laophatthananewspaper: ສະຖານທູດສະຫະລັດອາເມລິກາປະຈຳລາວ ສະຫລອງວັນແມ່ຍິງສາກົນ ດ້ວຍການຈັດກິດຈະກຳບໍລິຈາກເລືອດ

ເຈົ້າໜ້າທີ່ ແລະ ພະນັກງານສະຖານທູດສະຫະລັດອາເມລິກາ ຈຳນວນຮ້ອຍ ກວ່າຄົນທີ່ນະຄອນຫຼວງວຽງຈັນ ຮ່ວມກັບອົງການກາແດງລາວ, ໄດ້ຈັດກິດຈະກຳບໍລິຈາກເລືອດຂຶ້ນໃນວັນທີ 6 ມີນານີ້, ທີ່ສະຖານທູດອາເມລິການ ເພື່ອຮ່ວມສະເຫຼີມສະຫຼອງວັນແມ່ຍິງສາກົນຄົບຮອບ 105 ປີ ແລະ ສະແດງເຖີງການຮັບຮູ້ໃນ ການປະກອບສ່ວນຂອງເອື້ອຍນ້ອງແມ່ຍິງທຸກທົ່ວໜ້າທີ່ໄດ້ປະກອບສ່ວນອຸທິດເຫື່ອແຮງຂອງຕົນເຂົ້າໃນການພັດທະນາເສດຖະກິດໃຫ້ມີຄວາມເຕີບໃຫຍ່ຂະຫຍາຍຕົວ ແລະມີຄວາມຈະເລີນສີວິໄລ, ສັງຄົມມີຄວາມກ້າວທີ່ດີ. ທັງເປັນມື້ເລີກງາມຍາມດີທີ່ສະທ້ອນໃຫ້ເຫັນເຖີງຄວາມກ້າວໜ້າ, ການຮຽກຮ້ອງໃຫ້ມີການປ່ຽນແປງແລະເປັນວັນແຫ່ງການສະເຫຼີມສະຫຼອງການເຄືອນໄຫວຂົນຂວຍແລະການເຜີຍແຜ່ຄວາມຮຽກຮ້ອງຕ້ອງການຂອງແມ່ຍິງທີ່ໄດ້ເຮັດໃຫ້ມີການປ່ຽນແປງຄັ້ງຍິ່ງໃຫຍ່ຢູ່ໃນປະຊາຄົມແລະປະເທດຊາດຂອງພວກເຂົາເຫຼົ່ານັ້ນ. ສະຫະລັດອາເມລິກາ ໄດ້ໃຫ້ການສະໜັບສະໜຸນຄວາມກ້າວໜ້າເພື່ອກ້າວໄປສູ່ຄວາມສະເໜີພາບຂອງບົດບາດຍິງຊາຍຜ່ານທາງວຽກງານການທູດ, ຜ່ານທາງໂຄງການໃຫ້ການຊ່ວຍເຫຼືອຂອງຕ່າງປະເທດ ແລະ ການເປັນສ່ວນຮ່ວມກັບພາກສ່ວນສັງຄົມ ແລະ ພາກເອກະຊົນຢູ່ທົ່ວໂລກ.

ສຳລັບປະເທດລາວ, ສະຫະລັດອາເມລິກາໄດ້ດຳເນີນວຽກງານຮ່ວມກັບພາກລັດຖະບານ, ອົງການຈັດຕັ້ງສາກົນແລະຄູ່ຮ່ວມງານພາຍໃນປະເທດເພື່ອກ່ຽວກັບໂຄງການຕ່າງໆເພື່ອສະໜັບສະໜຸນແມ່ຍິງລາວທີ່ປະຕິບັດວຽກງານຢູ່ໃນຫຼາຍໆຂົງເຂດເຊັ່ນຂະແໜງວຽກງານເຕືອນໄພກ່ຽວກັບຄວາມສ່ຽງຂອງລະເບີດບໍ່ທັນແຕກ ແລະ ການຊ່ວຍເຫຼືອຜູ້ເຄາະຮ້າຍຈາກລະເບີດບໍ່ທັນແຕກ, ວຽກງານການຕ້ານການຄ້າມະນຸດ, ການສະໜັບສະໜຸນແມ່ຍິງພິການ, ການອະນຸລັກມໍລະດົກທາງດ້ານວັດທະນະທຳແລະ ການສົ່ງເສີມໃຫ້ແມ່ຍິງລາວມີສ່ວນຮ່ວມໃນການຫລິ້ນກິລາ.ເມື່ອບໍ່ດົນມານີ້: ທ່ານແດນນຽວເອ: ຄຼູນເອກອັກຄະລັດຖະທູດສະຫະລັດອາເມລິກາ ປະຈຳລາວໄດ້ປະກາດໃຫ້ເງິນຊ່ວຍເຫຼືອຈຳນວນ 6 ລ້ານໂດລາສະຫະລັດ ເພື່ອສະໜັບສະໜຸນໂຄງການອາຫານໃນໂຮງຮຽນເປັນເວລາສອງປີເພື່ອເປັນການຊ່ວຍຫລຸດຜ່ອນອັດຕາການຂາດສານອາຫານ ແລະ ການເຕີບໂຕຜິດປົກກະຕີຂອງເດັກຢູ່ຕາມຊຸມຊົນແຫ່ງຕ່າງໆທົ່ວປະເທດລາວຜ່ານທາງໂຄງການອາຫານເສີມໃນໂຮງຮຽນເຊີ່ງໄດ້ຊ່ວຍປັບປຸງວິທີການໃຫ້ສານອາຫານແກ່ເດັກນ້ອຍເກີດໃໝ່ ແລະເດັກທົ່ວໄປແລະ ການມີລະບົບສຸຂະອານະໄມທີ່ສະອາດກ່ວາເກົ່າໄວ້ອຸປະໂພກພາຍໃນຊຸມຊົນ.