ລັດຖະມົນຕີວ່າການກະຊວງການຕ່າງປະເທດ ສຳເລັດການເຂົ້າຮ່ວມກອງປະຊຸມເວທີປຶກສາຫາລືເດັນລີ ຄັ້ງທີ 6 ທີ່ນິວເດັນລີ ປະ​ເທດ​ອິນ​ເດຍ

       ໂດຍຕອບສະໜອງຕາມຄຳເຊີນຂອງທ່ານ ຊາລມານ ເຄີຊິດ, ລັດຖະມົນຕີວ່າ ການກະຊວງການຕ່າງປະເທດ ສ.ອິນ ເດຍ ໃນວັນທີ 6 ມີນານີ້. ທ່ານ ທອງລຸນ ສີສຸລິດ ຮອງນາຍົກລັດ ຖະມົນຕີ, ລັດຖະມົນຕີວ່າການກະຊວງການຕ່າງປະເທດ ແຫ່ງ ສປປ ລາວ ໄດ້ນຳພາຄະນະຜູ້ແທນລາວລາວເດີນທາງໄປເຂົ້າຮ່ວມກອງປະຊຸມ ເວທີປຶກສາຫາລື ເດັນລີ (Delhi Dialogue) ຄັ້ງທີ 6 ທີ່ ນິວເດັນລີ, ສ.ອິນເດຍ ພາຍໃຕ້ຫົວຂໍ້: “ຜັນຂະຫຍາຍວິໄສທັດ ອາຊຽນ-ອິນເດຍ ໃຫ້ປາກົດຜົນເປັນຈິງ ເພື່ອການ ເປັນຄູ່ຮ່ວມ ແລະ ຄວາມວັດທະນາຖາວອນ”.

       ໃນພິທີເປີດກອງປະຊຸມ, ທ່ານ ຮອງນາຍົກ ທອງລຸນ ສີສຸລິດ ກໍໄດ້ຮັບກຽດຂຶ້ນກ່າວບົດປາໄສໂດຍທ່ານໄດ້ເນັ້ນບາງ
ຈຸດວ່າ: ຂ້າພະເຈົ້າຂໍເລ່ີມຕົ້ນດ້ວຍການເວົ້າເຖິງສະພາບການກ່ຽວກັບພູມສາດການເມືອງ ແລະ ເສດຖະກິດຂອງພາກພື້ນ ແລະ
ຂອງໂລກທີ່ມີລັກສະນະສັບສົນ ແລະ ປ່ຽນແປງຢູ່ຕະຫລອດເວລາ. ຢູ່ຫລາຍຂົງເຂດທົ່ວໂລກຍັງມີບັນຫາຂໍ້ພິພາດ ແລະ ຂໍ້ຂັດ

ແຍ່ງທີ່ຍັງບໍ່ສາມາດແກ້ໄຂໄດ້ ເຊິ່ງເປັນອຸປະສັກຕໍ່ສັນຕິພາບ, ສະຖຽນລະພາບ ແລະ ຄວາມວັດທະນາຖາວອນໃນພາກພື້ນ ເຫລົ່ານັ້ນ ແລະ ໃນໂລກໂດຍລວມ. ເຖິງແນວໃດກໍຕາມ, ໃນເວລາດຽວກັນກໍສັງເກດເຫັນວ່າການຮ່ວມມືທີ່ເພ່ີມທະວີຂຶ້ນ ລະຫວ່າງບັນດາປະເທດຕ່າງໆໄດ້ປົກປັກຮັກສາ ແລະ ສືບຕໍ່ສົ່ງເສີມສັນຕິພາບ, ສະຖຽນລະພາບ ແລະ ການພັດທະນາ, ຕາມ ຄວາມຄິດເຫັນຂອງຂ້າພະເຈົ້າ, ທຸກໆປະເທດຄວນຈະໃຊ້ທຸກຄວາມພະຍາຍາມເພື່ອສືບຕໍ່ສ້າງຄວາມເຂັ້ມແຂງໃຫ້ແກ່ທ່າອ່ຽງ ລວມດັ່ງກ່າວ ແລະ ຮັບປະກັນວ່າການແຂ່ງຂັນ ແລະ ການຮ່ວມມືນັ້ນສາມາດນຳເອົາຜົນປະໂຫຍດມາໃຫ້ແກ່ທຸກຝ່າຍ.

