laophatthananewspaper: ທະນາຄານແຫ່ງ ສປປ.ລາວ ເຕືອນສັງຄົມໃຫ້ລະວັງເງິນປອມ

ທະນາຄານແຫ່ງ ສປປ ລາວ, ໄດ້ອອກມາເຕືອນໃຫ້ສັງຄົມມີສະຕິລະມັດລະວັງໃນການນຳໃຊ້ເງິນກີບຫລັງຈາກມີກຸ່ມຄົນບໍ່ດີນຳເງິນປອມອອກມາສວຍໃຊ້ໃນສັງຄົມ ຊຶ່ງເຮັດໃຫ້ເກີດຜົນກະທົບທາງເສດຖະກິດ ແລະປະກົດການ ຫຍໍ້ທໍ້ຕາມມາ.

ທ່ານ ພູຂັນ ແສງສຸລິເຍດ ຮອງຫົວໜ້າກົມເງີນຕາ-ຄັງສາງ ທະນາຄານແຫ່ງ ສປປ ລາວ ໄດ້ໃຫ້ສຳພາດຕໍ່ນັກຂ່າວລາວພັດ ທະນາ ໃນວັນທີ 19 ມິຖຸນາ ນີ້ວ່າ: ຈາກພຶດຕິກຳການໃຊ້ຈ່າຍເງີນໃນຫຼາຍປະເທດມັກຈະພົບກັບບັນ ຫາເງີນປອມເຊັ່ນ: ເງີນໂດລາປອມ, ເງີນຢູໂລປອມ ແລະ ສະ ກຸນເງີນອື່ນໆ ອັນໄດ້ສ້າງຄວາມຫຍຸ້ງຍາກໃຫ້ແກ່ການກວດກາແລະສະກັດກັ້ນໃນຫຼາຍປະເທດ ເຊັ່ນດຽວກັບຢູ່ໃນ ລາວ ກໍມີກຸ່ມຄົນບໍ່ດີຈຳນວນໜຶ່ງ ນຳເອົາເງີນ ປອມປະເພດໃບ 50.000 ກີບ, 20.000 ກີບ, 10.000 ກີບ ເຂົ້າມາໃຊ້ຈ່າຍ ແລະ ແລກປ່ຽນ ຊື້-ຂາຍ ເປັນຈຳນວນຫຼາຍສົມຄວນ ຊຶ່ງຜິດຕໍ່ລະບຽບກົດໝາຍ ແລະ ເປັນປະກົດການຫຍໍ້ທໍ້ອັນໜຶ່ງໃນສັງ ຄົມ ທີ່ສ້າງຄວາມເສຍຫາຍແກ່ພື້ນຖານເສດຖະກິດຂອງຊາດ ແລະ ຂອງປະຊາຊົນ, ສະນັ້ນເພື່ອ ຫຼີກເວັ້ນການເສຍຫາຍຊັບສິນຈາກການແລກປ່ຽນຊື້-ຂາຍ ທີ່ບຸກຄົນບໍ່ດີນຳໃຊ້ເງີນປອມດັ່ງ ກ່າວ ທຸກພາກ ສ່ວນ ເສດຖະກິດຮວມທັງພາກລັດ, ເອກະຊົນ ຈົ່ງມີສະຕິເອົາໃຈໃສ່ກວດນັບເງີນສົດສະກຸນເງີນກີບທີ່ລູກຄ້ານຳມາໃຊ້ຈ່າຍ.

ຮອງຫົວໜ້າກົມເງີນຕາ- ຄັງສາງ ທະນາຄານແຫ່ງ ສປປ ລາວ ກ່າວວ່າ: ການປອມແປງ ເງີນຕາແມ່ນເຮັດໄດ້ງ່າຍຄື: ຄົນບໍ່ດີຈະນຳໃຊ້ເຈ້ຍທຳມະດາ ເພື່ອມາພິມເປັນໃບເງິນ ຕ່າງໆ ທີ່ມີຮູບລັກສະນະຄືກັບຕົວເງີນແທ້, ແຕ່ແນວໃດກໍຕາມຖ້າຫາກສັງຄົມມີສະຕິ ແລະ ກວດກາລະອຽດຈະເຫັນໄດ້ວ່າ ເງີນທີ່ປອມແປງ ກັບເງີນແທ້ນັ້ນ ມີຄວາມແຕກຕ່າງກັນຫຼາຍຈຸດເປັນຕົ້ນແມ່ນເຈ້ຍທີ່ໃຊ້ພິມເງີນ ຖ້າຄຸນລັກສະນະຂອງເງີນແທ້ ຈະເປັນເຈ້ຍພິເສດ ເວລາຈັບຈະຮູ້ສຶກຊາ, ນູ້ມມືື, ສ່ວນລັກ ສະນະເງີນປອມ ຈະເປັນເຈ້ຍທຳມະດາເວລາຈັບຈະຮູ້ສຶກໝື່ນ ລຽບຂະນະທີ່ຜ່ານການກວດພົບຂອງເຈົ້າໜ້າທີ່ສ່ວນຫລາຍເງີນ ປອມແມ່ນຈະເປັນເງີນປະເພດໃບ 50.000 ກີບ, 20.000 ກີບ ແລະ 10.000 ກີບ.

