ້ອມໃບ ຢັ້ງຢືນ ; ລາງ ວັນທີ 2 ຈະໄດ້ຮັບເງິນສົດ 3 ລ້ານກີບ ພ້ອມໃບຢັ້ງຢືນ ; ລາງວັນທີ 3 ຈະໄດ້ຮັບເງິນສົດ 2 ລ້ານກີບ ພ້ອມໃຍ ຢັ້ງຢືນ ແລະ ລາງວັນຊົມເຊີຍຮອບ ມີ 12 ລາງວັນ, ລາງວັນລະ 300.000 ກີບ ພ້ອມໃບຢັ້ງຢືນ.