        ປັດຈຸບັນອາຊຽນກຳລັງສູ້ຊົນເລັ່ງລັດຂະບວນການສ້າງປະຊາຄົມອາຊຽນ ໂດຍສະເພາະການສ້າງປະຊາຄົມເສດຖະກິດ ອາຊຽນ (AEC)  ໃຫ້ສຳເລັດພາຍ ໃນປີ 2015 ເຊິ່ງຈະສະແດງໃຫ້ເຫັນເຖິງການຮ່ວມມືທີ່ມີໝາກມີຜົນຢູ່ພາຍໃນອາຊຽນ ອັນຈະປະກອບສ່ວນເປັນກຳລັງຂັບເຄື່ອນຂອງພາກພື້ນອາຊີເຂົ້າໃນການສ້າງຕັ້ງຄູ່ຮ່ວມມືສາກົນໃໝ່. 

        ການທີ່ອາຊຽນ ເປັນປະຊາຄົມໜຶ່ງດຽວດ້ວຍຫລັກການແຫ່ງການຮັບຮູ້ຄວາມຫລາກຫລາຍຂອງລະບົບການເມືອງທີ່ ແຕກຕ່າງ ແລະ ຄວາມຫລາກຫລາຍທາງດ້ານວັດທະນະທຳຂອງແຕ່ລະປະເທດທີ່ປະສານກັນເຂົ້າໃຫ້ເປັນປະຊາຄົມທີ່ມີໂອ ກາດຮຽນຮູ້ເຊິ່ງກັນ ແລະ ກັນ, ເປັນປະຊາຄົມທີ່ປົກປ້ອງ ແລະ ແບ່ງປັນໃຫ້ແກ່ກັນນັ້ນແມ່ນໜຶ່ງໃນຈຸດພິເສດຂອງການ ເປັນກຸ່ມປະເທດໃນໂລກ ແລະ ຫວັງຢ່າງຍິ່ງວ່າປະຊາຄົມໂລກຈະໃຫ້ການເອື້ອເຟື້ອຕໍ່ທິດທາງນີ້ຂອງອາຊຽນ.

         ອິນເດຍ ໄດ້ເປັນຄູ່ຮ່ວມເຈລະຈາທີ່ສຳຄັນຂອງອາຊຽນ. ຜູ້ນຳຂອງອາຊຽນ ແລະ ອິນເດຍ ໄດ້ຮັບຮອງເອົາ “ວິໄສທັດ” ໃນປີ 2012 ທີ່ນິວເດັນລີ ໃນໂອກາດ ກອງປະຊຸມສຸດຍອດສະເຫລີມສະຫລອງຄົບຮອບສອງທົດສະວັດ ແຫ່ງການພົວພັນ ຮ່ວມມືອາຊຽນ-ອິນເດຍ ແລະ ໄດ້ຍົກລະດັບການພົວພັນເປັນ “ຄູ່ຮ່ວມຍຸດທະສາດ”. ວິໄສທັດດັ່ງກ່າວໂດຍ ອີງໃສ່ການ ພົວພັນທີ່ແຂງແຮງ ຂອງສອງຝ່າຍໄດ້ກຳນົດແນວທາງການຮ່ວມມືໃນອະນາຄົດລະຫວ່າງອາຊຽນ ແລະ ອິນເດຍ ແນ ໃສ່ກ້າວ ໄປສູ່ສັນຕິພາບ ແລະ ຄວາມວັດທະນາຖາວອນຮ່ວມ ກັນ.

