ສາທາເປີດສາຍດ່ວນ166 ໃຫ້ຄຳປຶກສາກ່ຽວກັບພະຍາດເມີສ ແລະ ພະຍາດຕິດຕໍ່ອື່ນໆ

ກະຊວງສາທາລະນະສຸກໄດ້ເປີດໝາຍເລກໂທລະສັບສາຍດ່ວນ 166 ເພື່ອໃຫ້ບໍລິການທາງດ້ານຄວາມຮູ້ກ່ຽວກັບ ການສະກັດກັ້ນ ແລະ ຕ້ານພະຍາດເມີສ (MERS - CoV) ແລະ ພະຍາດຕິດຕໍ່ອື່ນໆ, ພາຍຫລັງອົງການອະນາໄມໂລກ ອອກມາລາຍງານເມື່ອຕົ້ນເດືອນມີຖຸນານີ້ວ່າມີຜູ້ຕິດເຊື້ອພະຍາດດັ່ງກ່າວຫລາຍແລ້ວກວ່າ 1.179 ຄົນໃນ 25 ປະເທດທົ່ວ ໂລກ ແລະ ມີຜູ້ເສຍຊີວິດແລ້ວ 442 ຄົນ.

    ກະຊວງສາທາລະນະສຸກໃຫ້ຮູ້ວ່າ: ເມີສ ເປັນພະຍາດເກີດຈາກໄວຣັດຊະນິດໜຶ່ງທີ່ພົບໃນສັດຫລາຍຊະນິດ, ໂດຍສະ ເພາະອູດ ແລະ ຄົ້ນພົບຄັ້ງທຳອິດໃນປະເທດຊາອຸດິອາລາເບຍປີ 2012 ອາການຂອງຄົນທີ່ຕິດພະຍາດດັ່ງກ່າວທີ່ມັກ ພົບແມ່ນມີອາການໄຂ້, ໄອ ແລະ ຫັນໃຈຝຶດ, ພ້ອມກັນນັ້ນຍັງພາໃຫ້ປອດອັກເສບຮຸນແຮງ, ຊຶ່ງເຮັດໃຫ້ຄົນເຈັບມີໂອ

ກາດເສຍຊີວິດໃນ 36% ຂອງກໍລະນີທັງໝົດ, ພະຍາດດັ່ງກ່າວມີໂອກາດຕິດຈາກການໃກ້ຊິດກັບຜູ້ທີ່ຕິດເຊື້ອ ເຊັ່ນ: ຜູ້ເບິ່ງແຍງ ຫລື ຢູ່ຮ່ວມກັບຄົນເຈັບ, ປັດຈຸບັນຍັງບໍ່ມີວັກແຊງ ຫລື ຢາ ເພື່ອປິ່ນປົວ ແລະ ສະກັດກັ້ນພະຍາດດັ່ງກ່າວໄດ້, ດັ່ງນັ້ນມາດຕະການປ້ອງກັນພື້ນຖານແມ່ນການຮັກສາອະນາໄມເປັນປະຈຳ, ໂດຍສະເພາະການລ້າງມື ແລະ ນຳໃຊ້ຜ້າອັດ ປາກເວລາໄອ-ຈາມ, ຖ້າບໍ່ຈຳເປັນຄວນຫລີກເວັ້ນການເດີນທາງໄປປະເທດທີ່ມີການລະບາດຂອງພະຍາດດັ່ງກ່າວ. ເຖິງວ່າຍັງບໍ່ທັນມີການລາຍງານພົບການຕິດເຊື້ອພະຍາດດັ່ງກ່າວໃນລາວ, ແຕ່ກະຊວງສາທາລະນະສຸກ ໄດ້ເອົາໃຈໃສ່ໃນ ການໃຫ້ຄວາມຮູ້ແກ່ປະຊາຊົນກ່ຽວກັບພະຍາດ ແລະ ວິທີການປ້ອງກັນ, ພ້ອມທັງສົມທົບກັບອົງການອານາໄມໂລກຕິດ ຕາມສະພາບລະບາດໃນຕ່າງປະເທດຢ່າງໃກ້ຊິດ ແລະ ສົມທົບກັບຂະແໜງກ່ຽວຂ້ອງໃນການເຝົ້າລະວັງຕິດຕາມຜູ້ໂດຍ ສານທີ່ເດີນທາງມາຈາກປະເທດທີ່ມີການລະບາດ, ສະນັ້ນ ຖ້າມີຂໍ້ສົນໃຈເພີ່ມເຕີມກ່ຽວກັບພະຍາດດັ່ງກ່າວ ຫລື ພະຍາດຕິດຕໍ່ອື່ນໆສາມາດຕິດຕໍ່ສອບຖາມໄດ້ຜ່ານສາຍດ່ວນກະຊວງສາທາລະນະສຸກໝາຍເລກໂທ 166.