ສຳລັບວິທີສັງເກດປະເພດເງີນແທ້ ແລະ ເງີນປອມປະເພດໃບ 50.000 ກີບ ແມ່ນສັງເກດຕົວເລກ 50.000 ກີບ ຢູ່ຂ້າງຂົວສີ ຂາວເວລາພິກໃບເງີນໃສ່ແສງສະຫວ່າງຈະເຫັນຕົວເລກທີ່ຊ່ອງຊອດຫາກັນ ຈະແຈ້ງດີ, ສ່ວນເງີນ ປອມຈະບໍ່ສາມາດຊ່ອງຊອດຫາກັນ, ຈະບໍ່ກົງກັນ ແລະ ບໍ່ຈະແຈ້ງ, ໃຫ້ສັງເກດຕົວເລກ 50.000 ຢູ່ ເທີງບ່າຂອງປະທານໄກສອນ ພົມ ວິຫານ ເວລາຈັບບາຍຈະຮູ້ສຶກນູ້ມມືສະດຸດມື ແລະ ນຸນຂຶ້ນ, ສ່ວນໃບເງິນປອມຈະມື່ນມື ແລະ ບໍ່ສະດຸດ. ປະເພດໃບ 20.000 ກີບ: ໃຫ້ສັງເກດຮູບດອກຈັນຢູ່ເທີງຮູບ ຫໍພະແກ້ວ ເວລາພິກໃບເງີນໃສ່ແສງສະຫວ່າງຈະສາມາດຊ່ອງຊອດຫາກັນຢ່າງກົງກັນ ແລະ ຈະແຈ້ງດີ, ມີຕົວເລກນ້ອຍໆ ເປັນພາ ສາອັງກິດຂຽນຄຳວ່າ BANK OF THE LAO PDR ຢາຍຢູ່ຕາມຈຸດຕ່າງໆຢ່າງລະອຽດ ສ່ວນໃບເງີນປອມຈະບໍ່ສາມາດຊ່ອງເຫັນສັນຍາລັກຮູບດອກຈັນ ແລະ ປະເພດໃບ 10.000 ກີບເງີນແທ້ ຈະມີເສັ້ນປ້ອງກັນສີນ້ຳເງີນ ຝັງເຂົ້າໃນເນື້ອເຈ້ຍ ແລະ ມີຕົວເລກ 10.000 ນ້ອຍໆຝັງຢູ່ເສັ້ນ ປ້ອງກັນສີນ້ຳເງີນ, ຮູບລາຍນ້ຳ ປະທານໄກສອນ ພົມວິຫານ ເຫັນໄດ້ຈະແຈ້ງທັງສອງດ້ານ ເມື່ອຊ່ອງໃສ່ກັບແສງສະຫວ່າງ, ສ່ວນເງີນປອມ ຈະບໍ່ມີລັກສະນະຄືດັ່ງກ່າວ.

ທ່ານ ພູຂັນ ແສງສຸລິເຍດ ຮອງຫົວໜ້າກົມເງີນຕາ-ຄັງສາງ ທະນາຄານແຫ່ງ ສປປ ລາວ ກ່າວວ່າ: ໃນໄລຍະຜ່ານມາເຈົ້າ ໜ້າທີ່ກໍໄດ້ມີການກວດກາ ແລະ ສາມາດຈັບຕົວກຸ່ມຄົນບໍ່ດີທີ່ນຳໃຊ້ເງີນ ປອມໃນສັງຄົມມາດຳເນີນຄະດີໄດ້ຫຼາຍລາຍ ແລະ ສ່ວນໃຫຍ່ກຸ່ມຄົນບໍ່ດີດັ່ງກ່າວຈະສວຍໂອກາດນຳໃຊ້ເງິນປອມອອກມາຊື້-ຂາຍໃນຍາມ ຄ່ຳຄືນ ແລະ ໄລຍະເວລາພໍ່ຄ້າແມ່ຄ້າມີການຊື້-ຂາຍເຄື່ອງດີມີລູກຄ້າເຕັມຮ້ານຮັບເງີນໂດຍບໍ່ມີເວລາສັງເກດ ແລະ ກວດກາ ແລະ ມີການແນບມາກັບເງີນຈຳນວນຫຼາຍ ເພື່ອຫລີກເວັ້ນການກວດກາຊຶ່ງຕ້ອງໄດ້ກວດກາຢ່າງລະອຽດເປັນແຕ່ລະໃບ. ສະນັ້ນ ເຕືອນສັງ ຄົມໃຫ້ມີສະຕິ ແລະ ລະວັງຕໍ່ການນຳໃຊ້ເງີນປອມແປງຂອງກຸ່ມຄົນບໍ່ດີ ເພື່ອບໍ່ໃຫ້ຕົກເປັນເຫຍື່ອ.