          ການເປັນຄູ່ຮ່ວມລະຫວ່າງອາຊຽນ ແລະ ອິນເດຍ ໃນໄລຍະ 20 ປີທີ່ຜ່ານມາໄດ້ຂະຫຍາຍ ຕົວຢ່າງສຳຄັນໂດຍ ກວມເອົາຫລາຍຂົງເຂດລວມທັງດ້ານການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ. ຄວາມຄືບໜ້າ ໃນແຕ່ລະດ້ານໄດ້ຮັບໝາກຜົນຢ່າງໜ້າຊົມເຊີຍໂດຍການຈັດຕັ້ງປະຕິບັດສັນຍາ ແລະ ຂໍ້ລິເລ່ີມຕ່າງໆຮ່ວມກັນ. ອິນເດຍເປັນ ປະເທດໜຶ່ງ ທີ່ປະກອບສ່ວນຢ່າງຫ້າວຫັນໃນຂອບອາຊຽນ+1, ເວທີພາກພື້ນອາຊຽນ (ARF), ກອງປະຊຸມສຸດຍອດອາຊີຕາ ເວັນອອກ (EAS) ແລະ ກອງປະຊຸມລັດຖະມົນຕີປ້ອງກັນປະເທດອາຊຽນບວກ (ADMM-Plus). ການເຊື່ອມຕໍ່ດ້ານການ ຄ້າ ແລະ ການຮ່ວມມືດ້ານເສດຖະກິດໄດ້ມີການເພ່ີ່ມທະວີຂຶ້ນໂດຍການຈັດຕັ້ງປະຕິບັດສັນຍາການຄ້າເສລີອາຊຽນ-ອິນເດຍ ລວມທັງສັນຍາການຄ້າຜະລິດຕະພັນເຊິ່ງໄດ້ຊ່ວຍເຮັດໃຫ້ການຄ້າສອງຝ່າຍເພ່ີມຂຶ້ນ ເຖິງ 75,6 ຕື້ໂດລາສະຫະລັດ ໃນປີ 2012. ທ່ານຮອງນາຍົກລັດຖະມົນຕີ ທອງລຸນ ສີສຸລິດ ເນັ້ນຕື່ມວ່າ: ການສົ່ງເສີມການພົວພັນລະຫວ່າງບັນດາປະເທດສະມາ ຊິກອາຊຽນ ແລະ ອິນເດຍ ໃນປັດຈຸບັນແມ່ນສະທ້ອນໃຫ້ເຫັນເຖິງການຜັນຂະຫຍາຍນະໂຍບາຍເບິ່ງໄປທາງທິດຕາເວັນ ອອກຂອງອິນເດຍ ແລະ ທ່ານ ຮອງນາຍົກໄດ້ເນັ້ນທ່າແຮງບົ່ມ ຊ້ອນຫລາຍຢ່າງທີ່ສາມາດຂຸດຄົ້ນເພື່ອເພ່ີມທະວີການຮ່ວມມື ສອງຝ່າຍກໍຄືເສີມຂະຫຍາຍສາຍພົວພັນອາຊຽນ-ອິນເດຍ ໃນອະນາຄົດ ຄືຕ້ອງມີຄວາມພະຍາຍາມ ແລະ ມີການປະກອບ ສ່ວນ ຂອງບັນດາຂະແໜງການ ແລະ ສະຖາບັນຕ່າງໆທີ່ກ່ຽວຂ້ອງ. ຜົນສຳເລັດຂອງການເຈລະຈາສັນຍາການຄ້າດ້ານການບໍລິ ການ ແລະ ການຄ້າດ້ານການລົງທຶນລະຫວ່າງອາຊຽນ ແລະ ອິນເດຍ ໃນທ້າຍປີ 2012 ເປັນບາດກ້າວອັນສຳຄັນເຊິ່ງຈະເປັນ ການປະກອບສ່ວນເຮັດໃຫ້ສັນຍາການຄ້າເສລີອາຊຽນ-ອິນເດຍປະສົບຜົນສຳເລັດ.ເນັ້ນເຖິງຄວາມປາຖະໜາ ແລະ ເຈດຕະນາ ລົມອັນແຮງກ້າຂອງອາຊຽນ ແລະ ອິນເດຍໃນການສຶກສາຄົ້ນຄວ້າເພື່ອໃຫ້ມີການເຊື່ອມໂຍງດ້ານພື້ນ ຖານໂຄງລ່າງທີ່ມີປະສິດ ທິຜົນຫລາຍຂຶ້ນເຊິ່ງຈະຊ່ວຍເອື້ອອຳນວຍ ແລະ ສືບຕໍ່ສົ່ງເສີມການຄ້າ ແລະ ການລົງທຶນລະຫວ່າງ ສອງພາກພື້ນໃນຊຸມປີ ຕໍ່ໜ້າ ແລະ ເພ່ືອສືບຕໍ່ເສີມະຫຂາຍການຮ່ວມມືຂອງພວກເຮົາ, ຂ້າພະເຈົ້າຢາກຊຸກຍູ້ໃຫ້ມີການຮ່ວມມືຫລາຍຂຶ້ນໃນດ້ານ ກະສິກຳ ແລະ ປ່າໄມ້ເພື່ອຮັບປະກັນຄວາມໝັ້ນຄົງດ້ານສະບຽງອາຫານ, ການຮ່ວມມືດ້ານພະລັງງານໂດຍສະ ເພາະພະລັງງານ ຊີວະພາບ ແລະ ພະລັງງານທົດແທນ ແລະ ການຮ່ວມມືດ້ານຢາພື້ນເມືອງເພື່ອປິ່ນປົວ ແລະ ປ້ອງກັນພະຍາດ ແລະ ການຖ່າຍທອດເຕັກໂນໂລຊີ ໂດຍການນຳໃຊ້ສູນອາຊຽນ-ອິນເດຍ ແລະ ຮ່ວມກັນສຶກສາຄົ້ນຄວ້າຊອກຫາຊ່ອງທາງນະວັດ ຕະກຳໃໝ່ເພື່ອສືບຕໍ່ເສີມຂະ ຫຍາຍການຮ່ວມມືອາຊຽນ-ອິນ ເດຍ ຫລັງປີ 2015 ພາຍຫລັງ ການສ້າງປະຊາຄົມ ອາຊຽນ.

        ສຳລັບການຮ່ວມມືສອງຝ່າຍ ລະຫວ່າງ ສປປ ລາວ ແລະ ອິນເດຍ, ຂ້າພະເຈົ້າຂໍຖືໂອກາດນີ້ສະແດງຄວາມ ຂອບອົກຂອບໃຈຢ່າງຈິງໃຈມາຍັງລັດຖະບານ ແລະ ປະຊາຊົນອິນເດຍທີ່ໄດ້ໃຫ້ການສະໜັບສະໜູນ ແລະ ຊ່ວຍເຫລືອ ຢ່າງຕໍ່ເນື່ອງແກ່ ສປປ ລາວໃນການຈັດຕັ້ງປະຕິບັດ ຫລາຍໂຄງການທີ່ສຳຄັນເຊັ່ນ: ສ້າງລະບົບສາຍສົ່ງໄຟຟ້າ, ຊົນລະປະທານ, ສູນພັດທະນາຊັບ ພະຍາກອນມະນຸດ, ສາທາລະນະສຸກ, ວິທະຍາສາດ, ເຕັກໂນໂລຊີຂໍ້ມູນຂ່າວສານ ແລະ ການບິນ. ໃນຊຸມ ປີທີ່ຜ່ານມາ, ການຮ່ວມມືລະຫວ່າງ ສປປ ລາວ ແລະ ອິນເດຍ ໄດຮັບການເສີມຂະຫຍາຍທັງລວງກວ້າງ ແລະ ລວງເລິກ ໂດຍຜ່ານຂອບວຽກຂອງຄະນະກຳມະການຮ່ວມມືລາວ-ອິນເດຍ ເຊິ່ງຜົນຂອງການຮ່ວມມືໃນຂົງເຂດຕ່າງໆແມ່ນມີໝາກຜົນ ດີ. ປີ 2011 ເປັນປີຄົບຮອບ 55 ປີ ແຫ່ງການພົວພັນດ້ານການທູດລະຫວ່າງລາວ-ອິນເດຍ, ຂ້າພະເຈົ້າເຫັນວ່າການສືບຕໍ່ມູນ ເຊື້ອທີ່ເປັນພື້ນຖານທີ່ດີດັ່ງກ່າວບວກກັບຄວາມພະຍາຍາມຮ່ວມຂອງສອງຊາດ, ການຮ່ວມມືລະຫວ່າງສອງປະເທດຂອງພວກ ເຮົາຈະໄດ້ຮັບການສືບຕໍ່ຂະຫຍາຍຕົວຢ່າງບໍ່ຢຸດຢັ້ງ.